每年最炎熱、同埋最寒冷o既兩個時段,
都總會有50萬名以上o既勇士匯聚於此,
係呢個全世界最大o既event入面,
不惜一切爭個頭崩額裂,
那怕用盡最後一點奶力,
亦要守護自己最愛o既事物......
講緊o既係コミケ!
コミケ(COMI-KE),
全寫係コミック・マケット(Comic Market)。
係日本一年兩次o既同人誌售賣活動,
夏天o既叫「夏コミ」, 冬天o既叫「冬コミ」。
因為今次係第82屆, 所以又叫c82。
唔計工作人員及售賣者,
每年都有幾十萬人參加,
啱啱嗰次冬コミ就有約50萬人出席。
(日本人口約2億)
同人誌,
簡單啲講即係一啲志同道合o既人,
自己出錢出力賣自己o既一啲作品(可以係漫畫、可以係文章),
由寫作、畫、以致印刷完全一腳踢,
冇商業成份, 純綷賣嗰個開心, 睇嗰個高興。
不過受動漫呢個次文化影響,
越黎越多同人誌係以動漫為題材,
於是到左而家, 同人誌俾人o既感覺係商業動漫o既衍生品。
而事實上而家的確係咁o既情況,
不過亦都有原創漫畫、畫冊、相集、文章等。
好多好多呢啲唔同o既團體合作起黎,
租一個場地一齊賣自己o既作品,
就係而家コミケ o既發源。
對於同人誌一知半解o既人,
可能會有個印象覺得同人誌都係色情刊物。
咁係因為近年コミケ規模太大,
參加團體太多。要吸引人注目黎購買自己o既作品,
情色o既題材就成為一個好好o既招徠,
以至而家有一半以上o既同人誌都係18禁。
不過撇開同人誌o既內容唔講,
コミケ的確成為好多業餘畫家成名o既途徑,
因為有唔少畫得出色o既,
會有機會被出版商睇中, 從而被邀請出漫畫、
畫小說插圖、參與動畫o既人物設計咁。
除左主要係同人誌售賣o既場地外,
而家o既コミケ仲會有商業公司o既參加,
將コミケ作為售賣動漫、遊戲限定商品、
發佈新作品、以及大賺特賺o既手段。
雖然有唔少聲音反對商業成份參與コミケ,
(因為最初コミケ只係販賣同人誌呢個目的)
但無可否認, 動漫、遊戲公司o既參與,
已經成為コミケ 不可o既分割o既一部份。
當然唔少得o既仲有cosplay啦。
作為一個動漫愛好者,
(小弟仲未覺得自己係一個阿宅,
只係閒來鐘意睇下動漫)
コミケ一直都係小弟想參與一下o既一個活動。
難得黎日本一年, 唔參加對唔住自己。
於是之前死plan爛plan,
點都要留空10/8-12/8 stay係東京,
參加コミケ。
琴晚係田町o既網吧過左一晚,
0430就起身。
(我冇打錯字, 你冇睇錯時間)
因為コミケ o既人數唔係講玩,
唔有有番咁上下早, 真係唔洗玩。
0453搭JR由田町駅到有樂町駅,
然後轉地鐵。
因為係晨早流流, 地鐵比JR疏,
所以短短十幾分鐘,
已經積左三班JR車o既人。
下圖係等地鐵o既情況,
點都想像唔到呢個係早上0500之前o既月台。
仲要影嗰陣都未有車黎。
車黎到時, 人數係相片o既三倍......
仲要架車本身都一半滿!!!
上車......其實唔係上車,
而係俾人夾入車。
小弟唔識用文筆形容,
亦都相信冇乜語彙可以形容到嗰種擠迫。
唔係誇張, 小弟26年人,
第一次咁樣迫地鐵。
就連早上番工時間o既金鐘站都比唔上,
冇親身經歷過係唔會明。
你係唔雖然握扶手,
因為就算車箱反轉左,
嗰種人迫人會將你夾實, 你係唔會跌出黎......
亦因為咁, 你唔好諗住你會郁得到。
小弟隻左手,
外L字型咁俾人夾住全程車=.=
係有樂町搭去豊州,
轉ゆりかもめ鐵路。
地鐵車門一開, 又係一個奇景。
情況就好似賽馬開閘,
不過跑出o既係過百隻馬......
所以沿途小弟都冇機會影相喇,
試想下一堆馬中有一隻馬脫腳@﹏@
同樣地係ゆりかもめ被夾左十分鐘左右,
終於到達目的地:國際展示場正門駅。
唔洗問路走,
因為有場地員工帶你行,
佢反而怕你唔識行周圍中擾亂扶序。
(不過唔係好似大陸咁判監)
沿路行會有唔同o既分叉,
例隊去唔到o既展館,
所以事前要清楚自己要去邊。
因為今日o既同人誌主要係女性向,
所以小弟今日先到西館o既企業區域。
點先知要去東館定西館?
咩館有咩睇?
記唔記得小弟幾日前個blog,
有本字典咁厚o既書?
就係靠佢喇。
http://blog.yahoo.com/japsleevefish/articles/614208
(最後嗰張相)
事前做定功課,
mark低&記低要去邊度買咩。
至於參企業o既商品,
就要自己再上各企業o既網頁睇。
臨場先睇, 絕對係黎唔切。
小弟嗰block人,
跟據員工o既指示安定左之後,
就可以自由活動,
離開自己個位買野食呀、鬆下筋骨呀咁。
當然要係入場前一定時間(0845)番番自己位。
亦都要自律, 唔可以咋咋帝帝打人尖。
小弟當然趁機會見識下,
周圍影下相咁啦。
講左咁耐話好多人好多人,
究竟有幾多人?
睇相啦!!!
要知道,
影相o既時候只係早上0630左右......
平時人多,
頂多都係女廁排隊,
但就快手快腳o既男士都要排廁所(下圖),
就知道有幾多人。
向住國際展示場行, 要上橋。
如果要排到咁前(上圖),
以之前靜岡嗰個SK先生o既經驗,
應該要0400左右就要到......
然後呢一班坐係正門o既勇者們(上圖),
真係唔知佢地幾點到。
コミケ有明文規定,
話唔準係展示場一帶過夜。
不過一來冇法律約束力,
二來...幾多點先叫過夜?
一點?兩點?三點?
望番轉頭,
除左人之外都係人。
睇下圖好似唔多人,
但需知道左右兩排樹o既外面都堆滿人。
仲有時間, 行左去最後影番上黎。
買左幾個飯團, 同埋一支飲品,
就番番去等夠鐘。
1000係正式開館o既時間,
不過0900開始就慢慢逐block行。
小弟嗰block 0930開始郁,
然後0945去到大門口前就停低左。
1000蹬隥凳燈, 宣報正式開館,
不過當然啦, 冇咁快到小弟嗰block。
行下停下咁, 總算叫做1030入到西館o既企業參展館。
其實小弟都唔係話鐘意買嗰啲攬枕呀、作畫設定資料呀咁,
不過一場黎到, 都想買番少少野o既。
因為小弟比較喜歡《魔法少女リリカルなのは》,
所以決定排該參展商o既攤位。
下圖就係企業參展商o既館。
睇落好似唔係好多人,
咁係因為啲人係晒外面排隊等買野......
小弟喜歡o既《魔法少女リリカルなのは》亦都好受廣大o既朋友們歡迎,
所以條龍排得長係預左, 只係冇預到真係可以咁長......
下圖打星o既係攤位位置, 紅線就係條龍。
小弟沿住條龍行, 搵龍尾。
越行越驚, 竟然要行十五分鐘先見到龍尾.......
睇番下圖左下角scale, 條龍成600m以上長。
粗略計每人佔約0.8m長度, 兩人一排,
即係話排左成1500人以上=.=
仲要唔只呢一個攤檔係咁......
1045開始排,
15分鐘先向前行唔夠10米,
期間工作人員耐唔耐就會黎報告,
某某角色o既攬枕已經賣晒。
到1215, 連啲二打六角色o既攬枕都賣晒,
但小弟都只係啱啱過左第一個U turn......
呢個就係傳說中o既「なのは完売」......
小弟本身又唔係話非買不可,
見條隊成個幾鐘都郁唔夠100米,
於是決定離隊......
結果小弟第一次出征コミケ係戰敗收場.......
去其他攤位,
一樣啲龍長到HIHI,
於是兜幾個圈,
拎左啲免費派發o既小冊子、贈品等,
就去COSPLAY場地影相喇。
下圖就係COSPLAY o既主要場地,
香港動漫節真係冇得比!!!
連橙都準備埋, 真係認真
(影嗰時冇發現, 唔記得較番曝光補償)
同時亦顯示出cosplay無疆界。
八九寺都唔差。冇撫子?
超型o既キリト同埋有少少漲o既アスナ
其實COSPLAY唔係一定要係動漫、遊戲o既人物。
不過下圖真係非同小可,
Johnny Depp真人!?!?
上圖o既企鵝係關東八達通(SUICA)o既吉祥物。
原創無厘頭, 反而仲受歡迎
烏賊娘,
唔係話好可愛,
但夠陽光。
作品完左COS o既人都少左。
(話時話佢個樣有啲似日笠陽子......)
下圖o既月火,
殺左唔少人大量memory!
後來發現原來佢有份幫SHAFT派野
《聖☆おにいさん》o既耶穌,
個死人樣真係好死似!!!
仲要感化路過o既軍人......
有埋佛陀仲正。
正當臨走,
想話點解唔見《ANOTHER》o既時候,
就發現超高質素o既見崎鳴!!!驚為天人!!!!
赤沢泉美相形見拙。
都冇乜野好做喇,
走人。
實在係超攰。
其實之前SK先生都話過俾小弟知,
行コミケ係超攰的。
不過冇諗過真係咁辛苦=.=
某程度上, 仲辛苦過上富士山......
今晚係KT先生屋企住,
詳情睇番前日o既BLOG
http://japsleevefish.blogspot.hk/2012/08/blog-post_7.html
仲有時間,
又行到身水身汗,
於是去左一間網吧,
俾700yen逗留三個小時,
其間再沖埋涼, 都只係100yen。
1900同KT先生匯合。
先到KT先生屋企放低行里,
然後去食飯。
KT先生勁客氣,
請小弟食左個好貴o既蕎麦定食。
然後又一齊去左澡堂沖涼。
令到本身好厚面皮o既小弟都唔好意思。
番番房, 傾下偈,
咁又一晚。
沒有留言:
張貼留言