離開大阪 + JR經驗

今日正式離開住左八個月o既大阪,
向關東進發。

約好左1000退房,
0830起身, 不過其實行里一早執好晒,
咁早起身都冇野好做,
結果又係上網hea下咁。

0930, 換好衫,
真正完成最後o既執拾,
就去辦退房手續。

1030左右出發,
搭地鐵到東梅田,
然後用青春18,
一口氣由大阪搭到去東京。
今次JR要搭9個幾鐘,
連埋地鐵嗰程, 成10個小時。

JR大阪駅



大阪-->米原 1:27
米原-->大垣 0:37
大垣-->豊橋 1:26
豊橋-->浜松 0:34
浜松-->熱海 2:33
因為小弟最終目的地唔係東京駅,
所以由熱海只係搭到品川再轉車:
熱海-->品川 1:45
品川-->田町 0:03

除左第一程同第三程係「新快速」之外,
其餘全部都係「普通」......
不過呢個已經係唔洗附加費而最快o既搭法。



隱約以前好似都介紹過JR列車o既種類:
如「快速」、「普通」等等,
不過一來當時好似講得唔係咁詳細,
加上其實仲有好多唔同形式,
今日趁搭車途中有咁多時間,
慢慢介紹下。

小弟唔敢講話搭過晒咁多種類JR
(即係乜野乜野型號車箱呀咁),
但經過去完九州&鳥取山陰等,
小弟都夠膽講, 差唔多所有形式o既行駛都搭過,
以下逐一講解。

1) 列車o既分類
基於小弟見過o既, 由慢至快:
普通<快速<新快速<特別快速<特急<新幹線
簡單黎講, 「普通」車站站停,
「快速」車開始至「特急」越飛越多站, 只停大站。
新幹線更加係自己有自己o既線路, 一個縣可能只係得一個站。
仲有一種叫「區間快速」,
故名思意, 基本上係快速, 但去到某啲城市會站站停。
所以搭JR上車前要睇楚,
唔好盲中中上車。
不過一般遊客去o既都係大站,
只要唔係上錯特急, 基本上都冇問題,
只係上錯左普通車會勁花時間。

2) 付款列車
「Green車」、「普通車指定席」、「特急」
要另外俾錢買多張票。
新幹線直頭要另外買飛。
都係嗰句, 唔好盲中中衝上車。

3) ワンマン列車(One-Man列車)
即係全列車只係得一個職員(有時都有兩個o既),
負責晒車上所有野, 包括駕車、售票等。
呢種車一般都係行駛於唔太多人&郊區o既線路,
如南九州、連結山陰(日本海方面)與山陽(太平洋方面)之間o既線路等。
車箱o既組成, 一般唔會多過四卡

3a) ワンマン列車好多時都唔會自動開門,
要自己按車門旁o既掣

3b) 有啲ワンマン列車(通常得兩卡以下),
車上做埋買票、付款手續。
一般黎講, 一上呢種車就會見到車門旁有「整理券」
(即印有數字o既紙仔, 表示閣下係邊站上車)
落車時要到最前嗰卡最前嗰道門落車,
落車經過車長面前, show整理券&俾錢。
車箱最前方會有個電子顯示屏,
顯示對應號碼整理券o既車費。

3c) 續(3b), 一般ワンマン列車都係要大家,
從每一節車箱o既後面嗰度門上車,
然後用最前嗰卡, 最前嗰度門落車。

4) 如果進入月台時唔見有售票處,
有以下可能性:

4a) 到閘口站長室買票

4b) 好似(3b)咁, 上車拎整理券,
然後落車俾錢

4c) 上到車唔見有得拎整理券的話,
通常開車之後車長會巡車,
叫停行過o既車長, 同佢買飛。

5) 中途分體
有啲長o既路線、或郊外啲o既路線,
列車去到某個站, 會中間斬開, 分開行駛。
有兩個可能性:

5a) 前面部份繼續前進,
後面部份走回頭路線。

5b) 分開兩個唔同目的地前進。
所以上車時、係車上要保持警覺,
有特別長o既廣播、又或者明明唔係終點但啲人落晒車,
就好睇下發生咩事。

6) Switch Back
只有極少路線有Switch Back呢樣野,
如熊本至鹿兒島之間o既普通車路段。
基於路軌o既構造+觀光理由,
列車去到「之」字位,
車長會搞一大輪程序, 然後走左去車尾開車,
因為係「之」字路軌, 所以架車會倒頭行,
然後再重覆一次, 繼續向前行。
除非係「鐵路發燒友」, 如果唔係, 係一般人眼中,
只會覺得係攞黎搞=.=



另外, 車箱內o既一啲事情

1) 好多時啲座位o既椅背都係郁得,
(好似天星小輪咁)
大家可以就住人數(例如四個人2對2咁座)
又或者係行車方向, 自行調整。

2) 留意下車門需唔需要手動開關

3) 日本人係唔會係車上講電話的。
電話要轉震機mode,
而係老人、殘疾坐位附近,
更加要熄手機,
因為怕電波會影響配有心率附助器o既人。

4)亦因為(3)o既原因,
日本車箱比較寧靜,
大家要保持安靜。

暫時諗起係咁多,
諗到時再寫。



小弟今晚先到一間網吧過一晚,
反正聽日凌晨4點幾又要起身=,=

突然間覺得自己已經完全溶入左日本o既生活=.=