北海道 (神仙沼 + 神威岬 + 島武意海岸)

平時農場工作都只係七點起身,
但今日晨早流流六點就起身食早餐,
一行四人七點就出門口去旅行。
(小弟、Y先生[台灣, 男]、A小姐[台灣, 女]、FA小姐[北海道, 女])

上圖紅色星星就係小弟工作o既牧場,
第一個景點就係最近嗰個紅色圈---神仙沼。

北海道 洞爺湖花火大會

今日仍然係執薯仔,

不過執左一整日之後,

終於執晒喇!!!!!!

由小弟黎到第三日開始剪草,

到今日執晒啲薯仔,

足足用係薯仔田花費左16日=.=

不過今日o既重點唔係呢度。

1615完左工作之後,

小弟+台灣男仔(Y先生)+台灣女仔(A小姐)+北海道女仔(FA小姐)

四條拎出去red。

事源係咁的,

因為聽日放假,

所以一早打算今日完左工作之後,

派Y先生去租車, 然後今晚去睇煙花,

之後聽晚再去觀光。

不過呢幾日一直落雨,

日日留意住天氣,

總算叫做每一日都落雨o既當中,

撞著小弟要去o既地方 / 時間停雨。

正如頭先所講,

本來打算叫WWOOF屋主開車載Y先生到車站,

再搭JR到租車o既地點,

Y先生再開車番黎, 載我地三個去睇煙花。

不過屋主話咁樣來來回回,

未必趕得2045睇煙花,

於是四個一齊去租車,

然後直接去睇煙花。

WWOOF第十八日 --- 小弟一人主理晚餐

今晚到小弟煮飯......

1630一完左農場o既工作,
就開始落手煮餸。
先係冬瓜盅,
因為蒸都要蒸差唔多兩個鐘......

將適量o既豬肉、
冬菇、蝦乾、薑、蘿蔔等
放入冬瓜入面,
適當地蒸個零兩個鐘,
因為時間關係,
最後落適量o既鹽就搞掂......


第二道菜係咖喱薯仔炆雞。
將適量o既薯仔+適量o既雞,
係咁依炒下, 加水
然後加咖喱粉、奶、椰絲(冇椰漿......),
炆十至十五分鐘之後加鹽同生粉水,
搞掂。


第三道菜, 偽福建炒飯,
係咁依炒個炒飯底。
另外開個蠔油汁,
煮埋啲雞呀、翠玉瓜粒呀咁,
淋上個炒飯就搞掂。

WWOOF第十七日 --- 台式月餅?

今日台灣男仔Y先生整台式月餅。

酥皮包住紅豆飴同埋合桃,
放入烤箱焗。

真係幾好食喎。

大家將啲level推到咁高,
小弟聽日煮飯好大壓力......

WWOOF第十六日 --- 農場簡介

今日上午, 終於完完全全割晒蕃薯田o既所有草!!!

但呢個WWOOF真係日日新奇日日新,
唔知點解無啦啦話要起間屋仔,
於是小弟同個台灣男仔(Y先生),
就要陪主人家去伐木、搭屋=.=

不過問題係,
佢地似乎唔係諗好晒有晒計劃先起,
而係一邊起一邊諗,
於是實際上有好多時間,
小弟同Y先生都係企係度等佢地諗......

WWOOF第十五日 --- 香港代表

呢個WWOOF o既膳食一啲都唔差,
餐餐都可以食到反肚, 一定有剩。
而且屋主夫人學過中菜,
煮餸o既方式都好似貼近華人,
所以口味方面一啲都唔係題。


不過唯一o既問題係,
佢地盡量都係食番自己有o既食材,
於是每一餐都係:

茄子
南瓜
青瓜
翠玉瓜
蕃茄
粟米(收成期已過)

WWOOF第十四日 --- 新見溫泉

今日又有新o既工作

屋主渣車帶我地到~400m外o既農地,
係一片稻田o既遺跡。
稻米已經打好, 稻草亦都已經割左落黎,
紥好左一紥紥。

要做o既野,
就係將啲紥好左o既稻草堆埋一堆放好,
然後會有人黎收。

聽落好似好輕鬆,
不過重覆又重覆之後,
都真係幾攰下.......



1700做完收工,
唔知挑起邊條根,
屋主話帶我地去浸溫泉,
於是執好要換o既衫就坐車出發喇。

無無聊影下相。
上圖係兩個台灣人,
Y先生同A小姐。

WWOOF第十三日 --- 又落雨的假日

迎來係WWOOF第二次o既假期。

本來打算中午踩單車出車站,
當運動一下之餘,
又可以出車站一帶慢慢影下相, 行下街。
(其實真係一個乜都冇o既鎮仔, 香港人應該想像唔到)

不過問題係,
又落雨......

咁多日唔落係揀星期日落......

結果上午0700起身,
食完個早餐, 再次瞓過。
瞓到十二點半食午餐,
然後上下網、打下機(咪又係AOC......)
咁就過左一個下午=.=

唔該下個星期唔好再落雨啦唔該......

WWOOF第十二日 --- 星空攝影

雜談一:   星星

本來琴晚有啲攰,
都唔打算影相。
不過舉頭望上天,
實在係太好天了,
唔影唔又要等幾耐(黎緊幾日都有雲)。



經緯(蘭越駅)　**實際地點係五公里外
北緯42度48分16.35秒
東経140度31分44.18秒

時間
2100~2200

器材
NIKON D7000
18mm-105mm
普通三腳架

基本SETTING
減低長時間曝光雜訊: 高
光圈: f3.5

夏季大三角
方向: 西
Exposure Time: 30s
ISO: 1600
Focal Length: 18mm

WWOOF第十一日 --- 市役所転入登錄

今朝起身, 涼左好多,
好似話得番12度。

不過一拎起個剪草機fing,
個身暖起黎就啱啱好。

黎左 蘭越 咁耐,
都未去到市役所做転入登錄。
(即係搬過黎要做o既人口登記)
放假又放係星期日,
役所都唔開,
所以今日同宿主講,
咁啱今日要去圖書館還書,
所以帶埋小弟去做転入登錄。

平時見到啲城市,
一個縣分唔同市, 再細分成唔同區,
每一區有一個區役所,
類似香港o既民政事務處啦。
不過北海道呢啲渣半個鐘車都唔見隻鬼影o既,
就冇分得咁細。
成個蘭越得一個役所,
所以唔叫區役所,
直頭叫「役場」。

可能比較少外國人黎呢頭,
再加上呢個搬屋做登記o既法例都係今年年中先開始,
所以蘭越役場o既人都好似唔係好知要點做。
ANYWAY, 搞左十五鐘搞掂, 走人。

經過超市, 順便買左兩支汽水......
不嬲都唔太鐘意飲汽水,
不過辛苦完之後都係想飲番杯~

WWOOF第十日 --- 夏季大三角 (初試)

因為琴日先啱啱落完雨,
啲泥仲未乾晒,
所以今日都唔洗執蕃薯,
不過我同個台灣男仔就被派去剪草=.=

冇錯,
之前剪完啲長o既草,
而家要清埋啲凹位o既草根......

不過今日開始明顯地突然涼左好多,
雖然有太陽, 但全日fing住個剪草機都冇出過汗。



晚上見好天,
於是拎齊架撐打算影星星,
點知Set好試得黎,
啲雲又走番晒出黎......

勉強影到一張叫做見到夏季大三角~

正西
~21:30
18mm
F3.8
ISO1600
曝光30s
減低長時間曝光雜訊: 高

WWOOF第九日 --- ASUKA

因為落雨o既關係,
今日唔洗再執薯仔,
改為摘蕃茄。
原來摘蕃茄係最輕鬆o既工作!!!

中午停左雨,
所以下午我同個台灣男生一齊再剪草,
不過剪到半路, 又再次落大雨......
於是改為pack疏果。

嗰個名為ASUKA o既日本女仔,
真係超級精力充沛,
幫手農場o既工作之外,
仲幫手煮飯、洗碗等等。
當然, 佢未黎之前, 我地三個華人都有人幫手做,
只係冇佢咁踴躍啫。

ANYWAY,
小弟唔鐘意同人爭,
佢鐘意做就做飽佢啦XP
小弟做好自己就算~~~

完完全全感受到共產o既弊端!

WWOOF第八日 --- 薯仔, 薯仔&薯仔

琴日終於將啲草割晒,
於是今日開始就執薯仔喇......

WWOOF第七日 --- 小總結

唔經唔覺, 一星期已經過去了~
雖然工作比較攰,
但絕對比之前拉麵店好,
因為一來keep住有野做, 時間過得好快。
二來, 工作係比較體力勞動,
但完全唔係趕住做(做多左唔會有補水=.=)
所以可以慢慢做。
三來, 完全唔洗擔心金錢問題,
唔洗擔心夠唔夠錢交租,
唔洗計住伙食用幾多錢等等。

WWOOF第六日 --- 第一次休假

星期日, 迎來第一個係農莊o既假日。

其實應該瞓到晏一晏都冇人理,
不過為左培養良好o既生活習慣,
所以都係決定0700起身去食早餐。

WWOOF第五日 --- 摘蕃茄, 執薯仔

因為聽日放假,
所以今日要做埋聽日嗰份,
平時摘蕃茄仔,
摘廿零三十盒就夠(@220g)

但今日一摘就要摘130盒......
仲要唔好似因為特然要出貨俾多個人,
所以另加80盒......

其實摘蕃茄唔算辛苦o既,
不過不停係咁摘都有啲悶......

四個人摘左兩個鐘,
總算叫做搞掂,
然後......又係剪草......



中午食過午飯之後,
去採薯仔。
其實一早已經用翻土機挖晒出黎,
要做o既只係要執起啲薯仔放入籃入面。

不過問題係落雨=.=

啲薯仔挖左出黎又唔可以就咁放係度,
結果執得黎, 個個都已經變晒落湯雞.......

但係亦因為咁,
1530執完薯仔就收得工,
沖涼洗衫等食飯。

WWOOF第四日 --- 大得離譜

今日上午又係剪草啦,
睇黎剪草呢個工作會持續一個星期,
點解, 因為個農場實在太大=.=

可能因為實在等唔切剪晒啲草先黎收割,
結果下午開始就收割,
有薯仔同蕃薯。

當然啦,
做野o時候就唔影得相架喇,
下三張圖係1700收左工之後影o既。

可以見到塊田又幾大=.=

WWOOF第三日 --- 成吉思汗

因為東京黎嗰個男仔聽就走人,
為左歡送, 今日中午o既係sepcial o既一餐~
係北海道o既名菜, 名為「ジンギスカン」(JINGISUKAN),
直譯就係「成吉思汗」啦。

個名聽落好似好型咁,
其實即係板燒羊肉。

就咁食就冇乜野好講o既,
正就正在係無敵大自然景中食!

WWOOF第二日 --- 夜觀天象

今日得一個字: 「攰」!!!!!!

原因係今日成日都要剪草。
當然唔係用手剪啦。

雖然有汽油推動o既剪草機,
但唄係嗰部成十公斤o既野剪足六個鍾,
都唔好話唔攰。

就咁剪就唔會好攰o既,
問題係啲草好長,
剪左之後啲草會砸住個剪草機,
於是要fing個剪草機挑開啲草。
唄住10公斤野fing足六個鐘.......



做到1700, 收工~

坐係凳度望住有「北海道富士山」之稱o既羊蹄山~
癒された～

WWOOF第一日

朝早0700起身,
刷牙洗面之後,
0730食早餐。

早餐主要係麵包同埋粟米,
另外仲有飯同兩碟菜。

食完, 洗完碗, 仲有少少時間剩,
可以唞下做自己野,
然後0900正式開工。

一路向北 最終日 --- 北海道 五稜郭 + WWOOF

朝早九點起身,
寄存啲行里係酒店之後,
就出發到五稜郭。

由JR函館駅搭電車。
睇地圖好似好近咁,
但事實上搭左成15分鐘,
再行多十五分鐘先到達......

一路向北 第六日 --- 青森 弘前城 + 北海道 函館

今日可以瞓晏啲,
不過所謂o既晏,
都只不過係0830。

黎到弘前第二日,
都未到訪弘前o既著名景點---弘前城。

弘前城, 係達成東北津輕地域統一o既藩主,
津輕為信, 所指示,
二代藩主 信枚 所建。
由1603年開始直至幕府倒台, 新政府廢藩呢260年間,
弘前城一直都係津輕地帶o既行政中心。

弘前城內o既南內門、北門、追手門、東門、東內門,
以及丑寅櫓、屒巳櫓、末申櫓,
全部都係現存古蹟, 日本指定文化財產。
而弘前城o既天守閣亦係日本現存十二天守之一。

弘前城範圍內種左爆多櫻花樹,
亦都有好多好有歷史o既櫻花樹,
所以弘前城係東北其中一個賞櫻熱點。
可惜而家係秋夏交加o既時間......

由弘前駅搭十分鐘巴士就到弘前城o既追手門。

一路向北 第五日 --- 青森 靈場恐山

五點起身.....晨運都冇咁早......
0530到達弘前駅,
乘搭0545 由弘前到青森o既JR列車。

琴晚黑媽媽都睇唔到駅前面有石像。

一路向北 四第日 --- 山形 立石寺(山寺)

琴晚結果搞到兩點先瞓,
但今朝又要0600爬起身。
本身今日應該可以瞓到九點幾的,
不過因為前日上蔵王お釜出左意外,
要編排過啲行程,
所以將去「山寺」呢一個項目放左係今日。

ANYWAY, 除左晨運咁早爬起身之外,
對行程都冇乜障礙,
反而仲因為咁, 小弟可以用青春18車票去埋山寺,
所以去山寺嗰程車錢都著數埋。

0709上JR, 0816就到達山寺。
寺如其名, 山寺係一個依山而建o既寺廟群,
原名叫宝珠山立石寺。
860年由慈覺大師開山至今。



由車站月台向山上望,
已經可以見到山寺o既鳳毛鱗角。

一路向北 第三日 --- 仙台 (瑞鳳殿 + 青葉城跡 + 松島 + 瑞巖寺)

琴日都唔記得貼仙台站張圖出黎添。

琴晚同今晚都係住仙台o既一間capsule hotel,
平係平, 不過始終係因為比較多人困係一間大房度
(當然, 每人有一格仔啦)
所以比較多雜聲, 瞓得唔太稔,
不過好處係一定唔會瞓過龍......

七點半起身,
刷牙洗面出門口,
第一站係端鳳殿。

簡單黎講, 一句講晒,
瑞鳳殿就係戰國時代,
仙代一帶o既大名: 「獨眼獨」伊達正宗o既墓地。
(仲有佢個仔同佢個孫)



仙台有週遊巴士 one day pass,
一程均一250yen,
而one day pass只係600yen,
再加埋啲景點折回優惠,
只要閣下去一個收費景點,
都打番和條數(來回500yen, 收費景點折回約100yen),
何況小弟今日會去兩個景點。

不過問題係,
一來小弟琴晚到仙台已經比較夜,
售票處已經關左門,
今朝又早過售票處開門就出門口。
二來小弟住o既capsule hotel比較遠離JR站,
(週遊巴士出發點)
要搭普通路線巴士駁腳,
計番條數, 買唔買pass都差唔多,
所以都係算啦。



係瑞鳳殿巴士站落車,
不過原來個站同瑞鳳殿有一段距離,
都搵左一陣......

去到仲要發現要爬斜路=.=(下圖)

一路向北 第二日 --- 山形 (上山城 + 蔵王お釜)

琴晚點幾鐘先瞓,
但今朝又要0700起身。
用盡九牛之虎之力爬起身,
梳洗完check out,
不過行里仲可以寄存。

今日o既第一站,
係位於山形縣及宮城縣邊界o既
蔵王山火山口湖---お釜(OKAMA)

先由山形駅搭巴士到蔵王溫泉區(980yen),
然後搭纜車上山頂,
再行大半個鐘至一個鐘就到。

一路向北 第一日 --- 福島 (鶴ヶ城[会津若松城] + 栄螺堂)

為左搭早上0623開出o既JR,
晨早流流0500就爬左起身。
梳洗完, 做埋最後o既執搭,
就正式離開呢個住左三個星期o既兩層樓房。

搭第一班o既巴士(0538)到川崎駅,
時間都只不過係0555左右......
預早左, 不過唔緊要,
見有車就搭。

話晒都搭過N咁多次JR,
就算唔跟check好左o既時間表,
都知道點樣搭唔會搭錯。

最重要o既係,
東京圈內o既鐵路,
幾乎日日都有人身事故,
唔係飲醉酒跌落路軌就係自殺,
只不過東京有N咁多條鐵路,
睇下中唔串你要搭嗰條。

基於以上原因,
都係盡早離開首都圈比較隱陣。
小弟今日去o既地方(其實成個東北都係)比較隔涉,
有啲冬瓜豆腐延誤左一班車,
除時要等多幾個鐘先有下一班......

又搬喇

過埋今日,
小弟就向北海道進發。
利用青春18移動,
途中經過東北,
順便旅行埋。

聽日第一站係福島縣~

唔好聽到福鳥縣就驚先得,
福島縣都好大下。

上圖下方兩個圈就係小弟住緊o既川崎,
同埋日本o既首都東京,
小弟o既目的地係会津若松,
而大家最關心o既福島,
就係打左星星嗰個地方。

睇落好似好近咁,
但其距離会津若松差唔多成百公里遠,
再加上受幅射影響o既係核電廠o既西南面,
所以唔係好關事。

老子話冇事就冇事啦!!!

秋葉原+鷲宮神社土師祭xらき☆すた

黎左關東咁耐,
對於一個呀宅黎講,
有一個地方唔去,
始終唔係好聚財,
唔洗講出口,
大家都估到係咩地方。

琴日同日文老師講話今日會去秋葉原,
(註: 小弟而家住係前日文老師屋企)
佢反而奇怪小弟點解唔係日日去......
(老師都知道小弟鐘意動漫)

後日就要離開關東北上尋歡(誤)
而家唔去仲要等幾時。



食過Brunch就出門口喇。
對上一次去秋葉原係兩年前,
自己一條拎七日東京遊時,
分別逛左一個下午同一個上午。

當時秋葉原駅仲裝修緊,
今日去到已經裝修好晒靚一靚,
同兩年前唔同晒,
小弟連邊個出口出都唔認得=.=

筷子

近排係日本人屋企住,
所以生活文化上o既衝擊亦都多左。
(話就話衝擊, 其實並唔係咁激烈o既事)
其中一樣最明顯o既就係食野時o既禮儀。

唔知係小弟冇家教丫定係日本人比較麻煩喇,
一野俾人指出三四樣日本餐桌禮儀黎講冇禮貌o既事情......

基本上o既餐桌禮儀同中國都差唔多,
不過比起中國, 日本人拘泥o既野更多,
而當中有好多唔做得o既事,
都係以「箸」命名, 日本「箸」(HASHI)即係筷子。
日本人餐桌上唔做得o既事有以下(選錄)