北海道 (神仙沼 + 神威岬 + 島武意海岸)

平時農場工作都只係七點起身,
但今日晨早流流六點就起身食早餐,
一行四人七點就出門口去旅行。
(小弟、Y先生[台灣, 男]、A小姐[台灣, 女]、FA小姐[北海道, 女])

上圖紅色星星就係小弟工作o既牧場,
第一個景點就係最近嗰個紅色圈---神仙沼。

天氣唔係咁好,
不過天文台話早上只係多雲,
下午會放晴, 所以琴日先會租車, 進行呢兩日o既旅行。

開車o既係Y先生,
佢有台灣車牌,
然後黎台灣之前俾左200台幣轉左個日本車牌。

日本車絕大多數都有自動導航,
只要閣下識日文, 又冇set錯地點的話,
機本上好難會走錯路。
不過小弟一行人就犯左後者o既錯,
於是唔洗一個鐘o既路程,
結果行左個半鐘=.=

ANYWAY,
成功到達神仙沼。
叫得「沼」都知係一個濕地,
個名有「神仙」, 好似係威係勢咁,
但實際上呢個沼冇乜歷史, 亦都冇乜神話傳說。

沿木板路行,
十分鐘左右就會到達濕地o既範圍。

因為神仙沼係山上,
再加上北海道已經轉涼有一個星期有多,
所以山上已經開始有植物轉黃、轉紅。

走左十五分鐘,
終於到逹公園o既主角---神仙沼。
誠如上圖, 同下幾張圖所見,
只係山上面一個比較大o既水氹=.=

其實睇唔係話唔好睇,
只不過係冇乜啲impact o既selling point啫。
但到左直正紅葉o既季節的話,
一定會好好睇,
所以小弟同Y先生都不約而同,
話十月底有機會的話再黎多次。

行番出去之前,
再去多個地方, 叫「長沼」
都係同一個公園o既範圍,
不過因為距離較遠, 要行多廿分鐘,
所以冇乜人去。
反正小弟一行人都唔急,
所以大家都慢慢行, 睇埋先走。

長沼。
都係話, 只係山上o既一個大水氹,
不過旁邊o既草屏都幾靚。

啲草都幾長,
不過唔知係咪因為大風同積雪o既關係,
全部都瞓低晒,
好似黃色綠色o既流水咁。

臨走之前再去展望台睇。
下圖係上圖o既close up。
下圖見到尖出黎o既就係下一個景點---神威岬。

途中見到狐狸仔,
當然唔放過機會影番張啦。
不過警介心超高,
小弟行一步佢就跑幾步,
如果將鏡頭拉到最長,
都只係影到上圖咁樣。

係神威岬停左車,
先到旁邊o既賣店行個圈。

入面有款叫「積丹BLUE」o既雪糕。
(「積丹」為神威岬所在o既半島名稱)

叫「積丹BLUE」, 都唔知乜叉味,
不過有細字寫住「あっさりミント味」, 即係淡薄荷味。
的確薄荷味唔係好重,
不過好香牛奶味, 小弟從來冇食過咁香牛奶味o既雪糕!

食完雪糕睇完手信,
就正式步入神威岬喇。
日文o既「岬」, 係指岸邊陸地尖出o既部份,
正如頭先神仙沼展望台所見,
神威岬就係尖出海o既部份。

神威岬入口,
上面寫有女人禁地。
旁邊o既路牌話以前神威岬唔俾女人入,
不過冇講點解。

上wiki睇, 話以前北海道日高地區首長個女CHARENKA,
因為傾慕平案時代武將源經義,
於是追隨源經義一行人黎到此地。
不過當知道源經義已經乘船遠去,
於是投海殉情, 成為「神威岩」。
從此之後, 因為CHARENKA o既妒忌心,
所有係度出海o既女人都會翻船浸死。
(女人真係恐怖......)
於是神威岬就成為女人禁地。

當然, 而家就冇呢支歌仔唱啦,
而A小姐同FA小姐亦都毫不猶豫咁就走左入去。

因為山泥鬆動o既關係,
道路封閉, 唔可以到達最尖尖o既燈塔......

上圖係神威岬東面o既海岸。
見到有兩個洞, 其中一個叫「念佛tunnel」。

大正元年, 負責神威岬燈塔o既塔長夫人同次子去買野。
要到神威岬燈塔就要經過呢個海岸,
但當年道路未完備, 行經呢個海岸十分危險。
塔長夫人同次子就係係呢道俾海浪沖走浸死。
為免悲劇重演, 於是決定開通隧道。
不過因為當年科技未發達, 而且係用人手掘,
兩邊隧道未能匯合而工程一度中斷。
後來村民又念經、又敲鐘,
工人憑住念經、敲鐘o既聲音搜尋方向,
最後隧道得以完工。
所以叫隧道叫念佛tunnel。
不過而家隧道已經封閉, 唔可以通行。

上圖係神威岬西面o既海岸。

係岬o既後方,
有一個展望台,
可以欣賞整個神威岬。

睇完神威岬,
下一站就係冇幾遠o既島武意海岸。

未出隧道, 就已經見到藍藍o既海。

可以由展望台行樓梯落去海邊,
不過落差有成差唔多100米,
落都還好, 陣間番上黎就真係HIHI喇......

可以見到個海真係好清!

睇左咁多張相, 大家都有印象有一塊比較高大o既石。
兜去海岸o既東面,
有一個比較窄o既海峽水比較淺,
如果水再退多少少應該可以過到去......
可惜就算有竹杆輔助, 小弟都唔敢搏,
因為啲陣風真係好急, 可以吹到人企唔隱,
莫講話跳上去啲細過鬼o既石頭=.=

睇完島武意海岸之後,
時間都已經差唔多兩點,
係時候醫飽個肚, 然後回程。

求其係島武意海岸隧道口o既店食。
叫左個三色丼(1200yen), 分別有いくら、たらこ同海膽......

......賣相唔錯,
不過應該係小弟食過最唔抵o既一餐......
唔係因為分量少,
而係真心的唔好食......

いくら(大粒魚子)竟然可以冇味,
海膽唔甘甜, 最神奇o既係,
連たくあん酸蘿蔔(黃色物體)都可以冇味!!!!!!

同行三人點o既其他食物亦唔見得好食=.=

食完三點幾, 係時候回程還車。
時間係早, 不過由呢度到還車o既俱知安要三個鐘車程.....

今日去o既景點, 全部都有巴士去,
不過要搭JR, 再轉巴士。
去一個景點,
要幾個鐘之餘, 車錢都要幾千yen,
而家咁樣一架五人車租24小時,
計埋油錢都只不過係11000yen左右,
除番每人都只係二千幾yen,
平過自己搭車之餘又唔洗check班次等車,
實在係物超所值。
於是大家都好興致勃勃咁話下星期再租車去玩!



題外話,
今日再黎多左個台灣人,
女性、三十一歲。
於是, 呢個WWOOF o既華人對日本人比例去到4:4......