魷日記: 一路向北第一日 --- 福島 (鶴ヶ城[会津若松城] + 栄螺堂)

為左搭早上0623開出o既JR,
晨早流流0500就爬左起身。
梳洗完, 做埋最後o既執搭,
就正式離開呢個住左三個星期o既兩層樓房。

搭第一班o既巴士(0538)到川崎駅,
時間都只不過係0555左右......
預早左, 不過唔緊要,
見有車就搭。

話晒都搭過N咁多次JR,
就算唔跟check好左o既時間表,
都知道點樣搭唔會搭錯。

最重要o既係,
東京圈內o既鐵路,
幾乎日日都有人身事故,
唔係飲醉酒跌落路軌就係自殺,
只不過東京有N咁多條鐵路,
睇下中唔串你要搭嗰條。

基於以上原因,
都係盡早離開首都圈比較隱陣。
小弟今日去o既地方(其實成個東北都係)比較隔涉,
有啲冬瓜豆腐延誤左一班車,
除時要等多幾個鐘先有下一班......

川崎-->上野-->宇都宮-->黑磯->郡山-->会津若松
搭左六個鐘, 終於到達終點---福島縣o既会津若松
時間已經係1152
不過之後又要搭1621 o既車到山形,
所以事實上得四4個小時左右o既觀光時間。

会津若松比較隔涉,
今日又係閒日,
再加上核幅射o既陰霾,
小弟仲諗住列車會好少人,
點知又比小弟想象中o既多,
都有八成滿。

到左会津若松駅,
未出閘已經見到月台有好多佈置,
以JR車站黎講比較少見有咁多佈置。

あかべこ,
係舊時o既玩具,
紅色o既木造牛形物,
頭部懸掛於中間,
稍有郁動, 頭部就會搖動。
當然啦, 作為玩具o既あかべこ唔會咁大隻=.=

鶴ヶ城o既Q版造型,
一啲都唔Q

車站前o既白虎隊造型雕像
(陣間會再講咩係白虎隊)

係車站o既coin locker放低全身o既行里,
只係帶住部好拍擋單反,
就去買会津若松週遊巴士pass喇(500yen)。
週遊巴士車費均一, 一程200yen,
小弟會去兩個景點,
即係要搭三次, 已經回到本,
再加上用pass, 好多景點都有discount,
所以買左實冇死。

週遊巴士有兩種,
紅色o既順時針行,
逢15分、45分由車站開出,
而綠色o既則反方向行,
逢00分、30分由車站開出。

小弟之前plan行程check路線,
本來係想搭綠色巴士,
先到鶴ヶ城慢慢睇。
不過放完行里啱啱走左班綠色。
時間就係金錢,
衡量過之後,
決定搭紅色巴士,
先到飯岡山參觀。

飯岡山主要有兩樣野睇,
第一係同白虎隊有關o既,
第二就係栄螺堂。

不過話得係山,
就算唔係高, 都要爬若干階級上去......

如果閣下係懶骨頭的話,
可以利用上圖右手邊o既扶手電梯登山。
不過老實講,
小弟只係用左唔夠一分鐘就跑完, 加埋都唔知有冇二百級o既樓梯,
係咪真係有必要俾250yen去搭扶手電梯=.=
樓梯o既左手邊係白虎隊紀念館,
不過小弟今日行程趕急,
唔得閒入去慢慢睇。

樓梯o既盡頭就係白虎隊o既墓地。
講左咁耐白虎隊,
究竟咩係白虎隊?

幕府末期,
(幕府即係混亂o既戰國統一後,
由將軍統治國家o既政府型式)
尊皇攘夷o既運動開始(同中國o既”尊皇攘夷一樣意思),
新政府軍同幕府o既蕃主展開戰爭,
呢個時期就係新撰組登上歷舞台o既時期。
最後新政府軍勝利, 統一全日本,
尊o既皇就係日本天皇,
從此, 明治時代開始, 日本步向現代化。

歷史背景講完,
咁咩係白虎隊=.=

新政府軍打到去東北,
会津若松o既鶴ヶ城就係其中一個激戰o既地方。
當時o既城主松平容保一早預左會開戰,
所以徵召左啲十六七歲o既少年入伍,
組成朱雀、玄武、青龍、白虎四支特攻隊。

其中白虎隊表現英勇,
不過作戰到飯岡山時,
見到鶴ヶ城起火,
以為鶴ヶ城已被攻下。
當時o既人注重武士道,
於是白虎隊一眾十零人,
係飯岡山自刃殉城。

附帶一提,
最後其實松平容保係見打唔過新政府軍,
於是開城投降的=.=

ANYWAY,
啲人覺得白虎隊眾人年紀雖小,
但作戰英勇, 又壯烈殉城,
為左紀念佢地地, 於是又立墓碑,
又起博物館咁。

白虎隊墓碑

沿路行入山就係白虎隊隊員自刃o既地方,
不過基於時間問題, 小弟冇行入去。

落山經過栄螺(サザエ)堂。
サザエ(SAZAE), 即海螺,
因為呢座塔似海螺,
所以以此命名。

其實呢座塔唔算太長歷史,
係江戸時代建成,
不過因其獨有o既大膽設計,
因此而聞名。

呢座塔唔只外面睇,
七歪八倒奇奇怪怪,
入面都係呈螺旋形,
沿路兜下兜下上到頂,
然後轉轉下落番黎,
都係一條路過,
但路係唔會重複。

其實諗真下, 都唔係啲咩好驚訝o既設計,
只係從來冇人咁起,
亦都唔知起黎有乜謂啫。

入口

栄螺堂入面o既路。

其實只係一直咁兜圈上去。

通過塔o既軸心望過對面,
會見到另一條路,
如果係向上緊的話,
對面望到o既就係向下o既路,
the vice versa。

然後下圖就係最頂頂,
由上行變下行o既接駁位。

行完=.=
400yen就咁冇左......
係就係幾過隱o既,
不過400yen就真係稍為唔太值。

其實会津若松都仲有其他唔少o既景點,
例如上圖o既武家屋敷。
睇落好似幾大咁, 應該多野睇過松江嗰個,
不過小弟今日實在係唔夠時間。

趕下一班車到鶴ヶ城。

鶴ヶ城, 又叫会津若松城。
咁係因為幕府倒台, 新政府登記時,
將呢個城登記做若松城。
但一般人都係叫番做鶴ヶ城。

鶴ヶ城轉過好多次手,
其中比較出名o既係仙台出身o既獨眼龍---伊達政宗。
而比較有名o既戰役,
就係頭先不斷講,
幕府軍同新政府軍o既攻防戰。

又係啦經歷過地震、
戰爭、火災、廢城令等,
最初o既鶴ヶ城只留下石垣,
而其他o既全部都係重建復原的。