一路向北 第二日 --- 山形 (上山城 + 蔵王お釜)

琴晚點幾鐘先瞓,
但今朝又要0700起身。
用盡九牛之虎之力爬起身,
梳洗完check out,
不過行里仲可以寄存。

今日o既第一站,
係位於山形縣及宮城縣邊界o既
蔵王山火山口湖---お釜(OKAMA)

先由山形駅搭巴士到蔵王溫泉區(980yen),
然後搭纜車上山頂,
再行大半個鐘至一個鐘就到。

途中巴士經過o既大鳥居

蔵王巴士總站

搭左50分鐘巴士,

落車再行十分鐘就到纜車站。
要注要o既係,
蔵王溫泉區有三個纜車站,
但上o既山頂都唔同,
千祈唔好搭錯。

而家仲算係夏天,
所以冇乜特別,
但到左冬天,
就有非常特別o既「樹冰」睇。

唔係普通積左雪o既樹,
而係因為冬天西伯利亞o既濕空氣吹過黎,
黎到呢一個區域急速冷卻於樹身上,
所以形狀同一般積左雪o既樹唔同,
奇形怪狀乜都有。
而坐纜車睇冰樹係一個非常佳o既算擇。


唔講咁多,
去買纜車飛先。
・
・
・
・
・
・
・
・
・
・
・
・
・
・
・
・
・
・
・
・
・
運休!!!


%$^*#&%$*%&@(#%(

3/9-12/9 点検, 運休
點解之前上網check唔覺佢有講架!?!?!?!?!?!?

去問清楚啲,
三條纜車線得一條運行緊,
但如果搭嗰條線的話,
行過去お釜淨係單程都要4個鐘!!!!!!

行幾多個鐘唔係問題,
問題係其他行程同埋列車o既班次!!!

去遊客中心問,
如果租的士去,
單程8000yen......
來回16000yen你唔好去搶!

於是, 到左打情報戰o既時候喇。
記得之前plan行程時,
仲有一個方法可以去到お釜,
就係由かみのやま温泉駅搭免費巴士上去。
你會話, 點解一早唔用呢個路徑上山。

......咁小弟想搭纜車,
上到山行山, 沿途睇下風景嘛......

講番番黎,
問題係一日得兩班,
仲要因為唔採用呢個路徑所以唔知佢幾點開車。

花左半個小時,
用手機check資料,
同埋仲要諗埋之後啲行程o既安排。

叮, 搞掂。
講好似好輕鬆,
事實上個腦轉到爆左=.=



先搭番車落山形駅,
咁就無啦啦來回唔見左2000yen......

到旅館取回行里,
時間已經係1040
然後要去かみのやま温泉駅,
不過下一班JR要差唔多中午先有,
於是決定搭巴士去。

560yen, 1100開出,
1145到達かみのやま温泉駅。
不過去お釜嗰架免費巴士要1325先開出。
有咩做?

かみのやま温泉駅附近有個上山城,
本身因為太細又唔出名,
加上同原先o既行程唔多順路,
所以冇被納入行程內。
估唔到而家用得著=.=
先到上山城消磨一下時間。

琴日經過七日町駅,
今日去上山城時見到十日町郵局。
之前貪得意上網搵過,
好似有由一日町去到十三日町咁上下。
分佈係日本唔同地方,
不過以東北佔比較多。

上山城。
其實真係冇乜好介紹,
因為真係唔出名。,
同佢扯得上關係o既知名武將得伊達政宗,
不過又冇咩大事件or重要戰役發生過,
個城又唔係原本嗰個,
所以真係冇乜睇頭......

入面o既展館都幾新幾靚,
不過實際上有用or值得睇o既展品唔太多......
上到頂樓展望台,
個view又唔係話真係好靚。
(可能小弟上過太多城o既天守=.=)

唯有特別少少o既,
係個城傍邊有個浴足o既池,
That’s all

上山城傍邊仲有個月岡神社,
不過都係冇乜特別。



時間差唔多,
去附近超市買個便當食完,
係時候去等車。

由上山城行番去車站o既時候,
見到上圖呢個神社仔,
係一間洗衣舖o既簷蓬下面
幾得意。


1325上車,
一架廿零座o既中型旅遊巴, 同行o既......
得一對夫婦(三、四十歲左右)......

其實初初唔想用呢架巴士上山,
仲有一個原因,
就係好地地山長水遠,
點解會無啦啦有免費巴士,
不禁令人起疑,
不而家馬死落地行,
冇辦法。

但搭落又真係唔洗錢喎,
又冇乜可疑o既事發生,
個司機仲要幾好人添。



由かみのやま温泉駅搭一個小時,
1430終於到達刈田駐車場。
由嗰度坐吊椅, 再行幾步路就可以到お釜。

不過個問題係勁多雲,
個天勁陰, 擔心除左啲霧之外乜都睇唔到.......

吊椅來回700yen, 聽落好似偏貴,
不過全程長7分鐘,
登山路又只係爛鬼泥石斜路一條,
再加上巴士1530開出, 搭唔到就要係度過夜,
所以都係俾700yen啦~

上到山頂,
都仲係一片迷霧.....

山上o既地蔵菩薩

奇積地,
慢慢接近お釜o既時候,
啲雲都開始散。

終於見到お釜喇!!!

望到咁靚o既景,
即刻覺得今朝早嗰一番折騰o既辛勞都隨風而散!!!

逗留左大半個鐘,
係時候走人喇,
如果唔係, 搭唔到班車,
真係要等到聽日十二點先有車=.=



其實搭呢個吊椅,
有一個有趣o既地方,
就係上到三分之二o既路程時會有個路牌,
由山上向下行時會見到「從這開始是宮城縣」
而由山下向上行時會見到「 從這開始是山形縣 」。
頭先都講過啦,
蔵王山位於兩個縣o既交界,
不過冇諗過咁平平淡淡就跨越左縣境......

一班行山路落山o既小六(推斷)學生&老師。

一路由上巴士開始留意身邊o既野,
開始明白點解會有免費巴士咁好死。
因為呢一帶o既吊椅都係由一間叫LIZA o既公司擁有,
包括頭先小弟坐嗰個吊椅, 同埋加巴士。

而上圖就係途中o既滑雪場設施。

當然,
一來夏天冇雪滑,
二來起左吊椅冇人坐又係運吉的.
所以先有免費巴士。

亦都明白點解吊椅會係偏貴o既700yen。
當你知道其實已經包埋程巴士o既時候,
就真係一啲都唔貴!!!



今日o既行程黎到呢度,
搭JR到仙台, 係仙台逗留一日半。