一路向北 第五日 --- 青森 靈場恐山

五點起身.....晨運都冇咁早......
0530到達弘前駅,
乘搭0545 由弘前到青森o既JR列車。

琴晚黑媽媽都睇唔到駅前面有石像。

太陽伯伯都係啱啱番工冇幾耐咋

0640 到達青森駅,
因為下一班車要0710先開出,
仲有少少時間, 係車站醫肚。

係日本o既主要轉車站,
好多時都會有呢烏冬店、拉麵店。
特色係又平又快手, 不過要企係度食,
好似上圖咁。
小弟黎左日本咁耐, 今次都係第一次幫襯。



食完個烏冬都仲有時間淨,
反正今日係用青春18,
何以無限出入閘,
於是出外面影番張青森駅o既相。

青森縣o既鐵路有一樣野比較特別,
就係無啦啦係最東北面有一條JR o既線路---大湊線(下圖啡色),
但呢條大湊線冇其他JR連接,
只有靠一條私鐵---青い森鉄道(藍色),
連接大湊線到青森或八戸。
於是要用鐵路上到最本州東北的話,
就必雖然搭呢條私鐵線。

但經過之前九州旅行o既教訓,
(http://japsleevefish.blogspot.hk/2012/07/blog-post_20.html
Ctrl + F : 肥薩線)
小弟知道青春18係唔可以用係私鐵,
就算係係JR駅內出發o既私鐵都唔得。

本身都預左要另外買飛搭青い森鉄道,
一來一回2000yen架喇。
不過多口向站長問多句,
結果得知一個重要消息。就係:

只要唔係青い森鉄道中途出入閘,
就可以用青春18搭青い森鉄道接駁大湊線。
反正小弟係要去下北半島(上圖釜頭形半島), 唔會中途落車,
於是唔洗另外買飛, 直接搭青い森鉄道到野辺地接駁JR大湊線。

青い森鉄道, 相信連日本人都唔會太多人搭過。

本身由離開仙台開始,
一路山由JR望出去o既,
都只係得番農田。
而家搭青い森鉄道,
望出去, 途左草之外都係草......
間唔中先有幾戶人家。

上圖係大湊線途中望過對面岸。

由弘前起計,

坐左三個鐘火車,
總於到達本州JR線路尾最北尾二嗰個站---下北!!!!!!
(最尾嗰個站係大湊)

0855到達,
開往靈場恐山o既巴士0900開出。
基本上班次少o既窮鄉辟壤,
巴士o既班次好多時都係配合番鐵路到站o既時間。



巴士路程約45分鐘。
離開下北市開始車內有廣播介紹恐山,
不過小弟日文又唔係好,
加上播音質數比較差,
所以聽唔到佢講咩=.=

差唔多到總站前,
有一個叫「冷水」o既站,
叫做係一個景點。
巴士司機會好識做咁係度停車,
俾大家落去飲兩口水。

相傳係開山祖師慈覺大師經過時有水湧出黎。
有傳話飲左呢啲水會不老不死=.=
ANYWAY, 啲水又幾清涼幾好飲o既。

離開冷, 繼續向恐山進發。
雖然仲係山林之中, 同埋身在巴士內,
但已經開始聞到陣陣硫黃味。



見到一個好大好靚o既湖,
就係到達靈場恐山o既証明。

到達巴士總站,
再行前少少就係靈場恐山入口。
不過入去之前,
先行番轉頭先欣賞一下咁靚o既湖,
同埋睇下頭先嗰條紅色o既橋係咩一回事。

今日真係好天得交關,
因此湖水都映照得特別靚。



可能因為混有硫黃,
所以唔係好覺水入面有生物。
又因為有硫黃, 所以池底顯得特別白。

細心啲睇,

唔難見到池底有好多泉眼,
有氣泡同水湧出(上、下圖)。

不過太白, 所以唔係好睇到。

個湖叫宇曾利山湖。
諗真啲, 其實「宇曾利山」係咪即係「恐山」o既日文諧音?

頭先條紅色橋,
行過去先~

行過去之後會月見到奪衣婆同懸衣翁...
即係話頭先小弟橫過o既係..........

小弟啱啱橫過o既, 係「現界」同「彼岸」o既分水嶺, 三途河......
噢, 小弟已經........
不過未飲孟婆湯, 仲有得救!

有關「奪衣婆」同「懸衣翁」o既典故,
大家可以睇番琴日嗰篇BLOG, 講「姥堂」嗰一段。
( http://japsleevefish.blogspot.hk/2012/09/blog-post_7.html
Ctrl + F : 姥堂 )

襯未被迫飲孟婆湯,
嗱嗱聲番轉頭參觀靈場恐山先。

黃色o既流水,
好重硫黃味......

靈場恐山, 真正名稱叫恐山菩提寺。
由一千二百年前o既僧人慈覺大師所開創。
話慈覺大師係中國修行o既時候,
發夢受到指引,
所以番到日本, 黎到呢個咁山卡啦o既地方創立廟宇。



恐山因為地殼運動, 地形詭異,
又因為長期有硫黃流出 / 噴出,
所以有一大片地方都了無生機,
好似死域一樣。
因此自古以黎,
日本人都覺得恐山同靈魂、地獄等等神化野有關係。

而小弟黎恐山,
都係想睇下呢個獨特o既地貌多於睇廟。

入口旁o既六大地蔵。

入山費500yen

過左總門, 會見到上圖o既山門

上圖係山門,
而下圖係山門前o既一個地蔵。

奧之院

奧之院前面o既兩翼有幾間木屋仔,
係有溫泉水可以浸浴,
不過小弟冇準備到,
就算一早知都唔打算浸。

參拜前洗手o既地方,
旁邊有一頭奇特o既石龜。
雕功好精細,
連龜皮o既紋都清晰可見。

奧之院

睇完奧之院之後,
旁邊就係真真正正o既靈場喇~

唔算係啲咩絕壁千里呀、高崖萬丈,
但亦叫人倒抽一口涼氣。

但唔好抽咁大啖,
好重硫黃味,
除時濁親......

上圖右手邊有一條小路通向不動明王尊,
姑且去睇下。

見到旁邊o既石堆不斷冒煙

由高處回望呢片死地

睇到咁特別o既環境,
都冇乜心機睇佛像喇。

又係啲日本人o既習慣啦,
見位就會攝硬弊。
不過因為旁邊就係硫黃蒸氣口,
所以啲硬弊都硫化晒變晒黑色。

無間地獄。
佛經入面, 無間地獄係八大地獄之最,
意思為無間斷遭受痛苦。

《無間道》大家睇得多喇,
又有幾多人記得「無間道」呢個term係出自佛經?
「受身無間者永遠不死，去壽長乃無間地獄中之大劫。」



其實死山入面仲有幾個地獄,
不過以小弟所見,
其實都係求其安個名落去。

風車,
如果小弟冇記錯,
係有輪迴之意。

要睇路行,
因為地面又淺色,
湧出黎o既泉水又係淺色,
踩到成腳濕晒都唔知咩事。

塩屋地獄

右手邊嗰塊石明顯地積左好多鹽晶同硫黃

唔洗講到估到個觀音像梗係用金屬做......
不過變到咁o既藍色, 又幾靚。

一啲都唔血腥o既血池地獄

上圖呢片地有硫黃泉水同埋山水流經,
所以五顏六色。



靈場旁邊連接宇曾利山湖。
可以清楚見到湖底因為硫黃而造成o既顏色。

下圖係上圖修羅王地獄o既close up,
不過因為圍欄圍得大遠,
所以影唔到啲乜,
但洞入面一直傳黎咕嚕咕嚕o既滾水聲。

初初小弟以為只係細細一個地方,
有幾個石山咁上下,
點知靈場恐山意外地比想像中大,
行下又影下相, 又睇下啲石呀、礦物呀咁,
足足行左成兩個鐘......

雖然係咁,
第一班由恐山番下北駅o既車要1300先有......
算啦, 呢啲超級山卡啦,
一日有四班車都偷笑......

仲有時間,
恐山唯一一間食店,
求其食左個山菜蕎麦醫肚。

打算用手機check野o既時候,
連接唔到!?

驀然發現, 原來係「圈外」,(最左上角字樣)
即係冇訊號=.=
小弟黎左日本咁耐,
唔計地下鐵入面與站之間o既隧道,
真真正正第一次見到「圈外」!!!!!!
(富士山山頂都有兩格囉=.=)
可見恐山真係有幾山卡啦。

臨走前, 見到雪糕檔。
有兩件事令小弟很在意,
吸引小弟買黎食:

1) 「合掌靈場雪糕」?  點樣合掌法?
係食之前合掌? 食完之後合掌?
定係食完之後, 人地對你合掌=.=
阿彌陀佛  ( -人- )

2) 右手邊綠色牌寫住
「ヨモギアイス　良薬は口に苦しと諺あり」
(譯:「艾蒿雪糕   俗語有云苦口良藥」)
本住食完之後真係會俾親朋戚友合掌o既決心,
買左一個黎試, 250yen又唔算貴。

其實苦又唔係好苦,
亦都唔係話太難食,
要形容的話,
味道有啲似......綠墊香口膠

同埋, 其實都唔係雪糕黎o既,
正確黎講係雪芭。

1300, 搭巴士走。



1345就到下北駅,
下一班JR要1408先到。

頭先講過,
下北駅係尾二嗰個站。
因為一來想見識下最尾嗰個站,
二來勁多人等車,
坐到頭車比較隱陣,
於是坐1355 o既列車到尾站---大湊。
都係嗰句啦, 反正青春18任出入閘。

因為係日本本州最北端o既一個站 (註),
所以站前掛有「てっぺんの終着駅」 (最頂端終站)

註: 其實大湊駅緯度比下北駅稍南少少,
不過呢少少就唔好計較啦。



又再搭番三個鐘車番弘前。
時間只係五點幾,
不過話晒都連續兩日早起身,
仲要兩日都係行山,
所以今日去完恐山就算喇。



聽日睇埋弘城,
就正式離開本州,
向北海道o既函館出發!



附帶一提, 真係超級好采。
番到旅館睇天氣報告,
話聽日下北一帶會有大霧、大浪同埋大雨=.=