WWOOF第十四日 --- 新見溫泉

今日又有新o既工作

屋主渣車帶我地到~400m外o既農地,
係一片稻田o既遺跡。
稻米已經打好, 稻草亦都已經割左落黎,
紥好左一紥紥。

要做o既野,
就係將啲紥好左o既稻草堆埋一堆放好,
然後會有人黎收。

聽落好似好輕鬆,
不過重覆又重覆之後,
都真係幾攰下.......



1700做完收工,
唔知挑起邊條根,
屋主話帶我地去浸溫泉,
於是執好要換o既衫就坐車出發喇。

無無聊影下相。
上圖係兩個台灣人,
Y先生同A小姐。

沿路兩傍, 除左綠色之外都仲係綠色。

遠處出晒煙,
都係啲農場係度燒稻草。

黎到 新見 o既溫泉旅館,
不過呢啲咁偏遠又冇乜人到o既地方,
都唔好期望啲設施會好靚。

因為太偏遠冇人到o既關係,
難得可以影下個澡堂係點o既樣。

上圖個裸男就係屋主,
本身冇諗住影佢,
不過佢咁啱企起身=.=

咁鄉下o既溫泉館,
係咁上下架喇。
個浴池啲水係溫泉水。

出水o既地方,
可以見到啲礦物o既結晶(白色一舊舊嗰啲)



回程o既時候,
天已經黑晒,
街燈都冇盞,
所以車速都唔可以太快。

途中亦見到小物過馬路,
先係見到兩隻狸貓,
然後又見到一隻小狐狸, 超可愛。
不過想落車影佢相o既時候就已經走左......