魷日記: 秋葉原+鷲宮神社土師祭xらき☆すた

黎左關東咁耐,
對於一個呀宅黎講,
有一個地方唔去,
始終唔係好聚財,
唔洗講出口,
大家都估到係咩地方。

琴日同日文老師講話今日會去秋葉原,
(註: 小弟而家住係前日文老師屋企)
佢反而奇怪小弟點解唔係日日去......
(老師都知道小弟鐘意動漫)

後日就要離開關東北上尋歡(誤)
而家唔去仲要等幾時。

食過Brunch就出門口喇。
對上一次去秋葉原係兩年前,
自己一條拎七日東京遊時,
分別逛左一個下午同一個上午。

當時秋葉原駅仲裝修緊,
今日去到已經裝修好晒靚一靚,
同兩年前唔同晒,
小弟連邊個出口出都唔認得=.=

好多呀宅頭一兩次黎到秋葉原,
總係會表現得興奮雀躍。
其實唔係淨係外國o既呀宅先係咁......
係身後, 有兩個同小弟一齊步出車站o既日本人,
其中一個一出車站就用頗大o既聲量講
「終於黎到秋葉原喇! 呢度就係秋葉原嗱! 超勁!」
佢朋友就同佢講
「啱啱出車站啫, 唔洗咁激動, 冷靜啲」

小弟不禁莞爾www

不過後來小弟都嚇左一跳。
唔係因為黎到秋葉原,
話晒今次都係第三次黎,
之前又去過コミケ同ASL, 已經冇乜野好嚇。
嚇一跳係因為變化太大喇!
車站唔在話下,
ラジオ会館成幢唔見左!?

原來重建,
於是啲店舖暫時分布係兩幢細o既大廈入面......
舖頭好似少左好多咁......

小弟雖然鐘意動漫,
但係係唔會亂晒野o既窮拎一條,
所以今日都係行下睇下算。

等身大o既綾波レイ。

《ああっ女神さまっ》三女神

山口式EVA劇場版各款機,
又靚又唔係貴。

逛完ラジオ会館之後行animate。
其實animate周圍都有,
不過始終係秋葉原比較齊貨。

F/Z o既咖啡。
本來想買的,
不過現階段唔想增加行里o既負擔,
所以都係算啦......

行完animate同とらのあな後,
再逛下小巷o既店。

竟然開左一間大o既動漫商品店,
唔知開左幾耐,
但睇裝修好似幾新,
起碼小弟未聽過間野個名。
間野叫「KOTOBUKIYA」,
話係九州最大型o既動漫商品店。

臨走時到下圖o既店逛下。
其實小弟初初係唔知秋葉原有啲呢店,
唔係《俺いも》有提, 小弟都唔會留意到。

係咩店?

睇外面好似正正常常咁,
其實係「好孩子唔可以入」o既店......

樓高六層, 加地庫一層,
全部都係賣啲大人先買得o既野。
書刊、視頻、用品、服飾。
林羅滿目, 應有盡有, 諗唔到o既都有,
見其貌而不知其用途o既都著實係唔少=.=

淨係落地庫o既視頻樓層已經非常震撼!!!
放係唔同角落o既螢幕, 播住唔同o既trailer,
震耳欲聾o既不同聲音交錯:
人o既叫聲、機器震動o既低頻波、皮鞭抽打聲、流水聲.....
聲聲入耳=.=

而上面六層o既商品, 亦令人大開眼界。
當然, 小弟唔影得入面啲相,
影左都放唔到出黎啦。

切切實實地感受到日本人對性有幾開放。
店入面廿歲左右o既又有,
上左年紀o既又有,
單身一個女仔又有,
拍住拖逛都有。

仲要其實唔只得呢一幢......

算啦,
小弟都係逛下啫,
一來冇錢買,
二來買左都都只係增加行里,
所以兜左個圈就走人喇。

時間係四點半左右,
其實一直都掙扎緊去唔去崎玉縣個祭典好。
如果有睇開小弟個BLOG而又好記性的話,
(應該都冇=.=)
上星期26/8, 小弟去ASL之前去左鷲宮神社,
講起有個土師祭。
http://japsleevefish.blogspot.hk/2012/08/blog-post_27.html

基於由川崎一來一回都成二千幾yen,
所以一直都諗緊去唔去好。
不過見反正都出左黎秋葉原咯,
唔差在過埋去埼玉縣啦~
(其實都幾遠......)

就咁,
小弟又再次搭上東北線往久喜,
再轉東武到鷲宮駅。
到達o既時候已經係1800左右......

上次都講過,
未出閘時會見到個《らき☆すた》o既神輿,
不過今日到埗o既時候,
已經唔見左!!!

唔奇丫,
因為今晚土師祭會用到嘛。

一出閘,
就見到有個平時冇o既攤檔,
原來係賣らき☆すた新聞,
見只係300yen,
平平地(以日本物價)買份睇下。

平時鷲宮呢個小區仔,
鬼影都唔多隻,
但今日明顯多左好多人,
而且人人朝著那方向, 心中帶著笑。

燈柱啲旗仔都換過晒啲新o既,
上次甩晒色o既旗仔已不複見。

勁多人

都係同一個縣(埼玉), 但隔離市---秩父市o既代表動畫《あの花》都黎分一杯羮。
不過點解有「東方」o既野!?(下圖)

上圖白衫黑字o既人就係負責抬らき☆すた神輿o既勇士

已經見到鷲宮神社

下兩張圖係帶頭巡遊o既開路車o既裝飾

其實本應らき☆すた並唔係主角,
主角係鷲宮神社入面,
關東第一o既千貫神輿。
(係呀宅眼中當然番轉啦)
「千貫」係指個神輿重到HIHI。

而上圖就係平日存放係東武鷲宮駅入面o既らき☆すた神輿。
想成為らき☆すた神輿o既抬輿人,
就要係八月中旬o既招募報名。

其實係神輿傍邊仲有一個攤檔仔,
係《らき☆すた≒おん☆すて》o既聲優有簽名握手會,
不過可能因為已經到尾聲,
加上眾人o既注意力放晒係個神輿度,
所以只見有一兩個人排隊等「握手」。

你話搵到動畫版o既聲優黎又唔同講法!!!