魷日記: 北海道 (有珠山 + 登別地獄谷)

今日係星期日,
又係旅行o既日子喇。

今日風和日麗,
絕對係出門o既好日子。
0630就出發, 早過輪米......
今日去兩個地方,
第一個地方......又係洞爺湖附近......

目的地係兩個火山, 叫「昭和新山」同「有珠山」,
不過途中經過洞爺湖o既公園,
於是落一落車睇下。

藝術o既野真係睇唔明,
無啦啦整個面具係度做乜?

繼續開始往昭和新山進發。

下幾張圖嗰個矮矮地, 好似個蕃薯咁o既山,
就係昭和新山喇,
可以見到仲冒緊煙。

上圖o既牌介紹昭和新山o既歷史。
呢個山特別在唔係一下子就爆出黎,
而係慢慢逐步成長。
昭和18年年尾之前, 呢一帶本來係一片平坦o既麥田,
不過隨住頻繁o既地震, 地面突然開始隆起,
到左第二年o既4月已經升高左50m。
到左6月底, 升起左o既地面, 有七個地方開始噴出溶岩。
同時間, 地震仍然不斷, 四個月間地表就隆起左300m。
11月開始, 以噴火口為中心o既地方再一步被推高至470m。
到第二年o既9月, 火山運動停止。
好似話呢一種方法形成o既火山非常罕見咁話。

另外不得不提一個叫三松正夫o既人。
因為當年正值二戰,
新聞報導以致學術研究都被規管,
而當年昭和新山o既形成就列為機密(點解=.=)
好采當地郵局局長三松正夫詳細地紀錄左造山運動o既詳細過程,
成為後來研究昭和新山o既重要資料,
而其中之一o既就係上圖右下角o既「三松diagram」,
描繪左昭和新山o既地形。

當然唔只係睇呢舊蕃薯火山啦,
之後一行人就到對面o既有珠火山遊覽。

臨過去之前望多兩眼個昭和新山。

途中經過玻璃製品館,
入面啲野靚係幾靚,
不過據A小姐講, 小樽嗰啲平啲。

搭吊車上有珠火山,
來回盛惠1450yen......

從吊車站展望台望番落昭和新山

係展望台仲有一張凳放左兩個公仔。
在場有當值工作人員,
工作人員會免費幫大家影相,
大家亦可以交自己o既相機俾工作人員影。

影完之後, 會有一張免費o既名信片, 一人一張,
而另外亦都會晒一張大相, 1000yen一張。
當然大家可以選擇唔要。
小弟雖然五個人, 但冇人願意買嗰張大相,
於是大家就拎住張名信片, 懷住一股罪惡感離開......

上圖就係嗰張名信片, 左下角就係小弟一行五人o既相,
而嗰張1000yen o既大相就係左下角呢一角o既放大版。
其實小弟唔係介意俾1000yen, 只係呢個景唔係話特別靚,
一年前同屋企人去白川鄉, 係展望台影嗰張就買左喇~

認住下圖紅衫o既員工, 就係負責影相嗰位。
(唔係叫你認佢個樣, 而係認佢o既裝扮!!!)

影完相就向有珠山火山口原展望台前進。
下圖就有珠山o既主峰大有珠o既背面。

到達有珠火山口原展望台,
望向火山口原就係下圖o既景象。
背景係太平洋

中間凹左落去, 又出緊煙o既就係火山口湖

係展望台有一牌石枱,
上面刻有各個方向o既山、湖。
不過羊蹄山寫錯字......

一班(仲算係)年青人, 當然唔會止步係展望台。
只見絕大部份遊人都只係係展望台睇完就走,
小弟一行人就沿住火山口原o既遊步道繼續前進。

初初都係落幾級樓梯, 又行一段平路咁o既循環,
不過冇耐就見到上圖o既長命樓梯......
..

落到樓梯底, 有一個「落石注意」o既牌,
不過已經俾「落石」遮到就黎「注意」唔到....

遊步道o既右手邊係火山口原,
而左手邊就係大平洋。

上圖右手邊係大有珠, 左手邊係小有珠。

行左三分二, 會到達公眾廁所,
附近有一個介紹牌,
小弟打住「果然係火山, 連介紹牌都俾火燒焦」o既念頭影左上圖張相,
突然有個呀伯黎搭訕!
原來係當地o既義工, 負責監察有冇山火、有冇遊人唔聽話之餘,
得閒仲會同遊人傾下偈, 做埋導遊嗰份。

呀伯同小弟講, 要影牌的話行前啲都有,
唔洗影呢個咁寒酸o既,
於是就開始傾偈喇。

傾左十分鐘左右, 呀伯先問小弟係邊度黎,
聽到小弟話係香港之後,
呀伯好似做大戲咁向後退左幾步......
原來呀伯一直以為小弟係日本人......

第二次了,
第一次係係鹿兒島櫻島o既觀光巴士上同一對東京夫婦傾偈,
當時對夫婦又係以為小弟係日本人,
三個月後, 由最南到最北, 今次係北海道遇上第二次。

老實講都有啲開心,
不過講真, 同平民講的話都仲有可能,
但如果係同旅遊景點o既職員對話的話,
只要講一句就會露飴, 上次係五陵敦就係咁=.=

再講遠少少,
日本真係有好多啲一類o既義工,
多數都係退左休o既老人家。
咁做, 老人家退左休之後唔會悶之餘,
對旅遊業又有正面幫助, (最緊要係唔洗花錢請人嘛)
某東方之珠係咪應該效法一下呢?

遠處o既羊蹄山。

睇旅遊o既小冊子, 會影到一個好靚o既火山湖,
不過小弟睇到o既, 只係一個乾左塘o既低地......

影唔到火山湖, 唯有打下雀。

大有珠

小有珠

遠處o既山頭已經開始見到少少紅葉,
梗係啦, 而北海道氣溫大概係10-20度, 持續左有個多期......

唔覺唔覺行左已經有兩個鐘......
最攞命係頭先嗰條長命樓梯,
落都已經落到腳軟, 莫講番行番上去,
呢個就係小弟們行左兩個幾鐘, 都只係遇到其餘遊客七個咁大把o既原因......

搭番吊車落山腳,
賣手信o既地方,
當然唔少得以熊為噱頭o既產品。

昭和新山為題材o既煎餅。
見到包裝o既畫咁給力,
令小弟都好有動想買番包試下。

另外吊車站仲有個免費o既乜鬼野噴火體驗室,
可惜趕時間去下一個景點, 唔得閒入去睇。

係吊車站附近有個熊牧場,
收費比較平, 好似係800yen,
不過好似話呢個比較up dup。

時間係1330,
去到下景點, 登別地獄谷o既路程要一個小時,
最遲要1500由登別走人, 如果唔係趕唔1730還車,
即係話只有1.5小時係登別地獄谷活動。
不過好采, A小姐之前黎過,
所以係多條遊步道當中,
毫不猶豫咁就走上正確o既路去到目的地。

一係停車場落車, 已經聞到一陣不比青森恐山遜色o既硫黃味,
而地獄谷o既景像亦都同恐山有幾分似。
初初都諗, 黎左恐山再黎呢度會唔會重覆左,
不過行落就發覺都幾唔同,

恐山:
-有個好靚o既湖
-可以近距離觀賞氣口
-可以自遊係境內走動
-有歷史悠久o既寺廟

登別:
-有好多溫泉流水
-有間歇泉
-有幾個唔同o既景點