北海道 (蘭越 + 神仙沼 + 大湯沼 + 二世古牛奶工場)

話咁快又迎來一日假期,
之前宿主見小弟幾個人又係度PLAN租車去玩,
加上M小姐聽日就走人,
而宿主今日下午又冇乜野做,
於是主動話帶我地去觀光。



因此, 上午就吉左出黎冇野做。
小弟屎忽痕, 見早上冇野做,
於是決定做一樣, 黎左咁耐一直好想做o既事,
就係踩單車由農莊到蘭越車站。
路程一共9.8km......

沿路都冇咩特別,
道路兩邊唔係山就係農田......

踩左3km左右, 就到附近一個公園,
不過如下圖所見, 呢啲山卡啦地方,
都唔會有人, 而公園亦都只係一片草地加個涼亭咁......

再踩就到左車站附近o既尻別川。
(個名係特別啲, 不過「尻」粵語其實係讀「敲」)
好似話係日本百川o既其中一條。

大家見到小弟話「再踩就到左XXX」,
講就輕鬆, 實際上踩到趴係度......
因為全部都係山路, 又上又落,
當然, 上同落o既displacement (位移) 唔會相差好多,
但一路都係逆風, 加上架單車條呔唔夠氣,
結果落斜唔會滑行到好多, 而上斜就辛苦到HIHI......
事實上由農莊到尻別川就用左45分鐘......

已經開始有紅葉。
有紅葉做景o既公園, 對香港人黎講係幾咁奢侈o既事。



踩左差唔多一個鐘,
終於到車站附近,
下圖係蘭越市中心最繁華o既街道=.=
(閣下冇睇錯相, 小弟亦都冇POST錯相)

蘭越最大o既超市。
二樓唔關事, 左邊個門口亦都唔係超市範圍,
入面得四個班房左右咁大。

一日得兩班巴士......
淨係俾人番工放工用。
如果要加班的話......請自備睡袋.......

因為呢一帶都係農場,
所以不乏同農業有關o既商店。

市內兩間便利店o既其中一間。



頭先提過條呔唔夠氣,
於是係市內搵單車舖。
日本有一樣野好,
就係幾乎所有單車舖都會免費幫人打氣。
於是回程就稍為輕鬆少少。

臨回程前睇下個八幡神社先。

春日造、唯一神明造等等o既神社建築模式小弟都見唔少,
但有天線o既小弟都係第一次見......

再經過尻別川o既公園。

公園入面o既golf場......
真係有18個洞架。

好似話呢個公園都係睇紅葉o既好地方,
不過啲樹都未轉色。

呢條係比較近農莊o既一條河,
叫「パンケ目国内川」。
識日文o既朋友都會覺得個名怪怪地,
咁係因為呢條河個名本身係北海道本土o既「愛奴語」發音的。



因為體力o既問題,
回程用左個幾鐘=.=
真係攰到唔郁得......



ANYWAY,
食過午飯,
宿主就帶小弟們到去觀光喇。

第一個目的地------又係「神仙沼」......
不過小弟們係心甘情願咁去的,
因為上次兩星期前去,
樹葉o既顏色都轉左唔少,
兩個星期後o既而家,
應該已經到左睇紅葉o既時期!



途中見到狐狸仔,
可能以為小弟們會俾食物佢,
所以今次呢一隻走得好近。

睇落條尾都真係會幾舒服~



到左神仙沼,
未入到去已經見到路道旁o既樹都轉左顏色。

有關神仙沼詳情唔再重複喇,
看官有興趣o既就睇番兩星期前o既BLOG啦。
http://japsleevefish.blogspot.hk/2012/09/blog-post_30.html

因為勁大風加上落雨o既關係,
有啲相難免會有水點......

下一站係大湯沼,
估到做到, 係一個溫泉區,
而區內亦都係充滿住硫黃o既氣味。

路旁o既出氣口, 勁熱。

遊步道有一段由噴氣做成o既塌陷

因為落雨濕度高,
加上水蒸氣, 跟本咩都睇唔到......

遊步道有一個位(上圖)可以俾大家摸下溫泉水(下圖)。

最後一站黎到二世古o既牛奶工場,
好似小弟個宿主基本上都會帶WWOOFer黎呢一間野。

外面有一大片草地放牛,
不過今日天氣唔好, 所以唔見啲牛。

店o既一邊係買小食。
今餐亞sir請食飯

個飴類似custard, 不過唔太甜,
亦都比較流體, 但好香牛奶味。

窗外o既牧場。

另一邊係賣雪糕,
勁多味:
牛奶原味、抹茶、espresso、草莓、藍莓、朱古力餅乾、
香蕉朱古力、朱古力、紅莓、南瓜、栗子

300yen一杯有兩隻味揀。
第一杯食左抹茶 & espresso。
抹茶話係用靜岡縣上等o既「品水」黎製做咁話,
不過點都好, 小弟鐘意抹茶雪糕, 所以點都會食抹荼味。
至於espresso, 因為呢出名牛奶丫嘛,
現場冇一隻味俾espresso更配牛奶,
於是造就左呢杯日式鴛鴦=.=

食過翻尋味,
第二杯食左紅莓&藍莓。
唔係唔好食, 不過個人喜好,
小弟鐘意紅莓&藍莓食酸少少,
所以對呢杯有少少失望。

臨走影番張。



於是攰到HIHI o既一天就結束喇。
又要諗下星期去邊好=.=