日本巴士經驗談

有啲「事到如今先寫」o既感覺。
不過今日冇乜野好寫,
所以搵啲野寫下。


日本巴士主要分三類 (小弟自已分):
1a) 普通路線巴士 (行番該市內, 或近郊)
1b) 高速巴士 (跨市)
2) 高速巴士 (跨縣)
3) 觀光路線巴士





(1) o既巴士同香港o既巴士一樣啦,
唔洗預約、唔洗訂飛, 見車就上。

(2) o既巴士一般都要預先上網或打電話預約,
付款方法形形式式。
不過亦有少數係唔洗預訂,
有位就俾你上, 叫「乘合巴士」。
(「乘合」, 既係好似普通巴士咁搭, 阿豬阿狗都可以坐上黎o既意思)

而(3)就係啲比較熱門o既旅遊地區,
該地區自己提供, 主要圍繞著名景點行駛o既巴士。



先講下(1)同(3)。
好似好白痴咁,
但請容小弟由點上巴士開始講起。

唔同香港, 日本巴士有好多唔同設計,
不過離唔開一扇門or兩扇門。

唔洗多講, 一扇門嗰啲巴士,
上落車、俾錢都係嗰度門/司機位附近搞掂。
而兩度門的話, 大家就要睇清楚,
到底係前上後落, 定係後上前落!!!

付款o既方法都有好多唔同款式。
最簡單o既係「區間均一」,
即係搭幾多個站都係收同一個價錢。
(京都多數巴士都係區間均一, 220yen)
不過冇香港啲巴士咁, 收得咁狼。

如果係有兩度門的話, 除左留意邊度門上、落車之外
仲要留意係上車時俾錢, 定係落車時俾錢。
(例: 川崎市係上車俾錢; 京都係落車俾錢)
不過都一定係經過司機時俾錢。
如果得一度門的話, 「多數」都係上車時俾錢。

除左付款o既timing之外, 仲有付款方式。
如果唔係「區間均一」的話, 上車要拎「整理券」。
「整理券」係一張印有數字o既紙仔,
越遲上車, number越大。
有整理券o既巴士, 車頭都有電子顯示牌,
顯示各number係該站落車時要俾o既價錢,
number o既大細, 同乘車距離 & 車費係掛勾的,
所以唔會好似香港咁有「越早落車越唔抵」o既情況,
而係「坐幾遠, 俾幾多」。

咁你會問「我鬼知架巴士係區間均一定要整理券呀?」
當然可以係巴士亭度搵到答案啦,
但就算趕住上車, 只要上車時,
望下門口隔黎有冇部機凸張紙仔(整理券)出黎,
有就拎左先算, 冇就「多數」係區間均一。

另外, 遊客最常接觸到o既係儲值卡同pass。
先講儲值卡。
如果係均一區間就唔洗煩, 俾錢時插卡就ok。
但如果唔係的話, 就要上車時先拍卡 / 插卡,
位置都係係整理券部機附近架喇。
然後落車再拍 / 插一次, 搞掂。

如果上車唔記得拎整理券, or 拍 / 插卡,
落車o既時間, 就會當你係由頭搭,
收最貴o既價錢!!!!!!

pass的話最方便,
只要上 or 落車 經過司機時,
show個pass俾司機睇, 或者係插卡就OK。

附帶一提,
日本o既巴士「多數」都可以唱錢。
位置「多數」係車頭司旁邊,
但小心唔好將要唱o既錢放入俾錢嗰個窿XD
(俾錢「多數」係機頂, 唱錢「多數」係側邊)



好喇, 到(2)喇。
呢個可以話比較簡單,
亦都可以係比較麻煩。
麻煩在要預先訂飛,
簡單在訂左飛之後唔洗點擔心,
到時到候點名上車就得。

(2)一般黎講都可以係網上訂飛,
付款方法以信用卡付款最為普遍。
但亦有小數, 係要電話預約。

如果唔係信用卡俾錢的話,
其他o既可能性有:
a) 係集合o既地點向乘務員俾錢
b) 先到指定o既售票處買飛
c) 到便利店, 用店內o既網購服務買飛,
詳情如下:
---係網上or電話得知要搭o既車o既代號
---係便利店網購機輸入代號
---揀相對應o既服務、巴士、時間、坐位等
---填輸入好個人資料之後, 網購機會出一張收條
---拎住收條去收銀俾錢,
---收銀就會印車票俾出黎

P.S.    (c) 亦適合用於買部份演唱會飛、展館入場券等, 手續一樣
(e.g. 多啦A夢博物館)



題外話,
日本o既巴士同火車一樣,
唔可以講電話, 電話亦要較做靜音,
同時保持車內寧靜。
如果係靠近「優先席」的話, 電話更要關上,
之前講JR嗰篇都講過。
http://japsleevefish.blogspot.hk/2012/08/jr.html



諗到有咩漏的話, 遲啲再補。