紅葉 京都 第一日 (東福寺 + 大原 [三千院 + 勝林院 + 宝泉院 + 寂光院] + 鞍馬貴船)

今朝0600起身, 而家已經係晚上0200
爆眼瞓, 所以寺廟o既介紹小弟就唔做喇,
大家有興趣就自己上網問wiki老師啦。
又或者假以時日, 小弟得閒再補番......



一睇個標題就知小弟今日做過啲乜啦。
其實而家仲未係京都睇紅葉最好o既時候,
因為今年轉涼比較遲,
起碼要等到十一月底十二月頭先係全盛時期。
不過小弟就黎要番香港,
所以焗住要而家黎京都,
唯有本住睇得幾多得幾多o既心態睇啦。


正如頭先所講, 0600就爬左起身,
由大阪搭地鐵轉京阪到東福寺站。
可能因為《SWORD ART ONLINE 7》呢本小說太好睇喇,
小弟睇到唔記得落車=.=

出左京阪東福寺駅向南行前往東福寺,
又行過龍......咩事=.=

ANYWAY, 同預計o既到達時間差唔得幾遠。



講起京都+紅葉, 一般都會諗起清水寺、東福寺、南禪寺,
可見東福寺係好有人氣的。
而小弟剛進入東福寺範圍時,
就已經感受到嗰種「人氣」......
唔係因為人多, 當時「仲未」見到好多人,
而係可以見到東福寺附近o既街道,
都配以保安指揮行人、車輛。
需知道而家其實仲未係京都睇紅葉最好o既時間,
但呢度已經重兵駐守......

你會話「你一睇就睇最靚嗰個紅葉spot?」
冇計啦, 行程咁比順路。
而且其實其他地方都唔係唔靚, 各有風味,
只係東福寺紅得勁, 範圍大, 又方便就腳啫。




進入東福寺範圍

一般都叫做「山門」,
但東福寺呢個零零舍舍叫做「三門」(日文讀音一樣"SAN-MON")。
前面條樓梯個設計幾特別。

講起東福寺o既紅葉的話,
一定要數通天橋喇,
由通天橋望過對面臥雲橋,
又或者係由臥雲橋望番番黎都係一絕!!!

通天橋參觀費400yen,
應該只係呢個時期先要收錢=.=

剛進入通天橋範圍......
做咩事? 奔虛!?!?!?
橋o既盡頭堆滿晒人......

東福寺0900開工,
而家先係0930, 就已經好多人......

當中不乏香港人XD



好喇, 戲玉喇!!!
蹬凳~~~

好紅呀!!!
不過就小弟睇, 其實只係紅左40%左有,
仲有好多もみじ(最紅最靚o既品種)都仲係綠色......
全盛時期的話, 真係難以想像......



難得黎到,
都唔係淨係睇紅葉o既,
參觀埋其他建築

其實唔只條通天橋個view勁,
旁邊個庭園都好靚。

由庭園影番上通天橋

企左成十分鐘, 先等到可以影番張相係比較少人啲。

順便參觀埋方丈庭園
再盛惠400yen

離開東福寺, 當然唔會就咁完啦,
頭先講過o既卧雲橋,
其實就係寺o既境外,
回程時經過卧雲橋,
由橋o既隙縫向東福寺入面影番張相。

其實同係通天橋影過黎差唔多=.=

所以如果大家唔想俾錢入去通天橋的話,
可以係臥雲橋影完想相走人,
但當然啦, 咁樣的話就唔可以入通天橋個庭園which is值得一睇的。

上圖係由臥雲橋偷拍番入東福寺個庭園。



其實一直到而家,
小弟都係孭住個大背囊的。
為左放低個背囊, 再加上方便搭車,
小弟先坐JR奈良線由東福寺到京都駅,
係京都駅o既coin locker放低背囊後,
搭京都巴士到大原(巴士1 day pass不適用)。



搭左成個零鐘, 1205到達總站落車,
比原定行程遲左個幾鐘=.=
唔係因為小弟動作慢,
而係頭先真係好多人,
要等少人啲黎影相, 一啲都唔容易......



先向三千院、宝泉院方向進發。



大原呢一區已經距離京都市中心幾遠下,
四圍都係山同森林, 風景宜人。

啲小店都好有風味。

覺得上圖個野好搞笑, 所以就影左落黎。

不乏賣紅葉圖案商品為主題o既店舖。

唔洗多講, 大家識睇中文字架啦。

好甘.....入場要700yen......

不過個庭園好靚

後面仲有好大個庭園!!!

上圖嗰兩個石公仔可以話係三千院o既LOGO。

鎌倉時代o既石佛

以上就係三千院o既相。
睇完之後覺得嗰700yen係值得的!!!



本身行程係按旅遊書建議, 去宝泉院的,
不過途中經過勝林院,
被右手邊嗰幾棵氣勢懾人o既紅葉樹吸引住,
於是俾左300yen入場。

右手邊嗰棵紅葉樹係賣點!

真係好大棵!

上圖冇out focus, 特登的。




300yen完全係抵的,
然後就行過去宝泉院。

通道上都係紅葉樹,
不過未開始轉紅。

一山還有一山高,
宝泉院要800yen!!!
不過附有抹茶券,
可以係庭園一邊品茶一邊欣賞美景。

院內格格不入o既售物部。



800yen就係包埋下面嗰set茶。
由於係茶道用o既茶,
所以真係苦到喊......

對住美景, 大家都坐死係度唔捨得走。

庭園o既一角有個流水同埋兩碌竹,
話靠耳仔埋去, 可以聲到大地o既聲音。

不過小弟覺得啲聲音似水珠滴落金屬盤咁。
諗起「大珠小珠落玉盤」。

庭園中心o既五葉の松。

另外仲有一個有沙o既庭園。
(唔知點形容喇, 中國文化冇呢一樣野...)
日本仔傳統庭園, 都好興用沙代替水黎做設計。

因為係用沙代替水黎做設計,
所以會見到波紋(唔係JoJo嗰啲) 或者係旋渦。

離開宝泉院,
仲有寂光院未去呀!?
時間已經係1330!!!

時間尚早?
日本而家1500日照已經開始偏黃,
1600開始天陰, 1730已經全黑,
點可以唔急!!!

於是半跑咁過去寂光院。
(係巴士站o既另外一邊T_T)

不過跑還跑, 都不忘影下靚景。

到寂光院了。

入場費600yen。

淨係個門口已經靚到殺死人。
(上一圖, 下兩圖)

庭院有個小池,
啲紅葉襯埋啲錦鯉, 好正。

倒影的紅葉

時間已經係1430,
跑出去搭巴士。

由大原搭番京都巴士17號到宝ヶ池,
然後轉叡山電鉄到鞍馬,
途中開始落雨......



係叡山電鉄o既 二軒茶屋 到 市原兩個站之間,
鐵路兩傍有好多紅葉,
差唔多到o既時候,
車長會叫大家準備相機,
同時會將列車o既速度減漫,
俾大家慢慢影相。
不過只有車頭或車尾先影得好,
而車頭一早堆滿人,
所以小弟係車尾影。

到達總站鞍馬。

願世界和平

其實呢個時候已經落雨落得幾勁下,
不過小弟用白平衡同曝光補償搭夠,
再加埋腳架, 勉強叫做影得到相。

勁大碌杉

為雨越落越大,
所以都冇時間慢慢影喇......
開始影得求其。

 見張相好似好光咁,
其實個天已經黑左一半,
奧之院條路已經封左唔入得......

出到車站, 個天已經黑晒,
時間都只不過係1730......

番番鞍馬車站之後,
啲雨大到HIHI,
仲要行雷添, 係小弟呢一年來,
旅行最惡劣o既天氣......

本身見行雷, 打算番歸架喇,
不過等電車o既途中,
雨越落越細, 仲停埋添,
結果都係決定照原定計劃,
去貴船睇夜晚o既紅葉亮燈。



貴船口駅.
已經夠靚。

係貴船口駅搭巴士到貴船,
然後再步行入貴船神社,
途中o既夜店、紅葉都好吸引。

貴船神社

逛完貴船神社,
向奧社進發。

日本人成日會參拜呢啲生埋一齊o既樹,
唔睇介紹都估到樹名不外乎
「相生」「夫婦」「雙龍」咁上下

奧社

貴船神社o既結社



大家睇相就睇得好開心呀,
但影就影左好耐=.=
因為真係好黑, 曝光時間長,
又要試曝光補償,
再加上減低ISO雜訊等setting,
出一張相出好耐=.=

不過係值的。

打道回府。
遊貴船半個鐘o既路程,
結果影左兩個鐘相=.=

同樣地, 經過頭先嗰段路段,
車長會介紹話有紅葉,
不過因為係夜晚,
車長更加會熄晒車箱入面o既燈。

成個車箱黑晒, 睇外面打左燈o既紅葉,
真係超正!!!!!!
今次小弟早有準備,
所以一早霸到車頭位!!!

搭到出柳町已經2100,
再轉巴士到京都駅拎行里,
然後到今晚o既落腳點---網吧。

小弟本身已經唔係有錢,
但京都不愧為全關西物價最高o既地方,
就算係啲cheap cheap旅館都要4000yen一晚。
反正小弟遲睡早起,
於是去網吧過夜仲冇咁嬲。

去左烏丸四条o既COMIC BUSTER,
又平務服又好, 仲要唔係好多人, 夠靜!!!



唔講喇,
UP完啲相、打完呢篇野已經0336,
聽朝......呀, 唔係......今朝要0530起身=.=