死窮鬼遊日本心得 之 衣&食

小弟總括下係呢一年玩日本o既經驗,
嘗試寫下點樣可以平玩日本



衣:

事實上小弟因為帶夠衫去日本,
幾乎冇買過衫, 所以呢方面o既經驗唔多。
不過都有少少可以分享下。

唔好係大舖頭買衫, 呢啲係必然架喇。
有好多人話上網購物, 如果一次過買的話,
就算計埋手續費都有平, 呢個都係事其。

不過有更縮骨o既方法, 只要閣下唔介意著舊衫的話......



係啲個人經營, 做街坊生意o既衣服店,
好多時都會有舊衫寄賣,
有時啲價錢真係平到你唔信。

話說小弟去北海道WWOOF,
本身因為諗住係初秋去, 自己帶o既衫都夠。
點知去到函館, 先發覺自己太睇小北海道o既秋天......
結果決定買多件長袖衫。

小弟窮鬼一條, 當然唔會買名牌,
何況小弟係去農場做野。

但搵極都搵唔到啲平價舖。
後來見到頭先所講「個人經營, 做街坊生意o既衣服店」
買左一件衛衣, 只不過係300yen......
小弟初初仲以為睇錯價錢......

除左有少少毛粒之外,
件衫都幾新淨,
於是二話不說就買左喇。
正常買一件衛衣,
真係講緊要2、3000yen架。



食:

1)
唔好去便利店買食材呢啲就同香港一樣架喇。
不過最吸引o既, 莫過於半額便當!!!

一般超市,
到左晚上8點幾左右,
啲已烹調o既食物都會打折出售,
通常會係先打 7~8 折。
然後再過多大半個至一個小時,
就會打半價!

例如398yen o既便當就會變成199yen,
令本身已經平價o既便當更平。
小弟因為大食, 所以一般都會食兩個飯盒,
加埋都唔洗400yen。

除左超市之外, 啲大型商場,
總有area係集中賣便堂or已烹調餸菜,
亦都會做半價。
雖然商場o既會貴少少, 但相對地食物o既質素亦都高啲。

2)
仲有o既係, 日本o既超市好多時都會每星期係特定一日做promotion

例如小弟住嗰區附近o既AEON, 就會係星期二做特價,
而另外一間MANDAI, 更會一星期每一日輪住唔同o既野做特價,
「例如」星期一係菜、星期二係海鮮、星期三係生果等等,
當然間間唔同, 閣下要慢慢發挖。

3)
另外, 超市都有好多唔同公司經營,
按地區又會有分別, 每一間都有其比較平o既貨物,
例如小弟住嗰頭, 「AEON」會係調味品、即食袋裝食物比較便宜;
「MANDAI」係零食比較平; 「玉出」係食材、便當比較平。
(當然, 第二個區同一間都未必一樣)

而最多平野&種類最齊o既莫過於「業務用スーパー」
即係「業務用超市」。
雖然係叫業務用, 但唔一定只係做食肆生意o既先可以係該超市買野,
只係業務用スーパー o既貨品, 一般黎講都比較珍寶,
但就係因為咁, 所以貨品都比較平, 尤其是食材相關o既野。

4)
有時啲藥房都唔可以睇少,
好多中型、大型o既藥房都會有售賣食材o既部份,
有啲藥房o既食材價錢、種類甚至可以比美超市。



所以如果去日本長住的話,
第一件事一定要摸清附近有咩超市藥房、
便當幾時半價、幾時做咩特價等等!