魷日記: 六甲山 (六甲高山植物園 + 六甲GARDEN TERRACE)

2012年11月4日星期日

六甲山 (六甲高山植物園 + 六甲GARDEN TERRACE)

琴晚PLAN京都紅葉之旅o既時候,
順手睇下有冇其他優惠車票,
俾小弟見到阪急有1900yen六甲山車票,
+ 來往車站&六甲山纜車市巴士任搭,
+ 六甲山纜車任搭
+ 六甲山山上巴士任搭
+ 摩耶山纜車吊車任搭

其實一日時間咁少,
每樣都只可以搭到一次,
但條數已經係番度,
仲要有六甲山山上設施o既coupon。

最重要係一卡傍身,
就唔洗下下抄散紙.........

之前睇過下啲紅葉特輯,
話六甲山植物公園係睇紅葉o既時候,
一直都心思思想去,
今次簡直係合晒何尺。

再睇下天氣報告,
發現得番4/11天晴,
之後連落兩日雨。

因為之後仲有PLAN,
所以臨時決定今日去喇。
反正小弟都已經幾熟悉日本交通,
唔洗點check路線呀剩, 都有信心可以到埗。

於是今日就黎個小小的旅行喇。

早上9點左右起身,
搭地鐵到梅田,
先到售票處買優惠車票,
然後就坐阪急往神戸方向喇。

出左阪急六甲駅,
再轉巴士到六甲纜車駅。
爆多人迫巴士,
難怪o既, 由星期五開始日本三連休,
仲要今日咁好天。

纜車山頂站,
話係近畿車站百選之一喎,
不過站內o既裝飾係幾花心思o既。

由巴士站望向神戸市方向。

巴士站附近都有幾棵紅葉樹。

坐十分鐘巴士就到六甲高山植物園東口。
入場券成人600yen,
不過小弟有coupon, 平100yen。

小便男孩,
咁啱3/11, 即係琴日,
有一個幫佢著衫o既儀式,
天氣凍嘛~
不過小便男孩似乎小便帶血
要驗下身喎

上下兩種都係一啲草、蕨類o既植物,
不過個名就冇深究喇,
全部片仮名, 睇左都記唔到。

呢啲會變紅o既草、蕨、灌木類,
日本人都會統稱為「草紅葉」(KUSA-KOU-YOU)
高山上會比較多。

當然黎到高山植物園,
唔係淨係睇紅葉o既,
都可以睇下啲奇花異草。

其實講真,
植物園o既紅葉都唔係真係話好多好紅,
不過叫做個湖幾有意境。
聽講京都o既紅葉係日本之最,
全部都係紅色,
可惜小弟等唔到全紅就要走人番香港......

離開左植物園,
向往六甲吊車站前進。
(六甲吊車唔同纜車, 吊車來回有馬及六甲山頂)
途中經過六甲GARDEN TERRACE,
好有歐陸風情o既建築,
不過以手信店、食站為主,
除左個塔之外,
小弟冇乜興趣......

係六甲GARDEN TERRACE對面就係六甲枝垂れ,
應該係模仿枝垂れ桜 o既野,
不過小弟冇乜興趣, 加上要收500yen,
就算有coupon都唔想入......

見到有吊椅,
話係咩sky view,
講到咁把炮,
100yen又唔係貴,
於是試下。

搭嗰時個境係唔錯o既,
不過講唔上係SKY VIEW囉。
仲要其實係帶到你去六甲COUNTRY HOUSE。
所謂o既六甲COUNTRY HOUSE,
其實係一個大花園,
附有多種活動設施,
例如釣魚、水上單車、GOLF等,
不過要俾晒千yen入去......
小弟都係係外面影張相就算, 走人。

小弟將票唔包六甲有馬o既吊車,
所以只可以黎到呢度。
係吊車站附近o既食肆影下相。

見到下圖奇妙o既東西,
好似外星人咁。

其實啲公仔o既頭都係用龜甲造成,
兩塊合埋一大塊,
然後一個頭用三大塊砌成,
(好似三菱個logo咁)
取其「六甲」o既意思=.=

時間已經係三點左右,
都差唔多係時候走,
因為四點幾開天會天黑。

呢度有段小插曲~~~

等巴士o既途中,
遇到四個(2男2女)講純正關西腔o既老人家,
(似係大阪腔)
佢地想搭巴士,
不過似乎唔係搭小弟嗰架。

因為佢地唔係好識睇巴士站個時間表,
於是走黎問小弟......
(點解日本人都會唔識睇=.=)
於是小弟就教佢地睇喇。

點知發現佢地嗰架要等多成粒鐘先到,
所以佢地就決定係附近逛多陣。
咁小弟臨走都禮貌地同佢地講句「良いお旅を」,
意思即係「祝有一個愉快o既旅程」。

然後其中一個呀伯就同番小弟講:

「年青人啊, 亦都祝你有一個愉快o既旅程,
你的人生亦然。你要背負起呢個國家,
雖然呢個負擔好沈重, 加油。」

小弟:「・・・・・・」

大佬, 小弟啲日文咁爛,
你唔係傾左咁耐都聽唔出嘛。
不過佢地都係關西腔,
可能係當小弟由唔知邊度鄉下出城......

ANYWAY,
完左呢段小插曲
就上車到摩耶山纜車站喇。
車站外有個小公園叫「掬星台」,
話夜晚由呢度睇日本三大夜景之一o既神戸好靚咁話。

哼, 係香港o既夜景面前, 有邊度o既夜景敢認第一!?
因為香港o既夜景, 係由無數打工仔加班捱夜堆砌出黎的!!!!