冬去春來, 到左三月至四月
又係日本櫻花盛開o既季節
雖然小弟講唔得上係日本通
但請容小弟係度「識少少扮代表」
分享下去年係日本賞櫻o既經驗同資訊
希望幫到plan緊黎緊去日本睇櫻花o既朋友們
賞花時期
賞櫻最大問題
莫過於花期只有一個星期至十日
加上受氣溫、風勢等影響
要預早plan留日賞櫻時間
可以話同買馬仔冇乜分別……
事實上小弟去年亦因為天氣遲遲未轉暖
所以幾度押後出遊計劃
每年差唔多到櫻花季節
日本都有好多網站預計花期
儘管個個網站o既預測都差唔多, 但總有啲唔同
大家不妨睇多幾個, 然後拉個平均
要注意o既係字眼「開花預想」同「満開預想」
「開花預想」講o既係該景點有櫻花開始開
而「満開預想」, 即係指該景點最多櫻花開o既時間
當然, 櫻花都有好多品種, 開花有早有遲
啲開花o既「預想」都只不過係一個normal distribution o既統計
