冬去春來, 到左三月至四月
又係日本櫻花盛開o既季節
雖然小弟講唔得上係日本通
但請容小弟係度「識少少扮代表」
分享下去年係日本賞櫻o既經驗同資訊
希望幫到plan緊黎緊去日本睇櫻花o既朋友們
賞花時期
賞櫻最大問題
莫過於花期只有一個星期至十日
加上受氣溫、風勢等影響
要預早plan留日賞櫻時間
可以話同買馬仔冇乜分別……
事實上小弟去年亦因為天氣遲遲未轉暖
所以幾度押後出遊計劃
每年差唔多到櫻花季節
日本都有好多網站預計花期
儘管個個網站o既預測都差唔多, 但總有啲唔同
大家不妨睇多幾個, 然後拉個平均
要注意o既係字眼「開花預想」同「満開預想」
「開花預想」講o既係該景點有櫻花開始開
而「満開預想」, 即係指該景點最多櫻花開o既時間
當然, 櫻花都有好多品種, 開花有早有遲
啲開花o既「預想」都只不過係一個normal distribution o既統計
有人會問, 啲花啱啱開丫, 滿開丫
定係落花時候睇比較好
首先啲花啱啱開, 一定係最冇野睇的
因為啲花啱啱開嘛(廢話 )
而近花落時期, 可能因為一日半一風大
只得番殘花敗「櫻」
甚至櫻花樹可能開始長葉, 減低左一片粉紅o既壯觀性
所以小弟會建議係「滿開」之後一日至三日睇 最好
一片粉紅色花海之余, 微風之下飛花雪
何其詩情畫意!!!
下面有幾個櫻花開花預測網供巴打絲打參考
↓小弟比較鐘意下面第一個 , 圖表清楚簡潔
http://sakura.weathermap.jp/
http://season.tenki.jp/season/sakura/expectation
http://xn--xyv.jp/
http://mm-ohanami.sblo.jp/
http://www.otenki.jp/sp/
天氣
雖說櫻花開花
係由冬入春, 天氣轉暖之時
但其實氣溫好多時都仲係低於20度
如果遇上陰天雨天, 又有啲風的話
體感溫度可以跌到落個位數
建議帶定啲褸過去, 再按當日天氣定著唔著(廢話 )
因為過左冬至已經有一段時間
日照時間比較長, 至少比秋天紅葉之時長
所以活動及拍照時間亦都比較合宜
以三月尾四月頭計
東京: 日出~05:30, 日落~18:00
大阪: 日出~05:50, 日落~1820
其他地區日出日落可以參考以下網址
http://eco.mtk.nao.ac.jp/koyomi/dni/
行程計劃
要將近o既景點group埋一齊、
盡量順路、唔好搭咁多車...呢啲就講多都嫌悶
加少少補充就係
好多賞櫻o既寺廟神社, 多數都係開09:00
所以可以好好利用一啲早開門、或冇時間限制o既景點
例如(以京都為例):
公園 (e.g. 円山公園、亀山公園);
大自然 (e.g. 嵐山、哲學之道);
早開門o既寺廟 (e.g. 清水寺 [開6點])
09:00之前先去呢啲景點
就可以更有效利用日間活動時間
增加遊覽o既景點數目
另外, 到左呢啲旺季
周圍都充斥住賞櫻o既人
亦都好多人會渣車
所以景點同景點之間o既移動(尤其是市中心)
最好避免使用巴士, 因為會塞車
櫻花名所
小弟用開呢兩個日本網頁睇櫻花名所同臨時活動
http://www.rurubu.com/season/spring/sakura/
↑rurubu係日本兩大旅遊雜誌社之一
所以介紹亦都詳細啲
http://sakura.yahoo.co.jp/
↑日本yahoo網櫻花特集
雖然冇rurubu咁詳細, 但有時都會有啲rurubu冇介紹o既景點
可以增加景點資訊
值得一提o既係
有好多城池、公園都會係櫻花時節夜晚搞light-up
(即係晚上會有燈光效果照住啲櫻花)
亦會有「祭」, 即係所謂o既攤檔、廟會、鬧市
不過大家唔好咁大期望
因為好多時都只不過係一埋日式街檔係度賣小食、玩小遊戲
以rurubu網頁為例
上圖係rurubu櫻花特集介紹滋賀縣彥根城o既頁面
紅色圓形圈住o既logo, 由左至右代表
「有攤檔」「有light-up」「有城池睇(廢話)」
而藍色紅色圓形圈住o既兩欄, 上面「さくらまつり」
即係「櫻祭」, 講啲攤檔o既資料
下面嗰欄「ライトアップ」即係「light-up」
講燈效o既開放時間
又以rurubu櫻花特集介紹大阪城o既頁面為例
紅色圈入面多左個「100選」o既字樣
講緊o既係該景點係日本櫻花100 大名所之一
不過要注意o既係
有時所謂o既light-up
可能只係沿路掛啲「ぼんぼり」就算
(睇過《花咲くいろは》o既毒拎就會知咩叫「ぼんぼり」)
例如滋賀縣長浜o既豊公園
唔識日文o既朋友要點分?
就唯有問人, 又或者search多啲該景點往年圖片參考下喇
以下係小弟幾篇櫻賞櫻o既日記 (不過以近畿為主)
希望大家會鐘意
大阪城+萬博記念公園
http://japsleevefish.blogspot.hk/2012/04/blog-post_9.html
嵐山、嵯峨野
http://japsleevefish.blogspot.hk/2012/04/blog-post_11.html
清水寺+八坂庚申堂+円山公園+蹴上INCLINE+岡崎疏水+平安神宮+哲學之道+銀閣寺
http://japsleevefish.blogspot.hk/2012/04/incline.html
江八幡+安土城跡+彥根城+豊公園
http://japsleevefish.blogspot.hk/2012/04/blog-post_16.html
大阪造幣局
http://japsleevefish.blogspot.hk/2012/04/blog-post_21.html
沒有留言:
張貼留言