於是促成小弟寫呢個一topic
其實呢一個topic想寫好耐,
不過因為範圍太大, 內容又雜, 無從入手,
所以一直只係係構思階段。
就算而家寫, 都未必寫得好全面,
亦有可能有好多錯漏,
寫好後會不斷儉閱、修改, 請多多包涵。
鉄路
到達機場之後,
多數人都係搭鐵路到市區,
所以先講下一啲搭鐵路要注意o既事。
有關買車票o既事宜, 可參考「港日文化差異 之 俾錢」
講關於購票時, 購票機o既使用同香港o既有咩唔同
有關車種o既事宜, 可參考「JR經驗」
講關於「普通」、「快速」、「特急」等等o既分別。
嫌上面兩篇野太多字,
可以睇住下面o既精讀頂住下先o既。
首先講下車入面o既禮儀先。
因為日本人o既民族性,
係經常先考慮會唔會影響到別人,
然後先至會行動 (國際事務及外交除外=.=),
結果係, 日本人係車箱內會盡量保持寧靜。
日本人係唔會係車上講電話的。
電話要轉震機mode!!!
而係優先座附近, 更加要熄手機,
因為怕手機o既電波會影響配有心率附助器o既人。
有關於車種、收費等, 係「JR經驗」都有詳細o既講解,
不過為左方便即食o既朋友,呢度再抽少少重要o既野強調一下。
「普通」、「快速」、「特急」等等o既分別,
好多人就算唔清楚, 都知道唔可以亂上車,
於是講下一啲容易啲中伏o既野。
1)「Green車箱」、「普通車指定席」
總括黎講就好似香港o既頭等咁,
要先另外俾附加費購票先坐得的,
但呢兩種車箱都唔係特別起眼,
總之如果發覺明明其他車箱有好多人排隊,
唯獨某一兩卡冇乜人排的話, 就要小心啲。
2) 女性專用車箱
啲港女都嘈左好耐話香港都要整,
簡單黎講就係只限女性使用o既車箱,
因為日本「痴漢」實在太多喇......(「痴漢」即「色狼」)。
好多時月台地上都貼有大大張貼紙,
講明呢個車箱, 由星期一至五幾點到幾點係女性專用車箱,
換句話說, 係指定時間外, 男性都可以用該車箱。
不過, 男生們, 除非你好有信心冇睇錯貼紙上o既時間,
如果唔係, 都係一早揀第二個車箱排隊啦,
無謂搏嘛......
酒店上網
而家日本好多酒店都已經設有無線上網, 唔洗錢,
如果大家唔係揀啲平到嘔、又或者好山卡啦酒店的話都冇問題。
上網不礙乎無線上網同LAN線上網。
睇得明menu 的話, 盡量先睇下房間入面o既介紹書,
無線上網如果要密碼, 多數都寫埋係menu入面。
如果係LAN線上網, 多數都一早有條LAN線。
LAN線多數都係係矮櫃、電視機附近,
直接插電腦就OK。
(有次條LAN線係牆角座地燈遮住左, 搵死人......)
如果冇的話, 可以落front desk 借。
行里寄存
日本o既服務業, 事事以客為先,
所以大家可以盡量用盡個front desk。
例如, 日本好多酒店都係15:00打後先開始check in,
但早左到該區, 又唔想拎住啲行里玩, 可以點?
其實大多數酒店都可以提早check in 的 (但唔上房住),
然後順便將行里寄存係front desk。
不過當然唔好三分顏色上大紅,
提早check in 左之後又話要早啲入房啦。
小弟之前窮玩日本, 都經常咁做:
晨早到達, 先到酒店check in, 寄存行里, 然後去玩,
傍晚買埋飯先番酒店, 拎行里上房慢慢搞。
如果行程唔係先經酒店,
又唔想拎住行里周圍走的話,
日本鐵路車站, 尤其是大站, 都一定有locker的,
依locker大細由300~500yen不等。
而一啲大型o既巴士中轉站都可能會有locker。
至於細o既鐵路站, 如果真係冇locker的話,
周邊o既店舖、遊客案內中心等都「有可能」提供寄存服務,
provided that 看官去o既係景光點o既車站。
(多數人都唔會去埋啲山卡啦又唔係景點o既車站掛)
不過要問清楚店舖開門到幾點,
如果唔係人地都唔知等埋你拎左行里先收工好定係拉閘走人好。
食肆禮儀
同搭車一樣,
日本人盡量保持地方寧靜。
(除非係居酒屋呀嗰啲平民夜店)
所以日本人係唔會係食肆入面聽電話的,
電話要轉震機mode!!!
(你冇睇錯, 小弟冇講錯)
如果真係有電話要接咁點算?
如果唔係獨家村食野的話,
日本人會選擇去走出店外, 又或者係去廁所講電話。
就算係一條拎食野,
如果係係啲「吉你媽」嗰類門面較open o既快餐店的話,
都會係走出店門外聽, 聽完番黎繼續食,
店員都見怪不怪。
比較苛克o既係,
如果閣下係同日本人食飯的話, 要留意,
日本人係盡量唔會係食緊野途中去廁所的。
一係食之前去, 一係食完食物先去,
當然後生一代都比較開放,
同熟o既朋友一齊, 亦都唔需要咁拘謹。
另外, 係歐、美、香港,
都好慣常會俾貼士,
但日本係冇呢一套的。
反而你係帳簿留低貼士,
店員追九條街都追番你番黎,
呢個係小弟o既朋友親身經歷!!!
佢同女友係大阪 蟹樂道 食完野,
好型咁留底貼士走人,
結果左累左個女侍應跑左二百幾米「還錢」......
日本o既餐桌禮儀亦都比華人嚴苛,
詳情可以參考「筷子」
小弟覺得呢個幾值得睇, 推薦!
香港人vs中國人
有唔少人會堅拒認自己係香港人, 否認係中國人。
小弟唔係打算討論「身份認同」呢個複雜o既政治定義問題,
問題係, 外國人點睇你香港人。
而小弟可以話俾你知,
日本人冇「香港人」呢個概念,
係日本人認知當中, 黃皮膚黑頭髮黑眼珠o既,
佢地只會分類成: 「自己人(日本人)」、「中國人」、「韓國人」。
日本人頂多只會係「中國人」呢個category 入面,
開左個sub-group叫「台灣人」,
你同佢地堅持自己係「香港人」嗎,
佢地只會話「哦, 係呀~」, 然後繼續向其他人介紹你係「中國人」,
又或者繼續以為你係「台灣人」。
詳情可以參考「日本人眼中的香港(人)」
都幾值得睇下的
所以嘛, 去到日本, 如果真係受到一啲racial discrimination的話,
唯有忍一吓氣啦, 因為拗都冇意思。
另外, 如果見到一啲同胞做出一啲失禮o既事的話,
可以的話就幫手補救下啦, 叫做造福後人都好嘛。
事實上小弟都試過代一啲失禮o既同胞向日本人道歉。
有一句說話, 小弟好印象深刻,
係n年前香港匯封銀行電視廣告o既一句說話:
「~去到外國, 你先至係外國人~」
其他延伸閱讀
港日文化差異 之 過馬路
日本巴士經驗談
沒有留言:
張貼留言