八日七夜 北首都圈 毒撚魷 第三日 --- 千葉 + 茨城 聖地巡礼

行程第三日,

瞓唔夠五個鐘又起身@_@ 

早上七點已經由上野到達千葉......

今日全日都係聖地巡聖,

由千葉, 沿京葉線一路巡番去東京,

相關畫主要係《俺いも》第二季同埋《俺がいる》。

(即係港譯o既《我妹》同《果青》啦)

如果想睇番《俺いも》第一季o既聖地巡礼的話

可以睇番小弟以前一篇blog

http://japsleevefish.blogspot.hk/2012/10/blog-post_31.html

唔講咁多喇, 大家睇圖啦~ 

先係千葉駅周邊 

京介同黑貓打情罵俏o既地方 

然後就係千葉中央公園。

因為係《俺いも》經常出現o既場面,

所以第二季播完o既而家,

小弟又再黎多次喇。

今次係小弟第二次黎千葉公園,

想問, 一個正常o既香港人又點會黎一個咁o既地方兩次......

小弟果然唔太正常......

片頭o既其中一個sort

然後就係京介同黑貓食lunch o既凳,

係公園一個小山岡上面。

因為個入口實在太唔起眼o既關係,

小弟都花左少少時間黎搵,

好在拍攝o既時候冇人。

唔係話先入為主,
但睇落, 其實連後面o既樹都唔係亂畫!!!

京介決意同黑貓拍拖嗰一幕

可能因為正值夏天
啲植物生長得比較茂盛
不過仍然可以見到動畫鏡頭o既一啲相似性
例如樹o既品種、形狀等

至於同麻奈実約番學等等o既公園情節
因為去年已經影過, 呢度唔再放上黎
有興趣o既朋友可以到小弟以前o既blog睇下



然後穿過千葉公園,
行去京介就讀o既中學。
係邊間中學, 小弟就唔開名喇。



就行到校門同黑貓會合o既京介

離遠見到奇裝異服o既黑貓而發呆o既京介 

小弟話唔開始

但下圖已經曝露晒......

因為暑假都有課外活動,

校內仍然有人, 所以個閘開住。

亦因為校內仍然有學生o既關係,

小弟拍攝o既時候都要好小心,

唔可以俾人當係「不審者」(即: 可疑人物)

影完中學, 就去影大學,
下圖係京介去考完大學入學試出校門o既一幕,
邊間大學的話, 小弟都唔怕講喇,
咪就係千葉大學囉。

由上面o既中學, 用快o既腳程,
後廿分鐘左右就到。
不過大學門口有食蕉,
所以小弟都唔係好敢走入大學影......

其實行到而家已經好攰,
而下一個聖地又係番千葉市中心嗰邊,
實在唔係好想行過去。
好彩附近有車站, 而小弟又係用free pass。
最重要o既係, 呢個係細站, 而咁啱兩分鐘後有車到。
於是即刻跑去車站, 啱啱好趕得切!!!!




下一個聖地, 係位於千葉駅離千葉公園反方向o既市街。

還記得桐乃宅魂覺醒嗰幕嘛,
下圖就係嗰間千葉animate

一場黎到,
當然要入去行個圈啦

呢期除左《俺いも》之外, 當紅o既就係《俺がいる》,
小弟都有追開小說。
咁啱見到有特別版o既第3話。

問下店員有冇存貨,
點知陳列品已經係最後嗰件,
即刻拎去俾錢。

上圖o既《MAGI》金笛,
放左係啲特價品區www





由animate再過多個街口就會到京介同桐乃拍拖o既商店

上面呢張真係一模一樣,
連啲燈箱呀、電視仔o既畫面都係,
係咁依睇真係分唔到邊張係動畫cop圖。




下一站小弟就沿京葉線向東京方面進發。
不過當然係先到千葉mono rail,
買番張限定《俺妹》紀念車票先啦。

呢度講多少少先。
《俺妹》係近期大熱o既小說、動畫&漫畫,
因為故事舞台係千葉,
加上片中多次出現千葉mono rail o既影像,
商人又點會放過呢個賺錢o既大好機會。

於是係今年(2013),
千葉mono rail就將其中一架列車包上《俺妹》o既圖案同裝飾,
即係所謂o既「ラッピング」(日本o既"warpping")
並且推出一系列商品,
當中包括mono rail on day《俺妹》pass等等。
而《俺妹》pass又分閒日同假日兩種圖案,
於是小弟今日(閒日)買完之後, 四日後要再黎買=.=

下圖就係閒日o既車票喇＼(^o^)／

車票真係好靚,
仲要有暗閃!!! (下圖)

仲要送下圖o既mono rail觀光地圖!!!
(打開為A3 size)

都只不過係600yen,
搭三四個站就已經抵番晒!!!!!!



至於嗰架傳說中o既列車,
因為今日做例行檢查所以搭唔到......
不過放心, 小弟四日後會黎搭,
請留意25/8/2013 o既blog!!!





由千葉駅搭mono rail到千葉みなと轉乘JR京葉線。
本來想去一去千葉みなとo既海邊公園做聖巡(下圖),
可借今日實在係唔夠時間......睇下餘生有冇機會再去啦......

京葉線o既第一站係稲毛海岸駅,
當然呢個站同《俺妹》冇關係啦,
而係《俺ガイル》o既聖地。

第九話去睇煙花

角度差少少唔夠低, 除非貼地影......

動畫省略左啲雜物。

車站外觀

正正係車站出面o既商場

主角們所就讀o既學校就係呢個站行三十分鐘路,
千葉市立稲毛高校。
比想像中遠, 小弟以競步、接近跑o既速度,
都要十五分鐘先到......



下圖第一張係動畫ED 中o既黑白照,
而第二張彩色o既係小弟影的。

日本o既學校真係好大。
個則門同個正門差唔多樣。

ED由比ヶ浜所企o既地方係學校棒球場旁

練緊棒球o既同學仔係咁望住小弟......

而巴士站就係學校正門對面。

由學校再向海邊行,
就係ED入面o既海濱。

下面第一張係ED o既圖片, 第二張先係小弟影o既。

唔知係咪個風力發電個頭可以郁得, 個角度唔係好啱。

小弟影嗰張右手邊多左啲野? 

因為係夏天, 有刨冰係度擺檔, 所以多左啲簾。

睇番個ED, 影o既時候應該係冬天左右。

本來呢度有好幾張想影的,

不過因為多太人游緊水 ,

所以都係算喇......

繼續沿京葉線, 下一站係臨海幕張,
呢度同時係《俺妹》同《俺ガイル》o既聖地,
因為大家都係係呢度集合呀、睇煙花呀咁。



先係《俺ガイル》

好可惜工程中...... 

雖然俾啡色o既臨時建築遮住,

但仍然可以見到後面o既柱墩, 同埋支旗。

下面一系列都係車站對出o既交差點。

やっハロー 

然後係《俺妹》 ,
京介同黑貓拍拖睇煙花o既地方:

呢張除非係馬路中間影

本來仲想行遠啲去佢地睇煙花嗰個公園,
不過開始落起雨黎, 小弟又冇帶遮,
所以只好撤退......



到下一站o既時候, 雨已經停左。
南船橋駅出 ,
小町、八幡同雪乃買禮物俾ゆいo既地商場:

動畫畫得好似好大咁,
其實個open area唔係話咁大。

連小町拗手指o既地方都俾小弟搵到,

小弟真係勁!!!XD

其實小弟幾鐘意小町(^3^)

點解小弟個妹唔係咁orz

最後一站, 要轉搭りんかい線。

去開コミケo既朋友應該好熟啦。

落車o既地方係東京テレポート。

黎呢個景點,

全因為Lovely My Angel あやせ!!!!!

出左車站就會見到摩天輪

摩天輪下面o既商場

商場後面o既上落貨位 ,
就係可惡o既京介同可愛o既あやせ相會o既地點!

あやせｐｒｐｒ

就咁, 小弟就一路由早上八點幾開始,

由千葉一路影到番東京。

不過今日o既行仲未完 

如果有爬文的話,

應該會知, 小弟今晚會再去茨城 

食之前食唔到o既ガルパン吉列豬扒飯!!!

(詳情請參閱琴日o既blog)

呢個吉列豬扒有咩特別? 

就係《ガルパン》劇中出現過o既食店同埋嗰個坦克形o既吉列豬扒喇!!!

由上野搭左兩個小時o既JR ,

再轉巴士搭廿分鐘到去總站,

為左成個吉列豬扒,

來回花成五粒鐘值得嗎??? 

唔知......

不過食左先講啦~

係《ガルパン》動畫入面,

呢間叫cook fan o既食店,

係係船上的, 但實際上卻係內陸......

仲要距離主要交通勁遠.......

一入店入面,

果然已經有好多人,

間店大概有一個普通班房咁大啦。

不過因為有好多客人,

所以小弟唔方便影相。

雖然有好多人,

但睇個樣多數都唔係毒拎,

睇黎呢間野係呢區本身都已經頗有人氣。

最辛苦係成間店得一個呀嬸做樓面,

成差唔多十五~廿張枱o既食店得一個樓面,

做過飲食業o既都知有幾辛苦!!! 

因為冇位o既關係,

小弟順呀嬸o既建議坐喫煙席,

係一個半open o既間格。

牆上面有好多《ガルパン》o既關連www 

好多食客都唔係毒拎,

但似乎《ガルパン》係呢一帶都幾出名,

因為如果一行三四個人食野,

有一個人見到《ガルパン》啲裝飾, 問發生咩事的話,

當中實有一個人答到「《ガルパン》でしょう」,

真係「三人行必有我師」。

好, 講番最重要o既坦克形吉列豬扒先,

先介紹下餐牌。

其實有兩種坦克形吉列豬扒,

第一種係「ガルパンかつ」, 意譯即係「普通坦克吉列豬扒」,

係動畫出街後, 該店最初推出o既坦克吉列豬扒,

份量大概係一個人份量(當然係跟飯、跟味噌湯), 

就係上圖餐牌中右方嗰個細圖。

而另外有「ガルパンかつ リアルバージョン」,

意譯即係「真實版坦克吉列豬扒」,

點解叫真實? 因為普通版比較細份, 唔夠高挺,

唔以動畫出現嗰個坦克吉列豬扒。

所以經過店家幾個月研究,

終於研究出忠於動畫o既「真實版」,

就係上圖餐牌其餘嗰幾個圖示!

普通版1500yen,

真實牌3000yen

再講多少少,

真實版, 餐牌上寫明係兩個人份量,

食店網頁上都有提醒大家,

選擇時要量力而為。

小弟自問大食,

而且一場黎到, 人一世物一世,

於是膽粗粗叫左個真實版。 

另外,

大家可以係點菜時,

要求店家將動畫中 III突 o既旗插上去。

不過食店網頁都話, 因為旗係自家人手製的 

所以大家要求唔好咁高。

小弟當然係有叫店家豎FLAG啦,

不過樓面呀嬸話中午時已經售罄 >.<

因為坦克吉列豬扒製作比普通吉豬更花時間,

冇野做, 周圍望,

發覺每一枱都有一本小薄本(誤),

俾客人留言。

當然, 動畫出左街o既而家,

小薄本入面《ガルパン》滿載啦。

等左差唔多半個鐘 

終於有得食!!!

影番個靚相先

個炮咀好短(綠色嗰碌)

食落, 終於知道點解真實版研發需時,
因為坦克車身原來係兩塊豬扒夾埋一齊炸!!!

對煮野食有少少概念o既朋友都應該諗到,
咁厚o既肉要炸得均衡又唔會老, 又唔可以生,
火侯o既控制係何其困難!!!

即使係咁炸法,
仍然有好多肉汁!

車身上面o既炮台,
係用薯蓉炸成的。

 比較下支牙籤大洗旗, 大家就會知道,
個車身嗰兩塊吉豬加埋成4分3支牙籤咁厚!!!

自問大食o既小弟,
一路食都一路擔心食唔晒......




慢慢食, 總算勉勉強強食晒......
小弟真心建議,
普通食量o既朋友真係唔好試「真實版」!!!!!
個真實版應該夠三至四個女生食用..........

食完, 小弟當然都簽番個到啦,
用僅有o既拙劣日&畫功留左個言。

埋單,

因為已經差唔多到關門o既時間,

問准左樓面呀嬸之後,

影下收銀附近o既擺設。

係食店入面開神社供奉《ガルパン》www

戰犯!? XD

呢對拖鞋係俾坐「他他咪」o既客人去廁所時用的(小弟都有用) 

連拖鞋都係大洗女子學園logo, 真係細緻。

有睇琴日篇blog o既朋友應該記得,

係大洗市內有好多《ガルパン》人物細牌,

唯獨有一個唔係大洗市內,

就係呢一個。

埋單俾完錢,

3000yen啱啱好唔洗找。

咦? 

點解樓面呀嬸有野俾小弟o既? 

原來幫襯ガルパンかつ送名信片!!!!!

真係喜出望外!!!!!!

懷住滿足喜悅o既心情,

又搭番兩個幾鐘車番東京。




好了, 事情還有下文的。

話說因為小弟係以網吧為宿,
所以冇得放行里,
於是一啲唔需要拎黎拎去o既行里,
小弟就放左係JR上野駅 o既locker。

JR o既locker唔係個個都通頂用得的,
所以小弟都好小心咁睇清楚。
小弟用嗰個淺草出口locker area, 係晚上23:30落閘收檔的,
而小弟晚上番黎嗰班車係23:23到站,
七分鐘, 點都夠時間由月台上黎啦下話,
加上日本o既列車都真係好準時,
所以小弟都好老定咁放低行里,
晚上去係水戸食完個吉列豬扒飯之後,
就坐原定嗰班車番上野。



小弟寫得呢段野, 就當然係出事啦。
搭JR番黎o既時候, 東京落大雨。
就係埋門一腳, 列車就黎駛入上野駅之前,
架車停低左......

車箱內傳來廣播(當然係日文),
車長以周杰倫o既口齒, 跑馬評述員o既速度, 打齋o既音調,
話因為大雨關係, 月台路軌進行臨時檢查,
列車服務稍為延遲......

%^%&!(@*$%*&)%$#%^*(&*#@$_@#

一停就十分鐘......
落車o既時候已經係23:33......
上到車站大堂出到閘,
果然嗰個locker area已經落左閘。



小弟初初諗住, 車站都未收工,
應該有得掹掛?
於是去番 精算所 (類似票務處) 問點算。
一個名牌寫住叫 土井 o既 中年小肥男人,
同小弟講, 閘門都落左, 唔可以開番。

原因係,
原來有部份locker係外判的,
例如小弟用嗰個locker, 外判公司23:30派人黎落閘之後,
嗰個外派人員就走左去第二個站落閘......
今日先第一次知.......



同嗰個叫土井o既人交涉啦,
佢初初都好似唔想理小弟,
(咁因為好多列車延誤左, 佢都真係好忙)
叫小弟等到第二朝開閘先拎番行里。

於是小弟就話, 啲身份証明文件呀、重要o既野都係入面,
拎唔到行里的話, 今晚就住唔到酒店要瞓街......
(事實係: 小弟住網吧, 有錢, walk-in就得)
至於重要文件, 又點會唔跟身丫~
XD

另外小弟又強調, 係因為JR誤點,
小弟先拎唔到行里, 車站應該負起責任。

最後, 嗰個叫土井o既人先肯幫小弟打去locker公司,
再叫公司派人黎開locker。
成件事擾攘左半個鐘左右啦,
十二點過啲, 終於可以拎番啲行里。



經過呢件事之後,
小弟會以後會小心啲,
搵一啲JR自己管番o既locker先用=.=



~第三日完~