是日行程有一部份以動漫為主,
對於唔熟識動漫o既朋友,
文中會有適當提示讓大家跳過
******
毒撚遊黎到第四日,
今日o既目的地係距離東京約百幾公里,
群馬縣o既草津溫泉~
草津溫泉, 係日本三名泉之一,
另外仲有 兵庫縣有馬温泉 及 岐阜縣下呂温泉。
草津除左溫泉之外, 仲有附近o既火山湖白根山都好出名。
其實小弟唔係話十分鐘意浸溫泉,
不過一來, 草津溫泉成為左《俺妹》聖地,
二來小弟一向好鐘意啲奇山異石、特別地質環境,
所以將草津溫泉納入行程範圍。
最初睇天氣預告仲擔心會落雨唔知點好,
點知當日晒到頭暈,
真係天公造美。
拎晒各樣行里,
五點幾六點就要起身。
由上野搭兩個鐘JR到長野原草津口,
再轉JR巴士到草津溫泉鄉。
其實本來由上野去草津唔洗搭咁耐的,
不過有爬文o既朋友可能會記得,
小弟係用關東7日任搭pass,
7日內任搭關東JR, 一不過唔可以搭特急、新幹線,
加上呢啲偏遠路線, 車唔多, 所以只好慢慢搖火車。
不過小弟並唔討厭, 反而好鐘意係咁轉車~
上圖呢啲咁原始o既列車, 東京都內都好少搭到,
門係要人手自己拉的(下圖)。
轉下車、瞓下覺,
早上八點半左右就到達 長野原草津口。
上、下圖為長野原草津口駅外觀。
等冇耐, 就有搭去草津溫泉o既接駁巴士,
可能因為係暑假關係,
都幾多人搭, 不過有七成都係老人家=.=
搭45分鐘左右, 就到達下圖o既草津溫泉巴士總站,
位於草津溫泉o既中心位置。
平時小弟去日本旅行都係瞓下網吧、capsule hotel就算,
不過一來草津溫泉冇呢啲設施,
二來難得黎草津
就住好少少啦。
下圖就係小弟下榻o既溫泉旅館。
因為比較平, 所以間野唔係話咁新淨咁靚,
但勝在近巴士總站同埋其他草津溫泉景點。
係旅館放低行里之後,
立即向住「白き闇」之地,
草津溫泉o既「湯畑」進發!!!
由小弟o既旅館沿斜路落,
就係草津o既招牌景點---湯畑 (音: YU-BATAKE)
介紹下先。
日文o既「湯」即係 熱水,
而「畑」, 係菜田農地o既意思,
直譯為 「收成熱水」o既地方啦=.=
大家取其意就算。
湯畑o既特點就係有好多一條條木造o既引水道(下三圖),
將啲溫泉水由泉眼 (上圖) 引出黎。
木造o既引水道有幾個目的:
1)
好讓溫泉水o既礦物(主要為硫磺)沈澱, 從而採集。
溫泉o既沈澱被稱為「湯の花」 (YU-NO-HANA),
真有詩意......
2)
讓溫泉水曝露於空氣,
以調節水溫。
3)
將溫泉水引去適合o既地方,
如溫泉旅館。
當然啦, 時至今日,
成為左草津o既地標。
因為溫泉水好熱,
所以周圍都有欄杆圍住,
但亦有設施俾大家用溫泉水洗洗手(下圖)
另外, 亦都有浴足o既地方(下三圖)
不過基於衛生意識, 加上行程趕急,
所以浴足都係免喇~
除左湯畑之外, 草津比較出名o既景點仲有西の河原,
由湯畑向西行, 有清楚o既路牌顯示。
出名o既溫泉饅頭老店、溫泉蛋店舖都係呢頭,
陣間再介紹。
係呢度做少少插序,
講番聖地巡礼o既野先。
一始都講過黎草津o既其中一個主要目的,
係因為黎做《俺妹》o既聖地巡礼。
對動漫冇興趣o既朋友,
可以跳過以下淺黃色背景o既段落。
跳番番黎湯畑一帶,
因為有好多場景都係係呢度取景。
另外, 因為影嗰時唔係順序,
所以圖o既先後跟動畫先後有出入, 請見諒。
其實張凳o既位置並唔係好似動畫咁,
同埋......阿伯你企左係嗰度好耐喇喎......
多左當檔野係度賣硫黃
好明顯取景嗰時間舖未開門,
圖片最頂嗰條紅色線,
其實係店家o既簷篷。
為左就張凳, 令到視界闊左。
連右邊扶手柱o既花盤都一致,
製作組太強大了!!!
因為工程進行中,
所以圍板同動畫中o既位置唔同,
唯有參考到o既就係「射的」o既招牌。
變左做班大叔......
其實係俾黑貓搵到......
因為作畫難度問題,
右手邊間屋好明顯簡化左。
好可愛o既桐乃,
anyway, 小弟係あやせ黨
下面嗰張, 因為4:3同16:9分別o既關係,
各位自行腦補。
好明顯動畫個背景同現實有好大出入
動畫中o既背景其實係相反方向, 即係小弟o既背面
冇可能影到佢個角度......
距離湯畑十分鐘路o既西之河原園地,
而實際上係冇動畫中o既售賣店。
基本上啲鏡頭之間o既距離都唔係遠,
再加上草津本身係旅遊地點, 就算周圍影相都唔會好尷尬,
所以比起聖巡大洗o既時候順利~~~
就咁, 草津o既聖巡基本上就完左喇。
下面文章番去觀光旅遊part。
步行十分鐘就到西の河原公園。
話就話公園, 其實稱為地質公園比較正確。
園內有多個小泉眼及溫泉水池。
行到西の河原公園較入o既地方,
有一個西の河原大露天風呂,
係一個幾有名o既露天溫泉。
俾幾百yen就可以入去浸。
不過小弟仲有好多行程,
都係唔浸住。
西の河原公園入面都有個稲荷神社,
入口鳥居左手邊有個水石盤,
放有兩隻杯, 供遊人飲用山水。
由西の河原公園行番去巴士總站,
途中經過溫泉饅頭名店。
其實冇乜得別,
不過唔係貴, 買左幾個食。
然後經過間叫蔵o既賣玻璃工藝品o既店(下兩圖)
不過吸引小弟o既並唔係玻璃工藝品,
而係門口o既溫泉蛋。
因為唔記得影溫泉蛋o既製作,
只好借用該店網頁o既圖片。
好似話係草津溫泉區內,
唯一一間用源泉煮蛋o既名店。
(「源泉」即直接取用o既泉眼水)
先用80度o既水煮12分鐘,
再將蛋浸入50o既源泉浸兩小時。
每隻120yen。
一打隻蛋出黎,
蛋白雖然已經較白色,
但仲係流質,
只有包住蛋黃嗰層係啫喱狀。
除蛋附有一小包醬油,
不過當然, 先唔落醬油試下先啦。
可能因為浸左兩小時溫泉水,
蛋白好明顯有啲礦鹽o既淡淡鹹味。
然後再落醬油(下圖)
吉開個蛋黃, 都仲係流質。
醬油唔太鹹, 同隻蛋好夾, 大人細路都應該會鐘意~
shirt一聲就食晒。
除左係因為太好食之外,
仲係因為要趕巴士=.=
文章一開始都提過,
草津除左溫泉之外,
附近o既白根山都好出名。
而去白根山, 就需要由草津巴士總站搭巴士上山。
連跑帶滾, 總算搭得切13:50班巴士上山。
下三圖為半山o既 殺生河原
個名好有霸氣!
越上越高
影相時聽到講香港廣東話o既夫婦,
於是諸事八卦o既小弟又主動走去話幫佢地影相。
話晒身在異鄉, 應該守望相助。
可惜唔知係咪因為火山活躍問題,
近火山口嗰條路封左,
要行另一條冇咁接近o既路。
係遊步道o既起點,
有一筒拐仗, 免費供大家取用,
當然用完落山要放番番黎啦。
但咁好o既天氣, 其實真係已經好好采。
上兩圖為上火山口途中望番落 弓池
睇個湖好似好平靜咁,
唔明點解唔可以行近啲嗰條路,
不過算啦。
老老實實,
火山、火山口湖, 都唔係第一次見,
熊本阿蘇山、鹿兒島火山、富士山、山形蔵王お釜、北海道有珠山,
相比起黎, 白根山都只係一般般,
所以朋友們唔好怪小弟點解唔係香港行山......
然後落番去巴士站附近o既弓池睇睇。
其實仲可以坐吊車。
不過由草津去吊車站唔係話咁方便,
因為吊車主要係for滑雪用的。
因為班次問題,
係白根山上逗留o既時間只有一個鐘,
如果唔係, 搭唔到1520嗰班車, 就要等多個幾鐘,
落到山腳就成五點幾六點。
由今朝六點開始,
跑足一日, 其實都有啲攰,
本來諗住唔趕15:20 嗰班車落,
不過諗諗下, 趁咁好天,
去得幾多得幾多~
於是搭15:20嗰班車,
落到草津溫泉, 已經係四點鐘。
事實上小弟o既決定係正確的,
因為聽日全日, 草津一帶都落勁大雨!!!!!!
又一次證明小弟旅遊時o既強運。
咁趕落山仲有咩睇?
就係去番湯畑旁邊,
睇「湯揉み」(YU-MOMI)
500yen一場, 一日有幾場。
館內有兩層,
為左方便拍攝,
小弟上左上層。
之前講過, 草津溫泉o既水係好熱的,
最熱的話可以去到94度!
係古時, 要令溫泉水溫度適合入浴,
於是就有「湯揉み」呢樣野。
所謂o既湯揉み, 其實係由人手,
用木板攪動熱水, 拎水溫降到適溫。
同一般粗重勞動一樣,
進行湯揉み, 因為又苦悶, 又濕又熱,
所以湯揉みo既人會一邊做, 一邊唱下歌咁,
於是就出現左揉み舞同湯揉み音頭。
當然時至今日唔再需要湯揉み,
而呢一切就成為表演, 吸引遊客喇。
順帶一提,
以前湯揉みo既人, 一定要係年輕貌美o既處女(無誤)!!!
但今時今日.......大家都睇睇相啦 orz
湯揉み最主要有兩個動作,
一就係將塊木板向左向右咁反,
籍以將水攪動, 見上圖。
另一個就下圖咁,
將木板向下壓,
令木板前端挑起水花,
見下圖。
啲老處女表演完之後,
現場觀眾亦都有機會一試。
出現了!!! 年輕貌美o既處女(?)
成個表演大概一小時左右啦,
睇完美女之後就散場喇。
小弟一貫捐窿捐罅o既精神,
趁住啲人排隊離開o既時候,
發現係表演場地有個露台,
可以睇到湯畑全景。(下圖)
見天仲未黑, 於是行幾級樓梯,
到湯畑旁邊o既一個小寺廟睇睇。
都係啲護身符嗰類啦。
其實小弟之所以會上呢幾級樓梯,
最主要係因為發覺係樓梯上可以影到湯畑全景(下圖)。
湯畑o既seven附近,
有條友係度玩雜技,
幾有氣氛。
(不過佢表演完會拎頂帽黎問你要打賞......)
一般訂溫泉旅館都係會包埋晚餐的。
小弟嗰間雖然唔係啲咩高檔次o既住宿,
但都包精美晚膳, 仲要送到上房間,
唔洗自己走落樓食。
食食下仲有人兄走黎幫你舖地舖for晚上瞓,
睇《花咲くいろは》睇得多,
自己親身經歷真係第一次。
十分美滿的一天~
沒有留言:
張貼留言