2014 北海道&東北旅行之 塞翁失馬 篇

琴晚...今朝先啱, 搞到六點幾先瞓,
不過瞓都瞓唔得冧,
因為怕唔知醒起身搭JR去接番愚妹。
(詳情請參考琴日o既「2014 ねぶた祭一日魷」最後幾段文字)


九點幾起身退房,
然後到函館駅搭JR。

計劃係搭特急到長万部,
再轉普通車到蘭越,
係蘭越o既愚妹上車, 同小弟一齊搭到去小樽,
再轉機場線到千歲, 5點幾到機長,
7點take off。

完美~



可惜人算不如天算!!!!!!





話說日本呢排天氣好唔隱定,
全日本周圍, 持續落大雨,
只係小弟係北海道嗰一個星期北海道冇落雨。
(前日自駕遊仲鬼死咁好天添=.=)
當小弟琴日一到左青森,
北海道已經落雨落到狗屎咁。


正當小弟係長万部打算轉車到蘭越時,
咦, 點解呢個小小o既山卡啦車站,
堆左咁多人o既?

一問之下, 原來因為琴日大雨關係冧樹,
影響鐵路唔可以行駛!!!!!!!

FUCK!!!

小弟仲要去接完個妹之後趕飛機!!!!!!



再問車站啲人,
佢地話會有代行巴士,
(即係行馬路, 但會兜番晒咁多個車站)
叫小弟等下。

需知道本身小弟啲時間都幾炆下,
仲要再等巴士黎,
巴士又一定行得慢過火車架啦,
oh shit.......我o既飛機.....

冇辦法之下唯有硬食。
打電話叫農場主人放低個妹係蘭越駅,
等小弟坐巴士去。

巴士比小弟原定鐵路時間遲左半個鐘先到......
(即係最後得番1個半鐘登機)
又要啲日本人幾咁守車速,
蟻 lan 咁開到蘭越, 又比原定再遲多半個鐘......
(即係最後得番1個鐘登機)

好在天無絕人之路,
原來冧樹o既鐵路路段係長万部同蘭越之間,
即係話搭巴士搭多幾個站之後,
由倶知安到小樽o既鐵路正常運作,
而又好好彩倶知安都算係大站, 班次比較密,
於是小弟係倶知安落巴士搭番鐵路到小樽, 再到機場。
雖然趕左啲, 但都可以順利登機.....呼........

大家睇以上o既文字, 好平舖直述, 冇乜特別,
要身處其中, 先會明白有幾咁不安。
尤其是當係長万部啱啱知道冇火車,
巴士又唔知幾時黎o既時候,
真係急到頼屎,
直至係小樽上左火車先叫安落番啲.......



同晚, 由北海道飛東京成田,
係成田機場搭JR, 十二點幾先到達上野o既酒店,

大家想像下,
由青森到函館, 再經小樽到千歲, 飛成田到上野,
 三十個小時內travel左幾多公里......


聽日開始一連兩日o既「突發東京hea住魷」


講番個標題,
點解會叫「塞翁失馬」呢?

事情是咁的,
小弟後來得知, 原來今日o既秋田,
(本身行程o既目的地)
因為落雨o既關係, 竿灯祭り取消。
即係話小弟就算去到秋田,
都冇得睇竿灯祭り。

真係冥冥中自有安排......