魷日記: 北海道 (神威岬+島武意海岸+余市蒸溜所+倶知安じゃが祭り)

星期日係農場o既假期,
本身小弟都冇話有咩特別計劃,
其他WWOOFer有計劃的話小弟唔介恴一齊出去玩,
冇的話小弟都樂得清閒。

琴晚, 星期六晚,
正當小弟計劃緊點hea左個星期日o既時候,
農場場主拎左張print out俾小弟,
話俾小弟知今日係倶知安有節慶,
問小弟有冇興趣,
同其他WWOOFer一齊去玩。

小弟又真係冇乜所謂,
問埋其他WWOOFer之後,
就決定左今日黎個自駕遊喇。
渣車o既當然係小弟啦......

小弟以兩年前對蘭越、倶知安一帶o既認識,
用左一晚就計劃左行程。
就係先去倶知安租車,
然後渣車去神仙沼→神威岬→島武意海岸,
最後番倶知安睇巡遊同煙花。

其實除左倶知安o既節慶之外,
其他景點小弟全部都去過晒......
不過算啦, 當散下心,
亦都為8月尾同屋企人o既北海道自駕黎個駕駛預習。

同平時差唔多時間食完早餐,
我地兩個台灣人、一個星加波人、同三個香港人,
就去蘭越駅搭JR。
但其中一個台灣人因為有行程,
所以唔會同我地玩, 而係繼續搭去第二個牧場工作。

一個台灣人、一個星加波人、同三個香港人,
早上九點幾到達倶知安,
車站對出o既大街已經封左路,
為全日o既活動作準備。

上圖唔係影得好好,
文字係「じゃが祭り」,
じゃが係日文薯仔o既頭兩個音,
因為呢一帶好多人種薯仔,
加上今日好多活動都係以薯仔為主,
所以節日名稱加上薯仔為gimmic。

街邊攤檔仲準備中

有個擬以滑雪道,
大熱天時邊到搵咁多雪?

動畫漫畫中唔少得,
一定會見到o既面具小檔。

今日好似仲有單車比賽添,
上圖應該係個終點,
下圖就係啲單車選手準備o既情況。

10點租私家車, 然後出發。

眼明、心水清o既朋友可能發現,
小弟提過行程第一站明明係神仙沼,
但個標題就冇呢個地方名@_@

事情係咁的,
正當離開俱知安往神仙沼出發o既時候,
發覺封路......
原因係上述提過o既單車比賽。

由俱知安到神仙沼只有一條路, 就俾佢封左......
除非兜路, 就要多好多時間,
咁之後o既行程可能會唔夠時間。

衡量過神仙沼o既可觀性,
同埋時間性之後,
小弟決定放棄呢個景點。
事後證實小弟o既決定係正確的!

想睇神仙沼o既朋友, 可以睇番兩年前o既blog~
夏天的神仙沼 :
http://japsleevefish.blogspot.hk/2012/09/blog-post_30.html
楓紅的神仙沼 :
http://japsleevefish.blogspot.hk/2012/10/blog-post_14.html

渣左兩個鐘頭車,
到達第一個目的地---神威岬
小弟冇咩野好講, 一切都同兩年前一樣,
要睇說明文o既可以click以下o既link
http://japsleevefish.blogspot.hk/2012/09/blog-post_30.html

唯一唔同o既係,
兩年前因為天雨加上有滑坡,
所以通向神威岬最尖端o既遊步道封左,
而今次, 小弟終於可以順利走到神威岬最前端!!!

上面影o既路, 就係兩年前因為天雨封左冇得行o既路段!

↑　途中有片突出黎o既沈積岩,
可以好清楚見到啲紋理~

神威岬最出有個燈塔,
原本o既燈塔, 係北海道最早興建使用o既頭幾個燈塔。

介紹神威岬出面見到嗰碌石柱,
冇乜亮點。

神威岬有幾樣野出名:
海膽、湛藍o既海水、上圖o既石柱,
同埋係大風!!!!! 可以參考下圖

左至右: 星加坡代表、台灣代表、愚妹、另一位香港代表

吹完風,
係時候醫肚,
神威岬只係得一個遊客觀光中心,
入面有手信賣、有食堂。

鮑魚朱古力=.=

炸海膽.......
想知咩味, 但小弟冇勇氣試......

去飯堂醫肚先

同日本普遍o既旅遊景點比較(以小弟去過o既咁多景點)
呢道o既性價比算係有良心。

吹完風,
再渣半個鐘車到下一個景點------島武意海岸。
可能因為仲係暑假o既關係, 超多人!!!
停車場多車到爆,
好在小弟係香港泊開街錶、街場,
等車位、攝位、泊車, 都有番咁上下經驗~
唔洗點等就泊低架車。

都係嗰句啦,
同兩年前一樣。
唯一唔同o既係---真係好X多人......

啲水又真係幾靚o既~

沿樓梯落去海岸

真係好多人,
上次小弟9月10月先黎,
一個人都冇好似包左場咁。
今次勁多人帶小朋友, 一家大細連埋狗咁落水玩。

上次小弟黎冇乜人,
加上唔太熱, 所以玩左個下午,
但今日實在係太熱,
(仲好似話係北海道最熱o既一個星期)
於是大家決定上車涼冷氣。
同時, 小弟決定臨時加個景點,
就係余市蒸溜所!!!

呢個景點, 本來係包括係小弟黎緊8月尾,
同屋企人自駕遊o既行程入面。
不過又十五十六唔知係咪真係值得黎,
所以今次叫做踩下場先。

本來導航話要一個幾小時先到,
小弟為左趕時間, 飛車半個鐘就到左......

話時話,
北海道o既馬路o既車速限制,
真係出奇地低......
初初以為北海道咁鬼大又少人,
車速限制會有咁嚴啦, 點知相反......

市街內限速40km/h,
呢個同香港差唔多,
但好似大埔道呢類咁o既路,
車速限制竟然係5、60左右!!!!!!
小弟日日都行西沙、大網仔,
所以山路飛車冇難度~

到達余市NIKKA WHISKY蒸溜所, 之前~~~
其實仲有段插曲。
話說行到半路, 有段路俾警察封左,
所有車輛都要停埋一邊「檢問」(齋睇中文字都明點解啦)。
一打開車窗, 個警察就一輪咀咁講,
話前幾日小樽有人醉酒駕撞死人, 所以要做番啲野。

小弟為免夜長夢多, 於是扮晒日文勁水皮,
用生硬o既口吻講「観......観光客? 余市......観光」
個警察即刻減慢說話速度, 問小弟有冇飲酒,
小弟又扮晒日文水皮講「酒....飲まない、嫌い」

個警察仲係窮追不捨=.=
竟然叫小弟呵一口氣俾佢聞........
我小弟心諗: 「你敢聞就得嘞!」
於是呵左啖氣俾佢聞。
個警察又真的敢聞了兩下.......
OK you win~

其實小弟見前面幾架車都冇咁聞,
可能佢地以對話羅緝性黎初步估量有冇醉酒駕駛,
但小弟因為扮晒日文差, 對話唔成立,
唯有出此下策......

好喇, 渣左大半個鐘車,
今次真係到達余市NIKKA WHISKY蒸溜所。
故名思意, 係釀威士紀o既地方。

如果係渣車人士,
停車場其係會係正門o既相反方向。
下兩圖就係停車場附近o既建築物,
係手信店同試酒場。