七日六夜 北海道的自駕魷 第一日 --- 小樽 三角市場

唔夠兩個星期,

小弟又黎北海道喇......

簡單講下原因:

原本打原掟個妹去北海道o既農場辛苦下,

小弟陪佢一個星期, 然後自己一個番香港(仲要番工架~)

兩星期後即係今日, 同父母再去北海道,

接個妹之餘自駕魷一個星期。

但點知, 不幸地, 農場斷水,

小弟唯有同個妹一齊番香港。

不過酒店呀所有野都已經BOOK好左,

所以結果愚妹唔洗係農場捱之餘,

又可以去北海道玩=.=

詳情請參考系列

1) WWOOF in 北海道 2014

2) ねぶた祭一日魷 (欠圖)

3) 突發東京hea住魷

4) 北海道的自駕遊 (本篇)

5) 日光世遺一條魷 (未寫)

6) 再黎東京hea住魷 (未完)

好, 番番正題,

一家四口搭凌晨十二點機,

到大阪再轉內陸機, 0900左右到達北海道新千歲空港。

係機場吉你媽草草食過早餐之後, 就去拎車。

都話自駕魷, 冇車邊成事呢。

坐送迎巴士, 到ワンズレンタカー千歲店拎車。

3萬幾yen連保險, 7日, 抵玩丫。

車係紅色o既TOYOTA fielder, 勁礙眼。

需知道日本人極少買紅色車, 多數都係黑、白、銀。

架車係就舊啲, 但渣到就OK啦,

日本o既服務業, 爛船都有三根釘o既~

由千歲渣去小樽, 兩個鐘唔洗就到喇。

去酒店check in, 不過時間尚早, 未上得樓,

所以先去逛下, 目的地係小樽駅附近o既三角市場。

闊別了兩年o既小樽駅,

真係冇諗過仲會再有機會黎......

由小樽駅望出大街,
好似兩年前都影過同一張相......=.=

係車站o既西邊一角,
可以見到一條細細o既樓梯,
上去就係三角市場。



日文「市場」, 即係街市o既意思,
三角市場, 市面上o既旅遊書都有介紹,
書入面都會題及, 因為近車站, 而且比較多遊客,
所以三角市場物品o既價格,
都比其他市內o既市場稍貴。
但小弟唔係好想去到咁遠, 所以都係三角市場算啦。



三角市場因為類似三角形所以有咁o既名。
市場勁細, 得一條唔夠百五米o既主路,
絕大部份都係海產店同海鮮食市。

好快地, 小弟o既父母已經俾上圖o既瑤柱吸引左......

成條三文魚都只不過係五千幾yen。
(但其實香港o既三文魚來貨價都只不過係幾百蚊)

差唔多係LUNCH o既時間,
所以求其入左一間店食。

超平!

最貴係呢個海膽飯, 仲要係海鮮價。
(小弟食嗰時係3500yen......)
顏色較深嗰種海膽, 好似係小樽一帶o既特產。
仲要5-8月先有得食~
但真係好甜又唔腥。

因為飯入面嗰啲凡立貝太好食,
全家一致讚成追加一份凡立貝刺身,
上圖o既都只不過係400yen!!!!!!
最重要係,
小弟從來未食過爽口o既凡立貝~~~!



遊完三角市場,
就到酒店放低行里。

小弟一定下榻o既酒店,
係由小樽一間舊銀行改裝而成。
入面仲保留左銀行舊有o既一啲建設。

小弟一家住o既, 重要係好特別o既一間房,
係由金庫(即甲萬)改裝而成的!
當年個鐵門都仲係度。

成呎厚o既鐵門, 真係炸都炸唔得開~

間房都唔算細。




放低左行里, 已經係四點,
出去嗰條有好多玻璃店o既街行下。

而家先知《進撃の巨人》有47都道府県ver.

中間嗰兩件粉藍粉紅o既小朋友衫好得意,
寫住「なまらイケメン」同埋「めんこいぎゃる」。
意思係「幾靚仔」同「可愛女生」
其中「なまら」同「めんこい」都係北海道方言~

當然唔少得薰衣草味雪糕啦。

因為雙親對玻璃冇乜興趣,
所以都冇乜買野,
而小弟係第二次黎,
所以都冇乜新奇野好寫。

想知多啲小樽o既景點,
大家可以參考下之前o既BLOG
北海道 小樽 (附加《最終兵器彼女》聖地巡禮)