魷日記: 七日六夜北海道的自駕魷第二日 --- 深川ひまわりの里 + 旭川拉麵村 + 旭川動物園 + 成吉思汗

朝早七點起身, 食完早餐就渣車去今日行程第一站,

位於旭川附近, 深川o既ひまわりの里。

ひまわり即係中文o既向日葵。

離遠已經見到一大片花海

普通入場唔洗錢,
但佢寫左個牌, 話叫大家支持下啲經費。
另外, 每贊助滿500yen, 可以抽一次獎。
小弟見幾過隱, 一家四口黎到,
俾少少錢支持吓都OK丫,
於是俾左500yen, 然後叫愚妹去抽獎。

日式攪珠,
結果搞左個安慰獎---向日葵花籽......

進入主場前,
有幾排向日葵,
係種左唔同品種向日葵o既田.
例如下面毛茸茸呢種。
其實仲有其他品種,
不過好多已經過左花期, 謝晒......

上面啲圖睇, 好似都唔錯,
事實上八月尾已經係花期期尾,
大半向日葵都已經謝左,
睇吓下圖o既close up就知www

所以話, 睇人地旅行啲相,
十張有九張都係揀過靚先post 出黎的......

除左向日葵花田之外,
隔離仲有個鴨場, 可以隨便睇。
大家亦都可以買啲鴨糧餵鴨,
不過小弟就真係冇咁好氣。

時間係中午,
係時候去食野。
去旭川動物園之前,
經過旭川拉麵村食個lunch。

大大話話成十幾間拉麵店, 點揀?
好簡單, 睇下邊間最多人排隊食就知。
結果, 就只有一間係勁多人排隊~
其他店未至於拍烏蠅, 但分別好明顯......
於是二話不說就走去排隊。

就係下圖o既梅光軒!

勁多人排,
不過好在日本人食拉麵o既文化,
係嗱嗱聲食完嗱嗱聲走,
所以番枱番得快, 排隊都唔洗等好耐。

得獎, 話係全旭川最好食~

小弟一家人, 點左最基本嗰幾種,
就係鹽味、味噌、醤油同埋拉麵村限定辣味,
亦即上圖最上嗰四碗。

可惜冇豬骨湯底揀......

麵o既大細係中等, 唔粗唔幼, 比較奇怪,
不過幾有口感, 冇鹼水味。
湯底最好食係鹽味,
醤油都幾好, 唔係得個鹹字, 帶甘香。
最失敗係個辣味, 浪費左個湯底......

好多名人o既簽名,
不過小弟都唔會知係邊個架喇......

拉麵村呢個小小o既建築物入面,
除左十幾間拉麵店之外,
仲有一個common area,
入面有啲長凳, 有啲介紹(介紹拉麵村)
同埋有下圖呢個神社仔,
不過睇個樣都知冇歷史&參考價值。

食飽飽,
行程同小弟預計o既啱啱好,
渣半個鐘車, 去旭川市旭山動物園。

老實講,
如果小弟自己一條魷的話,
未必會揀動物園作為旅遊景點,
因為小弟一向都唔係好鐘意
睇一啲人為, 而又冇乜歷史/文化價值o既野。
(動漫例外)

不過小弟呀媽話想睇下人地啲動物園,
而旭山動物園係日本又數一數二,
所以納入行程裏面。

如果係渣車去旭山動物園o既朋友,
會去到公園正門o既另一邊,
即係下圖o既東門。

入場費820yen, 唔算貴。
入場券印刷精美, 可以保存作留念。

一入去,
當然唔少得買手信同拍照留念o既地方啦。

旭山動物園依山而建,
如果好似小弟渣車o既朋友,
由東門進入公園之後, 可以沿斜路向下參觀。

跟小弟一樣沿斜路向下參觀的話,
第一個會見到下圖o既水豚。

正當小弟奇怪緊,
點解係水豚範圍前面, 咁多人仰高頭望o既時候,
原來水豚背後嗰個鐵架之上,
仲有幾隻馬騮---黑掌蜘蛛猴。

原來呢個館啲動物係混養的!!!
估唔到旭山動物園一黎就俾到驚喜小弟。
另外, 小弟因為有去過荔園o既經驗,
所以一直都認為動物園係好臭的,
但呢個水豚+黑掌蜘蛛猴o既地方,
一啲味都冇。

仲有o既係, 呢度啲動物館,
盡量都係採取開放式o既方法飼養,
例如呢個水豚+黑掌蜘蛛猴o既展覽,
其實只有一個矮欄, 確保水豚+黑掌蜘蛛猴跳唔到出黎,
而上頭o既鐵架(上圖), 係延伸出矮欄外,
換句話說, 啲黑掌蜘蛛猴其實係觀眾o既頭頂上面。
後面會有更多描述。

小弟之後o既介紹, 未必係按路程順序。

其中一個雀籠, 係澳洲駝鳥,

環尾狐猴

白腎長尾猴 (冇打錯字)

下圖開始係另一個大館,
入面有三隻長臂猿,
分別係父母, 同埋啱啱出世冇耐o既BB,
可以係下面第一張圖見到BB猿,
黐住媽媽個肚皮唔放

兩隻父母非常活躍,
周圍爬又周圍跳, 。勁嘈

其實同一個館入面仲混養住幾隻鹿,
不過呢晒係凳底, 冇人見到......

爬到好高, 有幾高?
睇吓下圖就知。

頭先都講過,
有啲館係用開放式設計,
睇吓上、下圖就知有幾開放。
有啲位, 啲馬騮仲可以係遊人頭頂爬過,
會有標語提醒小心飛來糞便.......

另一個籠o既猩猩。

上面嗰隻係大猩猩,
下面o既係後生啲o既猩猩。

貓頭鷹館。
日本人好鐘意貓頭鷹,
因為貓頭鷹日文發音有「唔洗辛勞」o既意思~

鷲

松鼠

狸貓,
其實狸貓冇想像中咁得意......

下面開始係猿人館。

猩猩o既標本,
展示猩猩行o既時候腳o既觸地點。

同樣地, 呢個猩猩館可以由多角度睇猩猩,
而其中一個方法就係進入透明o既管道。

都唔知係人睇猩猩,
定係猩猩睇人......

不過真係好近距離!!!

屎忽窿都見到!

孔雀唔洗講啦。

下面三張係兩棲館影的,
不過因為館內太暗,
所以影得唔多。

鹿場入面o既蝦夷鹿。
蝦夷係北海道o既別名。

雄鹿對角好正~
三生牌~~~

狼館
入面有白狼同灰狼。

咁啱見到佢地打交,
嗌晒救命, 勁嘈。
白狼好似唔係好夠打.......

睇番啲可愛啲o既野。
小貓熊, 勁受歡迎o既一個籠。
又真係幾可愛o既~

仲會係你頭上爬過。
真係好可愛~

北極熊館。
其實北極熊冇想像中咁白,
偏黃。

海豹館。
其實老老實實,
小弟唔係好識分海豹同海狗......

亞洲虎

塊幾寸厚o既玻璃,
俾隻老虎抓到花晒。

棕熊

獅子

金錢豹

黑豹

企鵝館

仲可以落水底睇。

哺育室

長頸鹿

河馬。
呢隻河馬,
係旭山動物園初代河馬o既後代。
其實諗諗下,
呢啲動物一出世就困係個館入面過世,
都幾慘......

白色一條條唔係玻璃o既設計,
而係俾河馬啲牙刮成的。

鴕鳥

除左以上o既館之外,
仲有兩個, 可以俾大家摸下親近下o既小農莊。
一個係下面幾張圖展示, 養左綿羊、山羊o既牧場。

小朋友勁驚

而另一個小牧場就養左啲鴨呀、兔仔呀咁。

說實話, 呢個動物圍真係令小弟喜出望外,
完全打破左小弟對動物圍o既概念 (都係荔園啫)。
因為小弟一直認為動物園係一個又臭, 又污糟,
只係隔住個欄杆睇動物o既地方。

呢旭山動物園, 一啲都唔臭,
入面仲有幾個館係開放式,
啲動物係頭上走來走去。
就算係用籠困住o既動物,
大家都可以到籠o既唔同地方,
作多角度觀賞。
而籠入面非常貼近自然環境o既設計,
亦都令人覺得好似身處大自然咁。

總括黎講,
小弟非常推薦大家去旭山動物園。