魷日記: 七日六夜北海道的自駕魷第四日 --- 帶廣 ( 花畑牧場+ 十勝ばんえい競馬 + 真正十勝豚丼)

離開民宿ステラ, 進入第四日o既行程。

要求甚高o既父親, 對呢間民宿o既評價甚高,

母親仲話有機會的話, 黎住番幾日咁話。

小弟都覺得, 冇預約到呢間民宿o既晚餐有少少遺憾,

一次黎一定預約埋晚餐試下~

以小弟o既超緊密變態行程,

早上九點就已經要出發,

事關淨係上午, 就已經要渣150km o既路程到

帶廣南部, 全速前進都要兩個半小時......

當然啦, 辛苦o既只係小弟,

因為其他人上左車就開始瞓......

本身打算上午都係係富良野一帶睇下花田的,

不過話晒琴日都睇左三個,

母親話不如睇下其他野,

於是小弟採用備用景點,

就係帶廣o既花畑牧場。

日本字o既畑(HATAKE), 係泛指稻米田以外o既田園,
即係種瓜呀、種菜呀, 都係叫畑,
而花畑, 就指花田。
但事實上, 呢個帶廣o既花畑牧場,
花畑o既部份一啲都唔多,
所以牧場o既部份比較出名,
仲有專門製作芝士同其他奶類製品o既工場。

花畑牧場仲有一樣品牌食物叫もちっぷす生キャラメル(下圖)
入面o既餄類似係粟二燒o既質感,
而外面包有牛油味奶味勁濃o既焦糖,
好好食, 陣間再講。
上圖就係公開俾參觀者睇o既工場。

不過睇工場之前, 先醫飽肚先,
因為時間已經係12點半左右。

下圖就係花畑牧場入面o既食肆

細心睇下MENU, 當然唔少得奶酪食材o既食物啦。
下圖係食肆o既內裝。

上圖係一份莫薩里拉乾酪蕃茄意粉。
(モッツァレッラのトマトソースパスタ)
白色嗰幾個波就係莫薩里拉乾酪。
老實說, 小弟唔係好識欣賞芝士......
加上小弟唔係好鐘意莫薩里拉乾酪o既口感,
所以唔評論芝士嗰部份,
不過蕃茄意粉嗰部份就好滿色,
酸甜味balance得好好, 連唔太鐘意蕃茄汁o既小弟, 都覺得好食。

跟住嗰個意粉就勁囉。
個名叫三重芝士意粉(トリプルチーズパスタ)。

因為日本食肆出品慢, 所以呢意粉要叫號碼先出去攞。
出到櫃枱, 點解得一盤白烚炒意粉o既?

原來呢個意粉要係客人面前一邊講解一邊整......

意粉無啦啦話「黎緊會整三重芝士意粉你睇」,
殺小弟一個措手不及,
即刻hold住, 叫姐姐等小弟攞番個相機先好整。
一如其他香港人....有乜野食, 都係相機食先......

嗱嗱聲番去櫃枱, 好彩人客唔多,
意粉姐姐好耐心咁等埋小弟先開始。

趁住啲意粉仲係熱辣辣,
就先將啲意粉,
放係係一個牛肉佬俎板咁大o既固體芝士上面碌碌下。
(下兩圖)

小弟對於啲外來語片仮名比較弱,
加上啲芝士名同啲芝士一樣, 都係一舊舊,
所以唔記得啲芝士種類叫咩名喇......

同一時間, 加熱另一種芝士(下圖左邊)。
其實啲種芝士已經係半流質,
不過加熱之後, 更加容食撈均。

將啲意粉放過去, 再灑第三種芝士粉,
三重芝士意粉就完成。

呢個意粉, 仲附有烤麵包粒(下圖左下)
俾客人醮芝士食, 唔好浪費一點一滴芝士。

先講個三重芝士意粉先。

真係好香!!!
小弟唔知講咩好, 可能小弟平時食得好野少,
頂多都係食茶記o既白汁意粉,
但呢個芝士意粉o既芝士味, 真係前所未有咁香濃,
又唔會太鹹。

另外, 個PIZZA都好清新,
比起PIZZA乞嗰啲搞呢搞路o既PIZZA,
小弟全家一致認為呢啲冇乜餸菜,
簡簡單單o既PIZZA仲好食。

食完咁多芝士野, 真係好濟,
好在花畑牧場, 真係一個好大o既牧場,
食完野可以行下消下濟。

有小羊爛之外
馬路對面都係犀於牧場範圍o既牛欄。

牧場內仲有少量奇奇怪怪o既生物,
例如下圖名為リャマ(大羊駝)o既生物。

「興奮得濟會吐口水, 又會兩腳站立, 大家小心」
下圖即刻示範你睇。

其實幾樣衰......

下圖係侏儒馬

頭先講過, 呢個牧場有自己o既產品,
其中一樣叫もちっぷす生キャラメル
下圖就係其工場。

工場入面有公開o既部份,
俾參觀o既人睇下製作過程。
入面包括有製造芝士o既部份,
同埋製造もちっぷす生キャラメルo既部份。

其實係呢啲環境工作, 都幾大壓力......

牧場內當然唔少得賣自己製品o既賣店啦。

上圖就係小弟極力推薦o既もちっぷす生キャラメル,
除左焦糖之外, 仲有隻味,
不過都係焦糖味最好食。
由於もちっぷす生キャラメル係北海道限定,
所以用黎做手信一流,
小弟一家掃左唔少派街坊XP

淨係花畑牧場已經可以打發半日......
不過下午, 小弟重有一個景點要去。
事實上, 花畑牧場呢個作為旅遊景點,
其實都唔錯, 有得食、有手信買、
有少少野睇、又可以散散心,
不過交通唔方便係一個缺點,
如果小弟唔係渣車, 都唔會黎到花畑牧場。

由花畑牧場渣大半個鐘車番番入帶廣市中心,
趕去下一個景點, 就係帯広競馬場。

你話唔係呀馬, 搭咁耐機, 又開咁耐車,
去到北海道睇賽馬?
NO, NO,NO,
事關呢個係非一般o既賽馬,
全世界只此一家。

帯広競馬場免費泊車,
泊低左之後, 本來打算先去帯広競馬場旁邊o既資料館參觀,
可惜原來資料館係收1600的......

咁唯有去睇跑馬啦......又唔洗咁急,
一日跑好多場, 由上午跑到黃昏。

由停車場到競馬場入口途中,
都有啲賣當地產品o既賣店,
順道入去逛下。

事實上, 小弟會知道北海道有帯広競馬呢個景點,
全因為一套叫《銀の匙》(銀之匙)o既動畫。
呢套動畫正正以北海道農業學校為背景,
講述男主角由東京黎到呢個不毛之地讀書o既學校生活,
期間, 男主角對於人生意義、目標、以及對食物、食用動物,
有新o既領悟、反省, 係一套好有正面意義o既動畫。

動畫中其中某啲情節
就係取材自帯広競馬場。
於是小弟千方百計,
都要將帯広競馬場納入行程內......

當然, 當下日本經濟有好一部份係由動漫衍生出o既效益,
呢個情況下, 當地政府、商店都不忘分一杯羮,
上圖同下幾張圖, 就係動畫《銀の匙》o既一啲關連商品。

上圖就係動畫中描畫o既競馬場入口,
大家可以比較一下下圖小弟影o既真正入口。

冇錯, 經過上圖o既入口, 就係正正式式競馬場o既範圍。
同香港o既馬場唔同, 境內係冇年齡限制,
所以小弟個未夠秤o既妹都可以一齊入場,
只不過未夠秤o既小朋友唔可以買馬票。

上圖就係精美o既入場券,
背面(下圖)係當年o既年曆,
上面註有賽馬o既日子。

一入到建築物內,
就已經係紀念品店。

當然唔少得俾大家影相留念o既地方。

上圖o既木架, 放o既係當日出場賽事o既資料,

而下場就係顥示賠迕率o既電視,

不過就係算係識少少日文o既小弟, 都實係睇唔明呢啲matrix......

上圖係填馬票o既地枱,
下圖係馬票, 唔好問小弟點填......

帯広競馬場, 唔止淨係有自己o既賽馬,
仲會直播日本其他地方o既賽馬,
市民亦都可以用system下注,
實在係呢啲山卡啦地區重要o既娛樂。

好喇, 講左咁耐帯広競馬,
究竟有咩特別, 要咁山長水遠黎睇呢?
答案係: 帯広競馬唔係鬥快......

嚴格黎講, 的確係鬥快衝線,
但唔係要啲馬跑得快

上圖黃色o既就係賽道。
咦, 點解有兩個小山o既?
因為帯広競馬, 係要求馬匹拖住重一噸o既重量,
走完 200米o既路程, 當中包括上圖所見o既兩個小山。
所以帯広競馬講求o既唔係速度, 而係力量。

之所以會產生呢種咁特別o既運動(?)
係因為當年開發北海道時,
主要都係要靠馬匹幫手。
咁o既情況下, 馬匹o既價值就取決於馬匹o既力量。
於是就會俾馬匹互相拖拉, 又或者係拖重物,
久而久之就成為左節日活動, 以致而家o既帯広競馬。