魷日記: 七日六夜北海道的自駕魷第五日 --- 釧路市場 + 阿寒湖

晨早流流起身, 今日黎一個遠征,

由帶廣出發, 向西行經釧路, 北上阿寒湖。

九點左右出發, 渣兩個鐘車就到達釧路。

釧路係北海道東南面o既沿海小鎮,

主要以漁業為主, 而千里迢迢黎到釧路,

就係為左去釧路漁市場, 試下佢地出名o既勝手丼。

釧路和商市場, 市內最出名o既魚市場,
亦都應該係遊客唯一會黎釧路o既目的。

雖然係魚市場, 但市場入面乾淨企理,
地面一滴水都冇, 同香港o既街市有好大差別。

各色各樣海產, 琳瑯滿目。

看官細心的話,
可能會留意到下圖開始,
啲攤檔擺賣o既都係一啲已經切好o既魚生。

點解全部都切好晒架呢?
就係因為「勝手丼」喇。
勝手, 日文かって (KATTE),
意思係「自主」「自把自為」「自己搞掂」,
丼......唔洗講, 香港人都知係咩啦。

於是故名思意, 勝手丼, 即係客人自己話事要咩餸o既蓋飯。

咁點樣話事呢?

原來市場入面有好幾檔店舖,
會售賣淨白飯, 按唔同量有唔同價錢。
遊客買左飯, 就可以捧住碗飯,
到唔同o既店, 揀心儀價錢o既魚生、海鮮,
叫店家放到你碗飯上面。

可以見到下圖店員姐姐,
左手托盤上面o既白飯,
就係客人由第二間店購入。
客人揀好魚生、海鮮, 話俾店員姐姐知,
佢再用夾同你夾。

如果看官有睇開旅遊書或者電視節目, 係介紹釧路和商市場的話,
好可能會覺得, 上、下圖呢位鮮紅色衫o既嬸嬸好面善。
無錯, 唔知點解個個都係介紹呢間勝手丼店,
可能因為貪佢係正成個市場中央,
而店前面又有公共進食o既空間, 方便拍攝掛。

頭先提過, 上圖紅衫嬸嬸o既店前面有公共空間,
有枱有凳, 大家搞掂晒啲餸之後, 就可以坐低慢慢食。

小弟一家四口,
要左大、中、細飯各一碗。

明太子、帶子、長腳蟹棒、甜蝦、幻の海老

北寄貝、甜蝦、海膽, 仲有隻蝦唔記得係咩名。

成日聽話日本人食鯨魚肉, 聽就聽得多,
不過真係好少見, 想食都食唔到,
今次見到, 死人都要件試下。
上圖深紅色嗰件就係。

味道係點? 老實講,
比較大陣血腥味, 唔係話特別好食......

事實上, 話日本人食鯨魚肉, 其實事實並不如此。
會有咁o既傳言, 係因為古時日本以捕魚為生,
鯨魚對漁夫有威脅 or 影響魚獲, 所以獵殺鯨魚。
食得唔好嘥o既情況下, 鯨魚成為食用肉之一,
但時至今日, 係日本魚生、壽司舖都未必會見到鯨魚,
莫講話有冇人點。

番番黎,
雖然係偏遠左啲.
但假假地都係一個旅遊景點,
所以市場入面都有唔少手信賣。

而釧路都幾近阿寒湖, 所以唔少得綠澡球o既紀念品。
有關綠澡球, 陣間再講, 係時候出發渣一個小時車到阿寒湖。

Check in左酒店之後,
周圍行下, 第一站先到阿寒湖畔ECO Museum Center,
入面有阿寒湖一帶o既地理、生態等介紹。

↑　一入到去會見到手信店
↓　同埋有介紹時令動植物o既白板。

館o既最入面, 有一個廣闊o既展覽場,
展示並介紹阿寒湖o既動植物。

黎得阿寒湖, 識睇一定睇綠澡球,
淨係睇佢綠色毛茸茸, 圓圓碌碌就已經覺得有趣。
綠澡球有咩特別?

綠澡球本身係一啲絲狀o既水澡,
要有特別o既環境因素先會集合成一堆,
要成為渾圓o既球狀, 條件更加嚴苛,
而世界上有大型o既渾圓綠澡球,
就只有冰島o既米湖同日本阿寒湖。
(不過好似話米湖因受到破壞, 已經唔係點搵到大型綠澡球)

上圖講解綠澡球變圓形o既過程。

阿寒湖奇趁異獸之一, ギンブナ,

呢種魚好過隱, 只有乸, 冇公。

乸產卵之後, 會誘使其他同科唔同種o既雄性フナ令佢啲卵受精。

ヒメマス(HIMEMASU), 漢字「姫鱒」,
又係阿寒湖奇趁異獸之一。

姫鱒係サケ科 o既其中一種,
食開日本魚生或者識少少日文o既朋友,
見到サケ可能已經諗起三文魚,
三文魚的確係同一科, 但唔同種。
(讀番中學生物科o既「界門綱目科屬種」啦~)

咁姫鱒有咩咁特別呢?
原來呢種魚係淡水長大,
可以游落海成為鹹水魚(降海型), 就係ベニザケ(紅大麻哈魚)
而留番係淡水出唔到大海(湖沼残留型), 就係姫鱒。

咁有咩咁奇趁異獸呢,
係因為莫講話阿寒湖,
就連成個北海道都唔係好搵到ベニザケ(紅大麻哈魚),
咁最初o既阿寒湖姫鱒又係由邊度黎架呢?

阿寒湖雖然位處偏遠,
但個展館一啲都唔虎,
乾淨整潔, 又有好多實用資訊,
不過唔識日文o既朋友可能有少少難度。

小弟黎呢個阿寒湖畔ECO Museum Center,
其實仲有一個原因的, 就係睇ボッケ(BOKKE)。
唔係鬧人嗰句ボケ,
呢個ボッケ, 係指因為地熱而令泥漿形成泥漿泡,
都唔知係擬聲字定係真係叫呢個名喇。

係阿寒湖畔ECO Museum Center o既側門進入遊步道,
途中綠樹林蔭, 巨樹蓋頂。