青森ねぶた祭一日魷

琴冕晚玩到好夜先?,
但今朝一早就起身喇。
事關今日開始,
先至係小弟黎日本旅遊o既真正開始!!!

小弟將會由北海道落去本州o既東北部,
參觀東北夏季三大祭,
分別係青森o既ねぶた祭り、秋田竿灯祭り、
同埋仙台o既七夕祭り。


晨早流流六點唔到就起身梳洗,
因為小弟要坐0717o既JR列車,
先到長万部, 再轉特急到五陵郭駅。

有睇開小弟BLOG o既朋友,
都知道小弟平時一條魷旅遊係勁慳皮的,
點解會俾咁貴錢坐特急?
因為小弟想趕得切睇今晚o既ねぶた祭り之餘,
又可以坐到青函ferry。



青函ferry係乜?
其實係航行於青森港同函館港之間o既渡輪,
除左載人之外, 仲可以載車,
為車輛行駛於北海道與本州之間o既重要工具。
但碼頭比較隔涉, 加上航程比較長時間,
所以冇乜遊客會用, 但小弟一直都好想試下搭......

十點幾到達五陵郭駅,
但仲要拖住行里行半個鐘左右先到碼頭。
下圖o既建築物就係買船飛o既地方喇。

正如頭先講,
呢架船係載車行走於本州及北海道o既重要工具,
當中不乏貨車, 甚至係豬車......

排隊上船時見到上圖兩位仁兄,
係由首爾黎日本環島踩單車o既朋友,
其志可嘉!



上船時係乘客先上,
然後先到車。

船上面o既客室有兩大個,
不過只係舖左地毯o既地台,
大家除左鞋就係上面hea,
坐呀、瞓呀, 乜都有。

另外仲有地方有梳化、電話室、
以及陸杯麵o既地方添。

BTW, 其實架船就係咁多,
冇乜特別......

一望.......有際o既津輕海峽




一坐就坐左四個鐘=.=
當中有三個鐘都係瞓著左的。



到青森港, 落得船, 都已經四點幾鐘。
老實講, 小弟純純只係想試下搭,
真係冇乜特別, 勸大家如非必要,
都冇乜必要試。

可能小弟search錯左落船o既地方,
原來距離青森市中心都幾遠下,
加上天時都幾熱, 件衫濕晒。



好似話話有颱風由九州打緊上黎,
仲要幾勁下, 希望今晚唔好落雨啦。
不過北海道好似已經落得好勁。
(打後行程o既伏線!!!!!!)



講番番黎,
兜遠路都有好處,
真係塞翁失馬。
小弟行勁一個會場,
嗰度放置左今晚ねぶた祭り會用o既花車。
本身小弟都有係網上見到呢個會場,
但因為好似比較遠所以放棄左,
估唔到結果都係黎左。

青森ねぶた祭り,
真正o既來源暫時都未有定案,
其中一個講法,
話係由中元節o既點燈儀式改變過黎,
到今日, 變成左巨形紙紮花車巡遊。
每架花實都係人手紙紮、上色。

花車未出發之前, 就放係上圖o既會館後面,
供遊人參觀。
同場仲有好多攤檔。

唔同花車有唔同主題,
不過呢度唔逐一講喇,
看官有興趣的話, 上網search下啦~

真係精細到唔似係紙紮...

ねぶた祭りo既花車,
會係青森駅出面o既大街兜一圈,
1810開始封鎖馬路,
正式係1830開始。

估唔到兩年後, 又會再黎呢個山卡啦車站......

已經可以見到好多,
著住傳統ねぶた服飾o既人。
ねぶた服飾可以以幾千yen租借一晚,
不過小弟就唔用呢啲錢喇。

沿途有好多攤檔賣野,
另外, 遊行路線兩旁,
擺滿要預先俾錢買飛o既觀賞席。

而一啲冇擺到觀賞席o既路口、空間,
都會有人貼膠紙係地面霸位。
其實都霸得幾誇張~

遊行花車同隊伍,
都平均分怖係遊行路線上,
然後運行一圈,
換句話說, 其實係邊個位睇,
只要由頭等睇到尾,
都可以睇晒咁多架花車。

但始終都係有所謂o既「先頭」,
係位於遊行路線o既青森駅o既正對面,
比較遠, 步行都要廿分鐘以上。
小弟反正冇野做,
於是向住所謂o既「先頭」地點進發。



真係所以有可以稱乎為「空間」o既地方,
唔係擺左觀賞席, 就係俾人一早霸左。
不過, 早起的鳥兒有蟲食,
小弟黎得都算早,
可以係「先頭」附近,
搵到個建築物o既樓階落腳!

就係小弟坐左冇耐,
有兩個阿嬸黎到小弟旁邊,
好興奮咁話呢度有個空位,
不過兩個都想去買小小野食,
但又怕行開左冇左個位。
於是小弟自動請纓話幫兩位睇位。
兩個呀嬸寒暄左一輪,
結果都係俾小弟睇位, 然後走左去買野食。

其實都冇話為左啲咩回報,
不過兩位阿嬸都好高興,
買左啤酒請小弟飲,
又分左啲佐酒小食俾小弟,
仲請小弟食燒凡立貝添~
真係意料之外。

距離觀賞席正式開始,
仲有若干時間, 不過兩位阿嬸非常健談,
不斷同小弟傾偈, 一啲都唔悶。

傾下傾下, 好快就到左正式花車巡遊時間。
首先見到啲人呀車呀排晒陣咁。

先係有三個Missねぶた係架BENZ帶頭,
然後後面有兩架小花車及一個大太鼓跟住。

↓　大太鼓

大太鼓過左之後,
好快就迎來第一架真正o既ねぶた花車喇。

老實講, 其實小弟最初唔係好期待呢個ねぶた祭り,
因為小弟一向都對花車唔係太感興趣,
當年o既衹園祭亦如是。

不過可能因為希望越大失望越大,
今次係相反version, 今次o既ねぶた花車,
俾到小弟十分大o既驚喜!!!!



原因一來, ねぶた花車真係好大架, 十分有氣勢,
而亦因為架花車大, 上面o既人物造形十分有立體感。
二來, 架花車唔單止就咁行,
下面推車o既人, 仲可以上下左右搖擺花車台,
行進路線又會左右不定, 更突顯花車公仔o既立體感。
三來, 啲人仲會將花車推埋觀眾度,
突出花車o既巨大之餘, 又能帶動氣氛。

最後當然唔少得前前後後搞氣氛o既人啦。
ねぶた祭り遊行, 除左有花車之外,
仲有「囃子」同「跳人」。
囃子就玩啲打樂器、打鑼打鼓o既人啦。
而「跳人」就係跟住花車前後,
發晒顛又唱又跳o既人。

一架花車最多可以有幾百個跳人,
而且嗰啲跳人仲唔係hea住跳,
而係真係好開心落力咁跳。
街邊o既觀眾, 有時又會侵埋落去顛跳埋一份,
真係超級有氣氛。

上、下圖係一架裝左水o既車,
啲太鼓手、囃子、跳人, 攰得濟熱得濟的話,
會係入面滔水飲或者淋上身。

下兩圖, 係展示頭先提過,
 花車上半部o既紙紮部份,
係可以上下搖晃,
下兩圖可以見到推車o既人條橫桿(紅白間條),
可以推高推低。

 又見番三個Miss ねぶた,
即係遊行已經完左一圈,
啲花車差唔多收山。

因為行番番車站, 係遊行路線o既反方向,
所以仲可以見到開頭幾架花車。

就係小弟睇完ねぶた祭り, 開開心心入閘上月台,
打算登上開往秋田o既車參與聽日o既竿灯祭り之際,
傳來一個惡號!!!!!!

小弟見到手機有一個訊係黎自愚妹的。
內容係話農場冇水, 其他WWOOFer都已經走晒,
叫小弟番去接佢走。



小弟即刻打番電話去農場了解事件啦。
結果事情就如短訊o既內容一樣,
因為農場嗰區唔知點解冇水,
走得o既人都離開嗰區。

小弟當然唔想因為咁而打亂精心策劃o既三大祭之旅啦,
但同農場場主交涉過之後,
都係要小弟番去接番愚妹。

於是小弟唯有放棄開往秋田o既車,
買過張特急車票, 先去函館。
因為農場所在o既蘭越係啲山卡啦,
呢個鐘數已經冇車去,
能夠過到津輕海峽去到函館都真係偷笑.......



晚上十二點, 成功到達函館,
但要搵地方過一晚夜。
因為成身臭汗,
加上要嗱嗱聲重身安排之後o既行程,
所以網吧唔係一個好o既選擇。
(未必有得沖涼, 又要顧住唔可以太嘈影響人地
於是工作效率會降低)

拖位行里搵酒店,
點知其實有好多人都係睇完ねぶた過黎函館過夜,
間間酒店都full晒......
原來唔係有錢就得的.......

最後搵到間又舊又細o既酒店。
睇清楚啲, 原來正正就係兩年前住o既酒店!!!
真係有咁啱得咁蹺......



嗱嗱聲沖完涼,
計劃下之後點算。
究竟聽日點樣去接個妹?
之後o既行程係同個妹一齊去秋田丫,
定係同佢直接去東京? (因為小弟機票係東京走)



計左一大輪,
平衡晒時間、金錢、食宿之後,
決定都係接左個妹之後直接去千歲,
搭飛到東京, 係東京過兩日再飛番香港算數。

可憐小弟計劃o既秋田竿灯祭り、仙台七夕祭り,
同埋仙台Wake Up Girls聖地巡礼.......
就咁就泡湯了.......



訂好晒機票、酒店,
時間已經係凌晨?早上?五點鐘,
瞓兩個鐘, 七點又要起身去搭JR了.......