魷日記: 七日六夜北海道的自駕魷第三日 --- 富良野一帶(青い池 + 四季彩の丘 + Flower Land + Farm富田 + Wine工房 + 芝士工房)

七點幾起身還左房,

就由旭川渣一個小時o既車,

去下一個目的地城鎮---美瑛富良野一帶喇。

0900

第一站係打算去購物連食早餐o既地方,

一個叫「美瑛選果」o既地方,

係一個出售美瑛一帶農作物o既中心。

小弟明明上網check過, 間野係0900開門,
但唔知點解去到o既時候,
只係見到零星o既員工係度準備緊。
睇下門口o既告示, 1000先開始營業......

點解會咁架......

早餐食唔成, 食左門羹......

但小弟一家唔可以等到佢開門,
因為咁樣會令本身緊密o既行程更加落後,
所以只好放棄。

好在小弟一早有backup plan,
就係去富良野途中, 兜少少路,
去一個叫「青い池」o既地方。

香港旅遊書好似冇乜介紹,
但其實日本旅遊書都會有講,
而且到左北海道, 都可以係機場、鐵路等,
見到有相關o既廣告。

上圖同下面一堆圖就係青い池。
日文「青い」即係中文o既藍,
鬼唔知水係藍色咩(其實唔係)......
不過呢個池又藍得好特別,
唔係深藍綠色,
而係真係青青地色白白地咁。

先講下青い池o既來歷先啦。

呢個景點, 其實係陰差陽錯之下形成的,
可以話係一個半人工o既景點。

是咁的, 事源係政府,
為左防止附近十勝岳噴發而堆積o既泥石引起泥石流,
於是係美瑛川呢條河起左幾個堰堤。

而青い池就係因為河水上漲而形成o既一個大水氹。

至於點解啲水綠得咁有趣,
主要係因為附近o既湧泉含有高濃度o既氫氧化鋁。
氫氧化鋁係白色o既固體而不太溶於水,
氫氧化鋁混入水中, 加上陽光折射等等,
就形成呢種青青白白o既顏色。

因為本來o既白樺樹都被淹死,
但樹幹仍然棟係湖中,
景象有啲似打機入面啲奇幻o既場景咁。
俾啲行山人士、攝影師發現之後,
以口傳口, 之後大家都叫呢個湖做青い池喇。

就咁睇相可能唔覺咩一回事。
加上小弟影嗰時又陰天,
但現場睇, 又真係幾靚幾特別的。

逗留左半個鐘之後,
就按行程到美馬牛出名o既花田---四季彩の丘。

呢個相信小弟唔洗點介紹, 好多人都會識,
因為香港o既旅遊書都介紹不少。

四季彩の丘 o既古祥物(?)
用乾稻草埋成o既公仔。
小弟一見到呢呢綁好左o既稻草,
就諗起以前係農場搬稻草o既慘況。

稻草公仔前面都有牌寫住,
叫大家唔好亂搞, 砸落黎唔係講笑的......

其實而家時值八月下旬,
已經錯過左好多花o既花期,
所以入黎之前其實都唔係抱有好大期望,
不過四季彩の丘勝在地方夠大,
而品種又多, 冇令小弟失望。

啲花圃好似一匹布攤開係地上咁。

唔想行o既朋友可以好似上圖咁, 坐觀光車。
觀光車係由農業用o既拖拉車拉動,
冇試過o既朋友, 坐坐都無妨o既。

呢種白色o既草好有趣。

都唔知寫咩好喇,
淨係可以講, 好靚。

四季彩の丘, 同場仲養左十數寫羊駝,
即係我地所認知o既草泥馬~

不過大人要另外俾500yen入場......

對於香港人黎講,
羊駝可能係近呢幾年先開始為人熟識,
因為有內地網民將神獸草泥馬呢個名冠名俾羊駝。
但其實係更早時間, 日本人已經覺得羊駝好可愛,
於是好多設施、景點都會養羊駝。

蘿莉大戰羊駝!
羊駝收銀處可以買椰菜餵羊駝,
蘿莉o既爺爺叫佢餵羊駝食椰菜,
但小蘿莉唔敢行埋去。
好可愛呀~~~~!!小蘿莉

型棍羊駝。
羊駝同駱駝一樣, 都有一粒圓碌碌, 黑潻潻o既眼。
好好奇佢係點focus睇野???因為唔覺佢有瞳孔......

幾經嘗試,
小蘿莉終於夠膽餵羊駝喇~

四季彩の丘唔收入場費,

咁要點營運? 咁就梗係靠賣手信賺錢啦。

講起富良野一帶的話,
當然係薰衣草啦~
有爆多薰衣草製品, 不能盡錄。

意外地, 有好多羊駝o既產品!!!

啲毛公仔著實幾得意

用羊駝毛織成o既手襪呀、頸巾呀咁。

用羊駝毛毛碎磋成o既毛毛球匙扣,
細細粒都成600幾yen, 真係買唔落=.=

仲有好多園內種植o既花o既種子賣。
金魚草......即刻諗起《鬼灯の冷徹》www

當然唔少得試下北海道名產,
薰衣草味o既雪糕啦。
其實有睇開小弟個blog o既朋友都應該記得,
小弟兩年前就已經係小樽食過,
嗰種味道, 唔可以話食過番尋味,
但實在係o既過隱, 忍唔住要再試www

又睇左青い池、
又睇左四季彩の丘、又睇左草泥馬,
但時間都只過係十一點幾,
食野又好似早得濟咁,
於是就決定睇多個花場先。
就係下圖o既Flower Land喇。

都唔知係邊個抄邊個喇,
又係又個用稻草堆成o既公仔......

呢個花場好似冇四季彩の丘咁出名,
加上又唔係話特別就腳, 所以冇咁多人黎。

相比起黎, 園內設施都好似比較簡陋,
不過佢都有佢o既優點,
就係啲花o既品種比較多元化少少,
用埋配搭亦都多啲。

另外, 仲有一人個意外o既地方:
唔知係咪地理環境關係,
呢個花場勁大風勁凍,
體感溫度起碼低頭先四五度。

唔知係咪因為咁,
好多花期應該已經完左o既花,
係呢個花場內, 都正開得燦爛!!!!!!
就好似下圖o既太陽花咁~

仲有一個亭仔,
可以上去飽覽花場。

都睇得七七八八,
係時候食野。

事前上網search,
發覺真係冇乜出名o既食店,
而因為順路關係,
小弟又唔方便去下富良野一帶搵食。

上富良野一帶比較多人講o既, 都係下圖呢間,
位於後藤純男美術館內二樓o既「富良野grill」

食o既係西餐, 平均一個dish 1000yen,
以日本物價黎講算係咁啦......

食物o既烹飪唔係話特別出眾,
但勝在食材新鮮,
以冇乜選擇o既富良野黎講, 算係咁架喇。

小弟一家坐窗口位, 有個大玻璃幕,
可以睇到田園風光。

食完野之後, 再出動,
下一站係遊人必到,
可以講得上係富良野薰衣草旅遊業始祖o既Farm富田。

上圖係Farm富田入口o既主樓。

地面嗰層係賣手信o既地方,

而上一層, 就係一個展覽館。

(下面幾張圖)

上圖左手邊o既銅製品,
就係蒸餾薰衣草精華o既用具。

館內介紹富良野薰衣草o既歷史。
原來係有一陣辛酸係背後的,
讓小弟根據館內資料作解釋(如果冇理解錯的話。)

係早幾十年前,
富良野一帶o既人已經想學歐洲咁種植及提煉薰衣草。
但為種種原因, 種植及提煉薰衣草都唔太理想,
好多當地人都已經放棄,
唯獨Farm富田o既創辦人堅持, 並改良技術,
可惜成果都只係一般。

就係1976年,
鐵路公司所製作o既月歷裏面,
選用左影住Farm富田薰衣草田o既相,
並作簡單介紹。

就係上圖呢張。

一夜間, 富良野薰衣草田特然廣為人知,
成為左富良野一個景點,
更改變左呢個山卡啦鄉下地方o既命運!

真係, 好多野都整定的......

係主樓二樓影出黎。

主樓連住旁邊,
有一個以乾花乾草做主題o既大房間。
唔好以為乾花乾草好dry,
場主搞得好有心機, 蔚為奇觀。

Farm富田以薰衣草起家,
但而家富良野成為左景點,
當然都要種下其他野服務一下遊客啦。

薰衣草

上面幾張圖o既薰衣草田, 都係留番黎服務遊客的,
真正用黎做產品o既薰衣草?
因為過左收成季節,
就如下圖所示~~~

園內一間玻璃屋,
介紹唔同品種o既薰衣草。

今日睇左三個花場,
其實美瑛、富良野一帶,
大大少少o既花場、相關景點,
都不下二十個。
就小弟睇黎, 小弟去過o既三個都各有特色,
以為會好快覺得煩嫌o既小弟, 都好enjoy,
睇黎睇多幾個都仲得。

可惜都已經四點解, 時間唔多夠,
所以只好去啲關門比較遲o既景點。
下圖o既富良野紅酒工房係其中一個。