魷日記: 六日五夜日本中部帶人魷第四日 --- 上高地 + 新穗高 + 高山

瞓到四點幾o既時候, 唔知點解隔離左右o既人,

都起身搞呢搞嘮, 嘈醒左我, 肯定有啲野。

係呢個時候, 醒目o既我, 突然諗起呢間旅館個名,

叫「朝焼けの宿明神館」。

「朝」即係早上啦, 咁「焼け」又係燒啲咩呢。

小弟又醒起, 就係明神橋對住個山頭, 個名就叫做「焼岳」。

肯定係有啲關係的, 真相只有一個, 我以爺爺o既義起誓!

於是小弟就冒住嚴寒, 拎埋相機向住明神橋出發。

夏天流流邊搵嚴寒?

第一, 上高地呢度海抜1500米, 已經比水平面低9度,

八月日間平均氣溫只係20度,

再加上而家係日出前, 係一日最凍o既時刻,

以小弟平時出入cold room (5度) o既體感,

而家戶外只係得十度左右, 再加上吹住微風......

可憐o既小弟只係得短T短褲......

黎到明神橋, 用手機影番個全景先。

下圖開始影住, 最高嗰個就係「焼岳」,
小弟見呢個山光秃秃, 而又向正東面,
加埋頭先o既詞彙「朝」、「焼け」、「焼岳」,
小弟大概都估到咩事。

果然隨住日出, 山頂o既部份被映照成紅色

不過當太陽出左大部份之後,
焼岳唔再係紅色, 冇野睇嚕......

大家信小弟,
小弟前真係唔知原來焼岳係咁o既意思, 所有野都係巧合。
小弟咁啱住呢個旅館, 個名咁有意思, 咁啱俾人嘈醒左
咁啱知道隔離個山叫焼岳......

六點鐘, 睇完焼岳, 番去瞓個回籠覺~
八點半check out, 出發去琴晚睇唔成o既明神池。

橫渡明神橋

黎到管轄明神池o既穂高神社、
人唔算多, 不過已經有若干人出入。

睇完啲籤呀、剩呀啲無聊野之後,
正式入去明神池喇。
下面開始一大堆都係明神池o既相片。

艘小船係法事用的。

明神池流出o既溪流。

老實講,
明神池個景唔係話特別靚, 亦都冇咩好奇異o既地理結構,
但成個環境o既氣氛, 令人肅然起敬, 但又平靜閒適。
不其然就影左好多相。

其實本身仲想留耐啲,
但小弟要行番一個小時o既路出去同同事一家人匯合,
唯有向番河童橋出發。

明神館有早餐, 不過你唔係館入面食的話,
可以同佢地講, 佢地會準備可以行住食o既早餐俾客人,
呢個亦都係山小屋o既特色之一。
正好小弟要趕路, 於是邊行邊食。

其實唔係啲咩特別野,
只係兩個酸梅飯團同一啲日式煮魚、豆

下圖係上高地近河童橋o既camp site。

遊人可以自己紥營之外(下圖),
亦都可以租用上兩圖o既綠色A字帳。

番番到河童橋,
小朋友好開心咁玩緊水。

本身諗住1030左右出發去下一站的,
不過小朋友唔肯走, 而事實上,
小弟都玩得幾開心, 好耐冇試過片石仔喇。

結果1130左右先開始離開上高地,
走之前買下手信先。

河童橋, 當然唔少得河童o既飾物。

上圖左至右, 分別係:
燒蘋果(肉桂味)、味噌小青瓜、飛騨牛味噌、蘋果啫喱。

燒蘋果(肉桂味), 超好味!!!!!!!
有造過甜品o既朋友應該知, 煎、燒過o既蘋果會變得帶酸,
燒蘋果o既酸甜balance得啱啱好, 再加埋肉桂粉, 實在係齒頰留香。
小弟一食左第一舊就停唔到, 但為左帶番香港留俾屋企人食,
小弟唯有將包野封印係行里o既最深處。

味噌小青瓜, 番到香港先開,
大約係手指尾咁大o既小青瓜,
用味噌、酢等醃製, 口感同味道都有啲似菜莆,
餸飯一流。

飛騨牛味噌,
已經唔似味噌, 而係泥狀物,
入面有好多蒜頭, 但蒜頭一啲都唔辣, 啲牛味都好香口。
另外, 關於呢樽飛騨牛味噌, 係離境時引起一段插曲, 到時再講。

蘋果啫喱, 搵笨的!!!
入面得六舊, 每舊得個乒乓球咁大,
仲要係大菜(agar)為材料, 口感仲差過「羅笨臣」

好, 介紹完手信, 就出番去平湯溫泉拎番架車,
然後渣大半個鐘到新穂高ロープウェイ駅站吊車喇。

上圖為新穂高ロープウェイ停車場旁o既疏水道

新穂高ロープウェイ駅

陣間小弟就會搭呢架車上山

來回2900yen當,
除非大家有好多時間行山,
如果唔係, 都係買番來回飛把啦。

長野限定, 蘋果味同WASABI味桃哈多

因為呢一帶出名WASABI,
所以係有WASABI雪糕買的......
鐘意挑戰新味道o既小弟,
當然要買番杯黎試下啦。

WASABI雪糕, 真係好有WASABI味!!!
小弟唔係玩野, 唔似提子味雪糕(多數似藥水味),
WASABI雪糕啲WASABI味好真,
真到好令人懷疑店家係咪只係就咁將雪糕同WASABI撈埋就算......
而且初初食落冇乜野, 但嗒耐左, 口腔及食道會開始有少少刺痛o既感覺......
好食唔算得上好食, 但佢係一杯冇花冇假o既WASABI雪糕!!!

係等吊車o既時候, 小弟出左車站外面o既小店,
買佢o既飛騨牛串燒黎試下,
一支三舊仔要500yen呀頂你。

唔知係咪燒得唔夠火侯, 有啲咬唔開, 嘥左舊牛......

夠鐘上吊車。
新穗高吊車分兩段, 如下圖。

由山腳數起, 先係第一ロープウェイ,
到達鍋平高原駅, 有啲休閒設施,
再搭第二ロープウェイ就會到達西穗高口駅。

先係搭第一ロープウェー,
由上車到落車o既高地差唔算高,
太約只係188m。

因為有唔少山利用新穂高ロープウェイ,
作為登山或登完山離開o既手段,
所以唔少人會帶住好多行山露營裝備。
不過太多o既露營裝備會阻到其他遊客使用吊車,
所以有下圖o既小型吊籃,
過大過重o既行里, 要向吊車公司申報,
額外俾少少錢, 就會同你分開運行里上or落山。

上到黎鍋平高原駅, 標高1305m

所謂o既少少休閒設施,
其實只係一啲賣手信、飲食o既地方(下圖)。

同埋一個訪客中心連溫泉浴場(上圖)。
訪客中心當然唔少得展示呢一帶o既物植物(下圖)。

小朋友食完野, 再搭第二ロープウェイ上山頂嗰個站(下圖)。
好似話係全日本唯一o既雙層吊車~

今次就勁囉,
起點同終點之間o既高低差有成848m,
尤其是頭嗰段升得特別快, 你都咪話唔驚。
下圖唔係out focus, 而係俾大家睇下條路有幾斜,
睇條鋼纜就知, 差唔多成45度的!!!

上到山頂站西穂高口駅, 飽覽群山,
可惜天氣一般般。
不過唔係落雨都偷笑。

當然唔少得据遊客一筆o既影相corner啦。

山頂o既小郵局,
大家可以係度買名信片寫埋寄埋。
本來小弟都打算寄番張的,
不過唔記得啲朋友o既地址......

頭先提過, 有唔好登人人士以新穂高ロープウェイ作為登山或離開o既方法,
而上圖就係登山徑起點o既小屋。
過左間小屋, 就係正正式式o既登山路徑,
冇足夠o既準備都唔好亂黎。

上面o既小屋, 唔係俾人住,
而係俾登山o既人士, 自行申報行山計劃,
包括路線、時間、聯絡方法等等。
萬一有個冬瓜豆腐, 山林工作人員發覺你幾日冇聯絡,
就會通知有關部們發散人手搵你。
又或者有咩突發天氣、火山爆發,
有關當局都知道有幾多人要救援、有幾多人要搵番出黎。
日本唔少o既行山地點都有以上o既服務提供, 包括富士山。

睇完, 有乜野做,
落番鍋平高原駅,
頭先都冇留意, 原來鍋平高原駅附近係有個浴足場的,
小朋友又係唔捨得走......

本來仲打算離開新穂高ロープウェイ,
落到去下一個城市高山市, 都仲可以行一陣。
點知比預定大幅落後,
去到高山市o既酒店check in, 時間已經係五點幾六點。

需知道日本啲野都係好早就閂門的,
尤其是山卡啦, 過左五六點基本上都冇野好行
只是搵野食。

飛騨高山一帶, 講到食, 就當然係飛騨牛啦!
而食牛最好食最能食出原味o既方法,
就一定係就咁燒黎食!!!

以小弟一己之欲係咁落力推薦下,
小弟同同事一家就走左去食燒肉喇＼(^o^)／