今日係日本中部帶人魷最後一日,
小弟最初最初o既打算,
係神早爬起身去熱田神宮,
然後再去リニア鉄道館滿足小朋友o既願望。
不過經過呢幾日行程,
小弟發覺係絕對冇可能早出發到。
同同事商量過後,
決定skip左熱田神宮佢。
另外, 因為同事個老婆都想再去藥房掃貨,
而小弟亦都要去明古屋間animate買野,
於是行程就改為先去明古屋駅附近,
然後再去リニア鉄道館。
由岐阜渣一個鐘左右車就番番黎名古屋,
同事一家去藥房, 小弟就去animate。
小弟要買咩?
12/8/2015, 係早見沙織出道CD發賣o既日子,
小弟點可以唔捧場!!!
可惡o既人類吸金計劃......
anyway, 小弟同同事老婆都好滿足咁買完野之後,
就出發到名古屋南面o既リニア鉄道館。
老實講, 小弟本身對呢個景點冇乜興趣的,
不過同事話想滿足個仔o既要求,
於是小弟都抱住不妨一去o既心態參觀。
成個館俾人好整潔o既印象。
館內展出多輛車箱(一條條嗰啲)。
頭先成個館都俾人白雪雪o既感覺,
但一入到第一展覽室, 卻同你黎個反高潮,
放左一架蒸汽車同兩架新幹線o既展覽室,
同你黎個全黑......
頭先只係玄關,
入到主要展館, 勁空曠。
啲車o既型號, 小弟真係冇深究,
話晒小弟都唔係鐵道宅......
(宅都有好多專門的: 動漫宅、鐵道宅、軍事宅等)
當然唔會話淨係放幾架車係度就算啦,
館內都有好多教學o既展品,
用以培養小朋友人成為
例如上指指出新幹線車軌闊度,
下圖就講路軌及地台o既結構。
有一個corner,
大家可以到售票機, 輸入自己個名,
然後再用出出黎嗰張飛,
過一個dummy入閘機,
模仿入閘坐新幹線。
冇得轉換漢字, 香港人只可以葡萄一吓了。
個表顯示o既班次,
的確係實際上存在o既班次,
仲會按實際時間一路褪落去。
葡萄完, 再睇下其他在来線例車o既展覽。
(「在来線」係指local線, 係指只會係市內or頂多縣內行走)
係以前用黎測試例車行走線路周邊,
會唔會有障礙物撞到例車用的,
啲一條條o既係sensor。
中下方嗰個就係燒煤o既地方。
館內仲有好多simulator,
遊客可以試下架駛在来線、新幹線等。
不過要預先排隊拎籌, 仲要全日文,
所以外國遊客都係睇上好喇。
仲要有指定時間, 唔係話排就排,
詳情上官網睇啦。
下圖開始係其中一個展室o既展品,
係一大set微縮o既鐵路模型,
當然啲小火車係會郁的。
展館會以數分鐘為一個循環,
配合燈光展示車站一天o既運作。
原來個模型分左中右三個部份,
中間, 係以名古屋為參考o既模型,
而右邊係展示東京(上圖),
左邊就展示京都、大阪。
就知道個リニア鉄道館幾受歡迎。
入場o既leaflet,
其實仲包括問答遊戲,
係展品當中搵答案, 填好交番去counter(上圖),
答啱晒就會有下圖o既file送俾閣下做紀念。
不過又係啦, 全日文......
同事o既老婆, 又抄下人地啲答案,
又埋去counter lur吓,
又lur到番黎喎~~~
館內仲有得買駅弁(車站便當)
不過好乸貴......
因為小弟們要趕飛機走,
加上同事一家不諳日語,
所以冇上二樓睇鳥~
不過小弟趕時間, 下次先......
去機場還左車,
就check in上飛機嚕。
係名古屋機場進入禁區檢查行里o既時候,
發生左一段少插曲。
話說小弟係上高地買左一樽飛騨牛味噌。
小弟見啲味噌杰他他, 點睇都唔似液體,
於是打算就咁拎上機......
小弟咁寫得出黎, 當然就係失敗啦。
檢查行里o既時候, 個女職員同小弟講,
呢樽野有200毫升, 唔可以帶上機。
本身小弟打算由得佢唔要,
諗下諗下唔憤氣, 反問個職員,
咁係咪我食多過一半,
得番少過100毫升就可以帶上機。
個女職員話係, 於是小弟就同佢講,
「好, 我而家即刻食!」
佢即刻用驚訝o既目光望住我,
雖然係咁, 佢仍然帶我行埋一邊,
嗰度有木筷子同膠羮等,
睇黎小弟都唔係第一個係度食野o既人。
不過當其他職員都知小弟係度啃味噌之後,
都報似驚訝而又好笑o既目光。
咁又難怪o既, 試想下有個鬼佬同你係機場生吞半樽腐乳......
啲牛味係好香, 但......真係好鹹......
仲有, 佢入面又好多原粒蒜頭......
雖然係咁, 小弟仍舊係一鼓作氣咁食左半樽,
的確食到有少少再而衰, 三而歇......
正當然小弟想話已經食多多過一半之際,
走過來o既係一位較高級o既職員。
佢同小弟講
「因為容器冇刻度, 所以就算食左都唔俾得你過」
orz
經過今次, 小弟搵到個新o既旅遊方法,
就係瞓私家車!下次小弟搵次機會試下,
一條魷租架車渣, 夜晚瞓車。
咁樣, 可以慳番啲住宿錢之餘,
又可去多好多搭公共交通去唔到o既地方!!!
當然啦, 租車都要錢o既,,
呢方面就要計算一下喇~
沒有留言:
張貼留言