七日六夜 箱根東京千葉魷 第二日 --- 箱根 + 千葉モノレール×俺ガイル痛列車

小弟平時都係遲起身之人,

加上琴日活動超過18個小時,

應該瞓晏啲先係。

但小弟都係晨早七點幾起左身,

再浸溫泉風呂!

大老, 兩皮幾yen住一日, 浸到甩皮都繼續浸啦。

浸完食早餐,
仍然係由嬸嬸送到黎房間,
換句話說, 一check in左, 基本上都唔洗再離開間房。
呢種廢人式o既生活真係正!!!

好豐富o既早餐,
對於平時唔食早餐o既小弟,
有少少heavy。

小陶鍋DIY即燒雜菜

出來了......粘々コンビ,
納豆+秋葵+鵪鶉蛋......
全部都係粘溚溚o既野......
小弟真係嘗試過去接受佢的,
但實在係頂唔順......
食左兩口放棄左......

酸酸甜甜o既醒胃菜, 伴有北寄貝

蠶豆、明太子?、魚糕

又係魚......

卷蛋




快樂o既時光過得特別快......
放低22550yen之後,
離開旅館, 經東京向千葉進發喇。

上圖係強羅駅外影的,
如果人多的話, 搭的士觀光, 都唔算話好貴,
大家可以參考下。

落番 箱根湯本駅 ,
一來下班車未夠鐘,
二來小弟今日其實冇plan, 過鐘都唔怕,
所以係咁依係箱根湯本駅o既商店街兜左個圈。

其實都冇乜特別,
不過買手信o既話呢度一定齊,
大家可以留番臨走時先黎買。





好喇,
黎緊一大堆都係毒撚阿宅o既話題喇。
去千葉, 全因為小說、動畫作品
《やはり俺の青春ラブコメはまちがっている。》
(下略《俺ガイル》)


五月幾六月得知千葉モノレール(千葉單軌車)又搞車箱warping
真係好高興, 仲要係去到九月中,
小弟當然唔會錯過啦。
(最新消息係行到16年5月)

對上一次小弟黎, 係睇《俺の妹がこんなに可愛いわけがない》
詳情請參考八日七夜 北首都圈 毒撚魷 第七日 --- 俺妹痛列車




可以係千葉モノレール某啲大車站買到《俺ガイル》o既周邊,
小弟當然唔會放過!

最正係右下角嗰堆字,
話ゆい、ゆきの、いろはo既匙扣一早已經賣晒,
唯獨係剩番八幡仲有好多,
話係孤獨男所發揮o既精髓咁話www

車站內o既poster宣傳

一早check晒時間表等嗰架車黎~~~
之後都冇乜野好講喇, 睇相啦。

下面一系列o既係扶手o既裝飾

影完影夠~~~



再去千葉animate,
買左幾本小說之後,
就食埋晚飯番酒店。