六日五夜 京阪奈良紅葉魷 --- 第五日 嵐山嵯峨野 (嵐山小火車 + 保津川小船 + 天龍寺 + 野宮神社 + 竹林之道 + 常寂光寺)

黎到第五日, 可謂今次旅程o既重頭戲之一,

就係黎嵐山睇紅葉喇。

有爬開小弟文章o既人會話「又係嵐山?」

無錯, 小弟係黎過好多次, 但今次主要係帶屋企人黎丫嘛。

晨早出發, 搭JR直接到嵯峨嵐山駅,

出站後第一件事梗係到旁邊o既觀光小火車車站買車飛啦。

雖然小弟已經預早左大半個鐘到,

但排隊排到小弟o既時候, 觀光小火車座位已經售罄,

得番企位......不過都好過冇啦。

一來企位影唔到相啦, 二來啲紅葉都未話真係好紅,
所以坐觀光小火車都冇乜點影相喇。



係小弟心目中, 遊嵐山最standard o既行程,
一定係先坐觀光火車到龜岡,
然後再坐保津川小船番番去嵐山。
呢個亦係點解小弟要上午黎嵐山o既原因。

六日五夜 京阪奈良紅葉魷 --- 第四日 清水寺 + 八坂神社 + 伏見稻荷大社 + 宇治

京都, 除左有琴日o既金閣寺之外,

當然唔少得清水寺!

小弟精心計劃o既旅程, 又點少得清水寺。

雖然清水寺冇話有好靚o既紅葉,

但呢啲打咭景點, 點都要黎一黎o既。

上次小弟黎清水寺睇紅葉, 係早上o既五點幾,
只有三五個好似小弟咁變態o既early bird,
但今次同老人家黎, 就梗係唔會咁辛苦啦,
黎到o既時間係9點幾, ok啦, 係多人, 但都冇琴日金閣寺咁誇張。

六日五夜 京阪奈良紅葉魷 --- 第三日 金閣寺 + 仁和寺 + 高雄神護寺

就算未黎過京都o既人, 都可以聽過京都金閣寺呢個名。

金閣寺已經成為左京都旅遊必到o既景點,

加上金閣時o既紅葉都幾, 所以小弟都都將金閣寺納入行程內。

六日五夜 京阪奈良紅葉魷 --- 第二日 奈良公園 + 春日大社 + 東大寺 + 京都貴船神社

小弟入住o既係難波附近日本橋一帶,

原因係小弟一家, 第一站會係奈良,

行幾步過去難波, 就可以坐近鉄線去到奈良。

黎得奈良, 目的都係嗰個架喇, 就係玩鹿,

當然啦, 唔少得o既今個trip o既主題---紅葉。

都係嗰句,  小弟以前都已經黎過奈良一次,

如果想睇奈良詳細啲o既描述,

可以睇番小弟之前o既文章:

放火燒山---若草山(&庚申堂+奈良公園+春日大社+東大寺+二月堂)

 不過嗰時唔係睇紅葉, 而係睇放火燒山。

番番黎正題, 由大阪黎到奈良,
因為今晚係住京都o既關係,
啲行野都由日本橋o既酒店拎晒黎, 放左係近鉄奈良駅o既locker。

雖然話係秋天, 但日本o既秋天其實同香港o既冬天有得fight,
行番十度鬆啲, 再加埋啲風, 體感溫度都真係得個位數......

六日五夜 京阪奈良紅葉魷 --- 第一日 前言 + 大阪城

話說小弟一直都想帶屋企人睇下紅葉,

於是好早已經謀定睇吓有冇平機票,

又俾小弟僕到喎。來回連行里每人只係六舊水, 抵到爛啦。

當然, 時間就唔會係紅葉高峰期架喇,

而係紅葉高峰期前少少。

不過小弟認為, 只要識揀地點,

都一樣可以睇到紅葉架啫。

就咁, 六日五夜 京阪奈良紅葉魷 就開始喇。

因為小弟o既目的, 係用最少o既時間、行程,

盡量俾屋企人睇到最多唔同特色o既紅葉景色,

所以今次o既行程可謂精心策劃, 有動有靜, 多姿多彩,

實屬小弟自信之作, 相信第一次去京都o既朋友都可以作為參考。

另外, 如果看官係一條友, 自信腳程好又捱得辛苦,

想一次過掃晒京都主要睇紅葉o既景點的話,

可以參考小弟以前o既京都四日地獄紅葉之旅。

京都四日地獄紅葉之旅 第一日

京都四日地獄紅葉之旅 第二日

京都四日地獄紅葉之旅 第三日

京都四日地獄紅葉之旅 第四日

好喇, 入正題喇。

去大阪一帶, 點都走唔甩由關西空港著陸架喇。

因為唔想辛苦, 小弟揀左中午機,

出得機場入得大阪市放低埋行里, 已經四點幾,

太陽都開始西斜。

老老實實, 係小弟心目中, 大阪真係冇乜野好睇,

唯一o既land mark就係大阪城。

有關於大阪城o既介紹, 小弟係以前o既blog都講過,

係呢度唔多講喇, 有興趣o既朋友可以睇番之前o既文章: 大坂城 (大阪城)

咁啱嗰時去係紅葉時節, 啲相多好多同靚過今日呢篇。

其實小弟帶屋企人黎大阪城,

一來係攝時間啦, 二來係想睇吓睇唔睇到嗰堆變黃o既銀杏樹。

四日三夜 紀伊熊野和歌山 --- 第四日 和歌山拉麵 + 和歌山城

琴晚提到, 和歌山市o既拉麵別一格,
而家就等小弟黎介紹一吓啦。

和歌山o既拉麵, 按照湯底,

主要分為 豬骨醬油拉麵 同 醬油豬骨拉麵……

你係咪以為小弟傻左? 定係打錯字?非也

和歌山o既拉麵, 真係由豬骨湯底同醬油混合構成,

問題只係兩者o既比例,

醬油重啲o既, 就係醬油豬骨拉麵,

豬骨湯成份多啲o既, 就係豬骨醬油拉麵。

咁當然, 其實兩者比例係一個spectrum,

唔係話只有兩極化的。

小弟琴晚黎到和歌山, check in左之後第一件事,

就係要搵間拉麵店醫肚喇。

咁當然, 小弟一早做晒research, 已經選定左想食o既拉麵。

今次黎呢間, 距離車站都有十五至廿分鐘距離,

係一間叫 井出商店o既拉麵店。

要留意o既係, 日本o既拉麵, 除左會寫成ラーメン之外,

仲可能會寫成中華そば。

反正, 其實拉麵都係由中國傳入的。

講番井出商店, 本身都係一間老店,

湯低係屬於醬油豬骨拉麵, 即係話醬油味比較重。

咁佢有邊幾款麵可以揀呢?

睇下下圖個餐牌就知, 得一種……

只可以揀正常、加大、加加大, 又或者係加叉燒and/or烚蛋。

不過咁先好, 即係話佢地夠專一、專業,
而呢個亦都係好多日本老字號o既特色。

好喇, 入去食。

真係想食出湯底真味的話, 係唔會叫加大麵量的,

因為加多左o既麵, 會溝淡左湯底o既味道。

有啲店, 會係加底o既湯入面加番多啲調味料,

但咁做亦都令湯底o既成份比例唔同左。

所以係食最好味o既拉麵, 就唔好搞咁多野,
叫個普通招牌拉麵o既就。

四日三夜 紀伊熊野和歌山 --- 第三日 熊野速玉大社 + 熊野古道 + 熊野本宮大社 + 和歌山拉麵

黎到紀伊遊o既最後一日喇,
一早爬起身出發, 先係到位於新宮市內o既熊野速玉大社。

四日三夜 紀伊熊野和歌山 --- 第二日 熊野那智大社 + 那智瀑布

正式開始旅遊o既章節喇。

先講吓個Title, 紀伊熊野。

咩叫紀伊呢, 其實係講緊日本古時,

曾被紀伊國管治o既範圍,

大概係現時和歌山縣同三重縣o既南面,

亦即係下圖紅色o既區域。

因為以前日本o既首都係京都同奈良一帶,

紀伊半島成為左東、西日本來往必經之地,

所以紀伊半島有好多古道, 係以前啲人東西往來o既道路,

而紀伊o既熊野古道, 就係當中o既古道。

當然係日本, 有人o既地方就有神社寺廟,

而係紀伊, 最有名氣o既就總稱熊野三山o既三個大社:

熊野本宮大社、熊野速玉大社、熊野那智大社。

小弟今次o既旅遊, 就係去晒熊野三山,

同埋行一少段o既熊野古道。

小弟一向都唔介意買啲平車票, 然後坐啲逐個站停o既火車,
應該話, 小弟反而係好享受慢慢坐鐵路同轉車o既過程。
小弟平時就用開青春18,
不過因為今次呢個旅程個時期, 係春青18 o既使用期間外,
所以只好搵吓睇下有冇其他平車票。

基於小弟去o既地方地沿關係
能夠用o既平車票有限, 當中就揀左「秋の乗り放題パス」,
7710yen, 可以任搭JR o既快速同普通車自由席,
有效期為連續三日(可指定)。
於是小弟就開始左一連三日o既紀伊之旅。

四日三夜 紀伊熊野和歌山 --- 第一日 早見沙織LOVE LIVE LAUGH演唱會(大阪場)

雖然個Title係四日三夜 紀伊熊野神和歌山,

但其實今次o既行程, 主要目的係為左睇聲優 早見沙織 o既演唱會。

不過淨係去睇個演唱會又好似好嘥咁,

於小弟決定留多兩三日黎個短trip。

咁啱演唱會係大阪 NHK Hall舉行,

於是小弟就plan左去一個working holiday時代已經好想去o既地方,

就係係紀伊半島o既熊野三山: 熊野本宮大社、熊野速玉大社、熊野那智大社。

因為第一日行程係睇演唱會同睇戲,

對早見沙織冇興趣, 想睇旅遊o既朋友可以跳過今日呢篇,

直接落聽日嗰一篇。

 今次呢個旅程可以話充滿住早見沙織,
因為除左係睇早見沙織o既演唱會之外,
仲睇左《聲の形》呢套劇場版動畫, 好主角都係早見配音的~
另外, 聽日開始o既紀伊熊野旅遊,
亦都同早見沙織配音o既動畫《RDG》有啲淵源。

十日十一夜 立山黑部登山魷 --- 第十日 富山回程東京 + 秋葉原

是咁的, 今日由富山回程番番去東京,

因為小弟用o既係青春18車票,

所以只可以坐JR線路旗下o既普通列車。

問題係, 富山稱為北陸呢一帶, JRo既覆蓋唔係話咁全面,

當中好多JRo既線路, 中間係由私鐵(私營鐵路)所連接的。

而小弟今日o既行程就係咁。

十日十一夜 立山黑部登山魷 --- 第九日 冰見 + 忍者小靈精火車 + TRUE TEARS 聖地巡禮

先簡介一吓今日o既行程先。

本身都冇話決定好今日去邊,

一係去城端嗰邊, 一係去氷見嗰邊,

不過目的都係差唔多,

就係旅遊, 順便聖巡埋動畫《TRUE TEARS》o既景點。

考慮到氷見嗰邊近海, 仲話有個魚市場添, 好似好吸引咁,

於是最後決定左去氷見。

途中經過高岡一帶, 都係《TRUE TEARS》o既聖地,

不過有關聖地巡禮o既部份, 會放係呢篇日誌o既後半部。

好可惜, 事車上氷見冇想像中咁多野睇,

再加上MISS左最重要嗰班巴士,

所以整體黎講, 今日o既旅程唔係話咁精彩......

由富山坐あいの風とやま鉄道到高岡,

為左聖巡《TRUE TEARS》,

特登行一個站到越中中川(詳情見後半部),

然後搭下圖o既JR氷見線到總站。

好耐以前見過旅遊書介紹氷見線,

因為氷見係《忍者小靈精》作者---藤子不二雄Ⓐ o既家鄉,

所以氷見市有好多《忍者小靈精》o既相關裝飾之外,

JR氷見線仲會有列車貼滿《忍者小靈精》o既圖案。

小弟當年仲心諗, 「小弟先唔會黎呢啲山卡啦地方」,

點知真係風水輪流轉, 小弟真係黎到呢個山卡啦o既地方......

一出車站, 已經見到local o既的士都貼有《忍者小靈精》o既圖案。

十日十一夜 立山黑部登山魷 --- 第八日 越中八尾おわら風の盆 2016

呢篇同上一篇"第八日《 クロムクロ 》聖地巡禮 總集"發生係同一日,

不過小弟想將動漫同一般旅遊分開,先至拆開黎寫。

所以有兩篇第八日係正常的。

番番正題,

1/9 o既傍晚開始,

小弟要由富山駅搭半個小時,

到越中八尾呢個地方, 參觀おわら風の盆。

お盆, 即係日本o既盂蘭節慶,

係日本人心目中, お盆o既重要性同中國人o既農曆年有得fight。

一到左夏天, 日本各處都會有お盆o既納涼節慶。

而おわら風の盆就係係北陸一帶最出名o既節慶之一。

正日係1/9-3/9, 但另外仲有前夜祭係8月尾嗰幾日。

初初小弟認為, 北陸呢啲山卡啦, 多人極都有個譜,

點知小弟錯了。

一到富山駅, 見到好多人係車站,

都以為只係稍為多啲人排隊搭車,

距離列車開出仲有大半個鐘,

於是小弟大安旨意坐埋一邊,

等到例車開出前十分鐘先行上月台。

點知小弟入左閘想上月台o既時候, 就俾工作人員閘住。

完來因為太多人去越中八尾,

要實施攞籌排隊搭車。

先到車站大堂counter(上圖)拎一張籌(下圖),
然後去車站大堂o既一邊排隊。

十日十一夜 立山黑部登山魷 --- 第八日《 クロムクロ 》聖地巡禮 總集

一開始小弟已經講過,

今次黎立山黑部同埋富山縣, 其中一個目的,

係因為要黎一個《クロムクロ》o既聖地巡禮,

為左避免純綷想睇遊記o既朋友感到煩悶,

小弟將呢三日聖巡o既內容歸納晒係呢個POST,

希望巴絲打們會喜歡。

如果對動漫冇興趣o既朋友, 可以跳過呢個POST。

小弟先講番今日o既聖巡先,

然後再補番之前兩日係立山黑部o既聖巡。

先介紹下套動畫先。

《クロムクロ》係由動畫工司P.A. WORKS製作,

2016年4月~9月日本地上波首播。

動畫中多次出現以立山黑部同富山市為背景o既場面,

因為咁, 所以係立山黑部同富山市多處,

都有相關o既動畫產品, 同埋有聖巡o既地圖免費任攞(下圖)。

聖巡地圖封面底

十日十一夜 立山黑部登山魷 --- 第七日 雄山登峰 + 称名滝

小弟成日都同身邊o既人講,

日本o既天氣報告好準,

就算係以3個小時咁短間隔為單位,

都係好準, 唔會相差得去邊。

琴日仲打緊風o既時候, 日本天氣報告就話晚上6點停雨,

夜晚仲會好天到見到星星添。

本身小弟都半信半疑, 但當小弟凌晨兩點鐘起身,

又真係好天架喎~~~

地圖選自: 昭文社　山と高原地図 剱・立山 2016

好喇, 開始正題

小弟o既目標係登上立山o既第二高峰---雄山 睇日出。

日出時間係0521, 而由小弟下榻o既雷鳥莊到山頂, 大概要兩個半鐘,

所以小弟兩點就爬起身, 帶埋腳架相機同埋一啲簡單裝備就出發了。

十日十一夜 立山黑部登山魷 --- 第六日 立山黑部

小弟都係序入面講過,

今次黎立山黑部,

其中一個目的係新番動畫《クロムクロ》o既聖地巡禮,

不過為免影響遊記o既序述,

所以聖巡o既野寫係另一個POST, 唔係呢度記述,

詳見「十日十一夜 立山黑部登山魷 --- 第八日《 クロムクロ 》聖地巡禮 總集」

番番正題

正如琴日所講, 台風10號迫近,

雖然唔係吹中長野、富山縣, 

不過外圍雨帶影響, 加上山上天氣多變,

由小弟到達立山o既長野縣入口---信濃大町,

已經一直落雨, 好在小弟係出發前已經買左雨衣,

加上有朋友相贈長遮一把。

上圖: JR信濃大町駅
下圖: 車站外, 開往立山山腳扇沢駅o既巴士站。

十日十一夜 立山黑部登山魷 --- 第五日 松本城

去完一連三日o既Animelo Summer Live, 真係攰到嘔……

而今年小弟係第一年ASL完左stay behind旅行,

(以往係旅行完先ASL)

所以行程上今日安排得鬆動啲。

因為主要目標係上立山黑部,

但如果一口氣由東京搭車到立山範圍的話,

要黃昏先上到山, 結果都係要等第二日先可以觀光。

反正都係要第二日先上到山觀光,

於是小弟決定係長野縣o既松本落一落腳。

老老實實, 松本其實除左松本城之外, 都真係冇乜野好睇,
首先, 佢唔係話係啲咩大城市,
睇吓下圖車站附近o既環境就知,
車站前啲大廈, 高極都高唔過10層……

Anyway, 去觀光案內所睇下有咩發現, 丫又真有架喎。

原來松本市係人氣漫畫(連載完結),

兼今季新番, 兼真人版化o既作品 --- orange o既舞台。

不過可惜, 小弟對呢個作品一般般。

十日十一夜 立山黑部登山魷 --- 第四日 Animelo Summer Live 第三日

黎到ASL最後一日, 因為會場附近商場有一間好大型o既書局,

小弟要預備後日登山o既野,

所以要去書局買旅遊書同地圖。

買完要買o既野, 仲有少少時間,

真正第一次睇吓今年o既goods同其他情報。

十日十一夜 立山黑部登山魷 --- 第三日 Animelo Summer Live 第二日

黎都ASL第二日, 都係嗰句, 今年唔會買goods,

不過要幫人係秋葉原買野。

係買LiSA o既碟, 不過秋葉原比預期中多人,

買得佢啲碟, 但差啲搞到自已遲到……

不過都不忘係秋葉原animate新館影番張ガルパン。
其實如果唔係吓吓都大大隻字寫住女子學園的話,
小弟都想買番件ガルパンo既衫。

Animelo Summer Live 第二日花卉展:

小弟大本命早見沙織!!!

十日十一夜 立山黑部登山魷 --- 第二日 新海誠《君の名は。》首日上畫 + Animelo Summer Live 第一日

今日係Animelo Summer Live 第一日,
如果係換著以前o既小弟, 一定會晨早走去排會場goods,
不過今年啲goods實在太yap,
啲tee柒到爆, 所以決定唔買周邊。

之前提過吓, 小弟近年去日本, 愛上搵動畫劇場版睇。
而咁啱, 今日就係新海誠監督新作《君の名は。》o既首日上畫。

新海誠o既作品一直受人追捧,
小弟都睇過佢o既《秒速五厘米》, 的確係幾唔錯,
不過小弟都係抱住平常心黎睇 《君の名は。》

十日十一夜 立山黑部登山魷 --- 第一日 hea (築地, 秋葉原)

老實講, 機場係唔會瞓得好的,

不過冇辦法, 要就啱時間買平機票就係咁,

反正小弟有今日作緩衝。

早上五點幾六點出發離開羽田機場。

咁早有邊度好去? 晨早流流已經開左o既,

就梗係市場啦。

據聞築地巿場即將會搬(其實都講左好多十年......)

加上晨早流流冇野好做, 於是決定去築地食個早餐先。

由機場搭モノレール到浜松町再轉地鐵到築地。

係浜松町出閘先驀然發現,

原來車站前嗰棟高樓就係文化放送o既大本營!

呢個可能係比較偏門少少o既資料, 但小弟都解釋一下。

文化放送係一個電台組織,

小弟因為係一個聲優控, 所以都幾常聽聲優o既電台節目,

而小弟聽開o既早見沙織、村川梨衣、佐倉綾音、大西沙織、西明日番、洲崎綾等等o既節目,

就係隸屬文化放送超a&g+。

係咪只要小弟僕係度, 就可以見到聲優們o既真身!?

唔好玩啦, 小弟冇咁變態......(應該)

十日十一夜 立山黑部登山魷 --- 序

每年八月底, 小弟都會去日本睇ANIMERLO SUMMER LIVE(ASL),
簡單黎講係一個一連三日o既動漫歌演唱會。
而小弟o既慣例, 就係反正去日本, 都會預多幾日去旅行。

之前都係去完旅行, 然後先去ASL, 跟手番香港。
但今年諗諗下, 點解唔係stay behind呢,
反正開學又唔係好關小弟事, 九月先番黎機票仲平啲添,
於是小弟決定25/8出發, 4/9返港。

諗去邊度旅行, 都諗左一段時間,
最後揀左長野縣同富山縣之間o既立山黑部, 原因有三個:

1) 2011年6月同屋企人跟團去過立山黑部(31/8 現在仲未補番寫)
但6月已經溶雪, 睇唔到立山黑部名物---公路兩旁大雪牆
而呀媽又成日嘈住話想再睇, 於是小弟今次去熟習環境

2) 上年同朋友去上高地之後, 開始對去日本行山產生興趣,
而立山o既雄山都係一個幾出名o既登山熱點,
所以小弟想試吓

3) P.A. WORKS 近排o既大熱動畫作品《クロムクロ》,
主要取景地點就係立山黑部一帶同埋富山巿,
小弟順便黎個聖地巡禮

因為咁, 小弟就坐24/9 1815 o既機飛去日本羽田。
2330到羽田, 呢個鐘數已經冇鐵路連接東京巿中心,
小弟當然一早知, 已經預左係機場瞓一晚。

就這樣, 小弟一連10日11夜o既旅程就係機場開始。