十日十一夜 立山黑部登山魷 --- 第五日 松本城

去完一連三日o既Animelo Summer Live, 真係攰到嘔……

而今年小弟係第一年ASL完左stay behind旅行,

(以往係旅行完先ASL)

所以行程上今日安排得鬆動啲。

因為主要目標係上立山黑部,

但如果一口氣由東京搭車到立山範圍的話,

要黃昏先上到山, 結果都係要等第二日先可以觀光。

反正都係要第二日先上到山觀光,

於是小弟決定係長野縣o既松本落一落腳。

老老實實, 松本其實除左松本城之外, 都真係冇乜野好睇,
首先, 佢唔係話係啲咩大城市,
睇吓下圖車站附近o既環境就知,
車站前啲大廈, 高極都高唔過10層……

Anyway, 去觀光案內所睇下有咩發現, 丫又真有架喎。

原來松本市係人氣漫畫(連載完結),

兼今季新番, 兼真人版化o既作品 --- orange o既舞台。

不過可惜, 小弟對呢個作品一般般。

松本有咩睇, 松本城囉,
其實小弟5年前黎過……
不過當然係跟團, 趕鴨仔咁比較急,
加上今日又真係冇乜野好做, 咪行兩步路過去睇吓囉。

係度都簡單再講一講啦,
松本城同另外11個城, 被稱為12現存天守。
天守, 係指城池中心嗰個城樓
(就咁「XX城」係泛指包括護城河、城牆等建築),
而日本咁多城池入面, 好多天守都因為火災、地震、或戰爭等損毀。
天守能夠完好保全落黎o既, 連埋松本城只有12個,
所以有一定o既歷史價值。

工作人員打理石基。

入場費¥610, 一般般啦。

正門, 睇啲石o既堆法, 應該係比較早期o既建築。

分類大致上係咁,
最早期o既石牆, 係求其亂石堆成,
石頭冇乜打磿, 大小亦不一。

後來開始會揀一啲大小差唔多o既石,
稍作打磿, 或選擇較平嗰面向出,
而石同石之間o既空位就搵啲碎石黎填滿。

再後期啲, 係搵啲差唔多大細o既石, 好精心咁疊起,
石同石中間盡量冇空位。

而最先進o既, 當然就係舊舊石都打磨到差唔多大,
然後好整齊咁疊起來。

入主過松本城o既各代藩主。

有時會發現, 一啲石隙入面會攝左一啲碎石,
呢啲好明顯係地上面o既石春, 人為放入去。
唔知放入去o既人係咩心態啦,
但呢個絕對係破壞文物o既行為。
點解, 有讀過科學堂冷縮熱脹o既都明啦下話。

松本城o既人員, 著上古時o既打扮,
真係如詩如畫。
以武士甲冑上o既家紋黎睇,
小弟猜測可能係第三代城主 小笠原秀政 同佢正室 登久姫。

城入面有啲細細個o既正方或者長方形o既小窗,
方形o既係俾火繩槍, 長方形係俾弓弩射擊。

用黎倒滾水滾油落石o既窗口。

城入面展示左好多火槍。

火槍o既上彈程序。

小型火炮。

城入面o既樓梯超斜。
有啲位置, 一級可能到大脾咁高。

最頂層。


通常天守頂層都會恭奉有一啲神明以作保祐。

天守旁邊o既小樓, 望月台

望月台望番去主城樓。

望月台望向正明草地。

離開松本城, 經過一條街,
入面呢間舊書書店實在係好特別。

另外, 又紅經過一個叫四柱神社o既神社,
本身都冇乜興趣,
但係見到右邊細字寫有「むすびの神」,
小弟因為睇完新海誠作品《君の名は。》,
對むすび有點神經質,
結果受吸引入左神社行左個圈。
但其實冇乜特別。

老實講, 松本市真係實在冇乜野好行。
但有時欣賞吓呢啲小城鎮o既風景都唔錯。

成個市都有好多流水。

實在真係冇乜野好睇,

於是四點幾五點就番番旅館,

計劃一下黎緊兩日o既戲玉---立山黑部登山 o既旅程

八點幾土餓,
跟旅遊書o既介紹,
黎到一間出名信州味噌拉麵o既店。
淨係店o既外觀已經係令人期待。

叫得味噌拉麵, 都真係比較鹹,

但最緊要係背後o既味道。

而呢間拉麵店o既味噌, 係真係有鹹香的,

背後o既大豆發酵香味, 舌根回甘,

絕對係值得一試。

今日松本悠閒o既一日係咁多,

聽日開始, 小弟就會上立山黑部登山,

順便黎個《クロムクロ》聖地巡禮~

但背後, 台風10號卻已經向本州迫近......