小弟都係序入面講過,
今次黎立山黑部,
其中一個目的係新番動畫《クロムクロ》o既聖地巡禮,
不過為免影響遊記o既序述,
所以聖巡o既野寫係另一個POST, 唔係呢度記述,
番番正題
正如琴日所講, 台風10號迫近,
雖然唔係吹中長野、富山縣,
不過外圍雨帶影響, 加上山上天氣多變,
由小弟到達立山o既長野縣入口---信濃大町,
已經一直落雨, 好在小弟係出發前已經買左雨衣,
加上有朋友相贈長遮一把。
上圖: JR信濃大町駅
下圖: 車站外, 開往立山山腳扇沢駅o既巴士站。
係巴士停旁邊o既小屋買車票, 盛惠1360yen。
係呢度稍作簡介啦,
不過相信好多人都比小弟熟識。
立山黑部 呢個名由兩部份組成, 立山 + 黑部。
立山係指橫跨長野縣同富山縣之間o既立山連峰,
亦都係日本三大靈山之一(另外有富士山, 白山),
年中好多人都黎立山睇大自然光景之餘,
亦都一嘗登上三千米高峰o既挑戰。
而黑部, 係指黑部水霸建成之後形成o既黑部湖,
事實上, 正常o既立山黑部旅遊路線, 同黑部市一啲關係都冇。
到達立山山腳o既出發點, 扇沢駅,
果然都係落雨, 雨唔係太大, 但好密......
因為山上特別o既自然生態、多個高峰供登山人士挑戰,
加上黑部水霸o既偉大建築, 年間好多旅客黎到立山黑部觀光。
日本亦都積極發展立山黑部o既旅遊業,
遊客由立山o既一邊到另一邊, 一共要轉乘6種o既交通工具,
小弟陣間會一一介紹。
咁豐富o既體驗, 當然需要代價啦,
代價就係, 計埋小弟頭先嗰程巴士,
由信濃大町駅到另一邊o既富山駅, 單程一共要一萬幾yen。
當然, 其實有好幾條接駁巴士線, 係可以點到點,
到達山上其中o既大站, 而唔洗由頭順住坐齊咁多種交通工具。
不過一場黎到, 多數人都係乖乖地咁俾一萬yen出黎。
而接駁巴士, 多數都係登山人士利用比較多。
有左呢張票, 就唔洗到時轉一樣交通工具買一次飛咁煩。
張票印象中好似係三日間有效的。
成個立山黑部都有手信賣, 扇沢駅當然唔例外。
而且仲有雨衣、風褸、羽絨。
事實山地氣溫低、天氣變化又大, 唔做好準備真係會好大獲。
棲息係立山上o既白鼬,
上圖o既毛公仔同下圖o既長形筆袋都幾可愛,
可惜小弟要上山, 買左只會成為負擔......
就係上圖右邊o既公仔。
標示有建議o既水霸旅遊路線, 好讓大家等車o既時候計劃定。
小弟提過o既動畫《クロムクロ》,
話晒動漫係日本都係一個好有力o既經濟產業,
所以立山同富山一帶都有《クロムクロ》聖地巡禮o既地圖派發。
由希奈ちゃん、ソフィーちゃん
差唔多夠鐘上車,
排隊嗰時, 有個車站職員推左一車野出黎,
用好好中氣, 但又好嚴肅咁同排隊o既人講:
「歡迎大家長途拔涉黎到立山, 一路上大家辛苦了
要唔要買啲羊羮(日本甜品o既一種)?」
「呢個羊羮, 係立山黑部.......(中略)......
如果大家喜歡的話, 不妨買番啲試下......
......不過買左, 都只會變成行山o既負重......」
做乜事, 原來呀叔係黎搞笑......
「講樣野俾大家知, 其實你唔係呢度買都唔緊要,
因為其實山上面都有得賣」
「又再講多樣野俾大家知, 其實你唔幫襯我買我都唔會唔高興,
因為其實差唔多日日都賣唔出......」
黑部水霸o既觀光船停止運行。
好喇, 講左咁耐, 終於上車喇,
第一種交通工具係電動巴士,
名為関電トンネルトロリーバス(關電Tunnel Trolley Bus)。
好似電車咁運作, 只係下面冇路軌。
當然, 電力係由水霸提供。
坐16分鐘就到達下一站黒部ダム(黑部水霸)
大家可以留意,
如果由長野縣呢邊o既扇沢駅搭,
架車進入隧道冇幾耐, 就會有黃色o既燈箱,
寫住o既係「由此開始為富山縣」
冇錯, 即係話巴士係地底, 經過左縣境進入富山縣。
當然, 由富山縣出發的話, 見到o既係長野縣字樣。
轉左, 就只雖落60級到水霸,
而轉右, 就要行220級, 到達水霸外圍o既展望台。
上圖: 轉右, 上220級往展望台
下圖: 轉右, 落60級往水霸
小弟當然係先難後易啦,
不過係值得的。
其實小弟係2011年, 都同屋企人跟旅行團黎過立山黑部,
不過鴨仔團, 始終都係趕鴨仔,
當年只係係水霸上行過,
都唔知完來有個咁好景o既展望台。
唯一美中不足o既係今日雨勢比較大......
不過因為打風落雨o既關係,
所以停止放水, 只係剩番兩條小水柱。
係當年起水霸用黎裝水泥o既容器。
展望台附有餐廳同展覽室,
不過呢邊o既餐廳比較細規模啲,
而另一邊仲有比較似樣o既餐廳,
所以小弟只係睇下展覽室o既影片就算啦。
影片全日文放送, 講左黑部水霸o既歷史, 小弟係度稍作講解。
係二戰後, 日本o既関西電力工司同日本政府認識到,
要令國家盡快恢複同發展, 足夠而穩定o既電力係不可少o既條件。
於是係1956年開始著手係立山上面起水力發電廠。
當然, 成60年前, 仲要係二千米高o既山巒當中起水霸,
花費o既人力物力心力, 係想像唔到咁多的。
如果天氣好的話, 可以用1080yen, 享受30分鐘o既船程。
影埋個全景之後, 小弟就落去水霸上面喇,
如下圖所示, 水霸o既標高為1454m。
所以都冇乜野好影,
為左避雨, 去到水霸另一邊o既餐廳食少少野。
小弟冇諗到佢用o既係青咖喱。
要成一千yen, 就係就貴左啲,
但好在都尚算好食, 青咖喱幾香口,
炸嗰兩件野係豬肉。
都講過, 近期有套動畫《クロムクロ》
以立山黑部同富山市作為故事舞台,
所以係黑部水霸o既店都唔難見到相關o既poster同周邊產品。
由希奈ちゃん同ソフィーちゃん o既大型掛畫。
其實立山黑部都有佢自己固有o既卡通代表。
水霸o既另一邊係黒部湖駅,
由呢度坐纜車(黒部ケーブルカー)到達下一站---黒部平。
如果冇買貫通車票o既朋友, 就要係上圖o既地方買飛。
而下圖就係纜車。
為左保護山上o既自然環境,
黑部cable car全線都係係地表下面,
亦都係全日本唯一全線都係地下o既纜車。
用o既車箱, 由1969年開業到而家, 都冇更換過。
不過又係啦, 落雨, 乜都睇唔到。
除左行過有足印之外, 乜都唔好留下」
下圖係立山ROPEWAY(立山ロープウェイ)黒部平駅,
亦係小弟下一種會乘搭o既交通公具, 由黒部平通往大観峰。
呢個時候坐呢個ROPEWAY欣賞紅葉, 絕對係享受。
不過今日落雨, 實在真係乜都影唔到......
由海拔1828m到2316m, 全長1.7km, 7分鐘車程,
但全程吊車一條支柱都冇,
全靠兩個車站拉住條鋼索。
由大観峰搭 立山トンネルトロリーバス (立山Tunnel Trolley Bus) 到達室堂。
其實都係相類似o既巴士, 由上面o既電纜提供電力。
10分鐘車程到達海拔2450m高o既室堂, 亦都係小弟今日o既終點站,
因為小弟會係呢度過一晚, 然後登上立山第二高峰---雄山。
上圖係室堂o既郵局, 提供有限度o既服務,
其中包括下圖各色各樣o既名信片。
記得小弟5年前, 買左一片中間嗰種木片名信片寄俾人。
對於登山人士黎講, 室堂係立山登山o既一個重要據點,
因為由呢度登山比較方便,
而室堂駅附近亦都有好多住宿俾登山人士入住。
小弟當然都唔例外。
上面左手邊寫有當天氣o既概況,
而右邊密密麻麻o既, 係詳細報告山上o既路面狀況,
同埋近期係山上遇上意外o既記錄,
當中不乏係山上跌死o既記錄, 睇落都幾嚇人。
另一個就係小弟今晚下榻o既小屋, 雷鳥莊o既位置。
地圖睇落好似好近, 但就算小弟全速行進, 都要花上廿分鐘。
再加上大風大雨, 小弟就算有雨衣都好, 下半身都係濕晒......
又落雨又冇野睇又全身濕晒,
本身心情都幾屈悶下......
不過入到雷鳥莊, 情神為之一振,
因為小弟冇諗過間山小屋咁骨子。
係好似富士山或者上高地嗰種,
得個床位或睡袋嗰種, 又迫又濕又唔舒服o既山小屋。,
不過完來室堂o既旅館意外地幾工整。
如果好天的話, 晚上好似會有免費觀星團
有咁好o既環境, 話知佢窗外落幾大雨都好XD
原來立山o既小屋, 多數都設有乾燥室,
好讓旅客晾乾滑雪用品或者係行山用品。
小弟條濕晒o既牛仔褲, 係呢度放左一晚就乾晒。
晚飯時間。
唔知係咪小弟o既預期真係太低,
呢間雷鳥莊一次又一次咁俾小弟驚喜。
以前住山小屋, 因為山高路斜, 物資不便,
所以早餐都係得一pat爛飯, 加粒酸梅、一片漬魚、兩塊紫菜就算,
但呢度竟然係有九大簋!
上圖右邊o既小鍋就係下圖o既海鮮,
雖然唔係刺身用o既level, 但食材都好鮮味。
臨瞓前仲有驚喜,
就係好正o既浴場!
當然, 浴場係唔應該影相的, 大家唔好學,
但小弟實在太興奮,
於是瞄準時候, 趁冇人快閃左兩張!
第一層係普通o既沖身地方同熱水池,
而第二層, 就係下圖o既溫泉, 真係溫泉水,
因為其實室堂一帶都有火山運動, 聽日會再介紹。
小弟o既目標, 係上雄山山頂睇日出,
日出時間係0521, 所以小弟嗱嗱聲沖完涼之後,
2000就上左床瞓了。
沒有留言:
張貼留言