十日十一夜 立山黑部登山魷 --- 第八日 越中八尾おわら風の盆 2016

呢篇同上一篇"第八日《 クロムクロ 》聖地巡禮 總集"發生係同一日,

不過小弟想將動漫同一般旅遊分開,先至拆開黎寫。

所以有兩篇第八日係正常的。

番番正題,

1/9 o既傍晚開始,

小弟要由富山駅搭半個小時,

到越中八尾呢個地方, 參觀おわら風の盆。

お盆, 即係日本o既盂蘭節慶,

係日本人心目中, お盆o既重要性同中國人o既農曆年有得fight。

一到左夏天, 日本各處都會有お盆o既納涼節慶。

而おわら風の盆就係係北陸一帶最出名o既節慶之一。

正日係1/9-3/9, 但另外仲有前夜祭係8月尾嗰幾日。

初初小弟認為, 北陸呢啲山卡啦, 多人極都有個譜,

點知小弟錯了。

一到富山駅, 見到好多人係車站,

都以為只係稍為多啲人排隊搭車,

距離列車開出仲有大半個鐘,

於是小弟大安旨意坐埋一邊,

等到例車開出前十分鐘先行上月台。

點知小弟入左閘想上月台o既時候, 就俾工作人員閘住。

完來因為太多人去越中八尾,

要實施攞籌排隊搭車。

先到車站大堂counter(上圖)拎一張籌(下圖),
然後去車站大堂o既一邊排隊。

先弟之前係大堂見到「稍為多啲人」,
原來只係冰山一角......
係車站o既一旁, 早已經排左幾百人(下兩圖)......

小弟本身想搭嗰班車, 一早已經派晒籌,

攞到最早o既籌, 係兩班之後o既列車(45分鐘之後)......

即係話頭先小弟一黎到就攞籌,

先可以搭到預期要搭嗰班。

車箱入面都塞滿晒人,

雖然冇東京o既rush hour咁迫人,

但以呢啲山卡啦線路黎計,

已經係好不可思意......

搭左半個鐘, 到達越中八尾,

一落車, 月台已經掛滿燈籠, 好有節日氣氛。

人多不在話下, 連車站外都要實施人潮管制(下圖)

一出車站已經好多街檔,
但事實上, おわら風の盆o既主要區域唔係車站附近,
而係車站向南行約半個鐘, 井田川南岸一帶o既小鎮,
不過沿路都有好多街檔, 所以半小時路程一啲都唔會悶。

五顏六色o既刨冰汁。

(上下圖), 超傳統同老套o既檔攤。

多人到爆, 絕對唔會唔識路。

要到達節日主地域, 就要橫過井田川。

講左咁耐, 都未講おわら風の盆係咩一回事。
其實日本o既お盆, 都離唔開跳一啲傳統o既舞蹈。
而おわら風の盆o既特色, 係以游擊o既方式,
不定時係小鎮入面巡迴表演。

想知幾點係邊度有演出, 可以上官方網頁睇時間表,
時間表記有邊一隊人馬幾點係邊幾條街出現,
不過地點同時間都只係大概,
實際睇唔睇到, 就靠運氣。



但事實上, 當晚有好多表演隊伍,
所以唔需要擔心睇唔到表演。
就好似小弟咁,
啱啱進入範圍, 就遇到一隊,
係某蕎麦麵店外表演。

下圖呢條友, 其實係負責唱歌。

下圖呢個呀叔, 其實都係負責唱歌。

曲終人散, 小弟繼續行入去おわら風の盆o既核心範圍。
途中經過八幡社, 好似新就黎有表演咁,
於是攝番個靚位等睇show。

果然, 冇幾耐, 就有人出現。
不過同頭先嗰啲正正式式o既表演比,
呢個表演, 出場o既係以小朋友為主,
純粹大家happy吓。

雖然唔係專業,
但睇到啲小朋友笨拙o既動作,
又的確會令人會心微笑。

再行一段路, 經過一個石垣,
石垣內o既建築物好似好熱鬧咁,
於是小弟又中個頭入去。

行石級上石垣, 原來係一個叫聞名寺o既寺廟,
寺廟主建築前有個大空地,
空地上有好多食肆檔攤,
而寺廟主建築就成為舞台,
台上正表演緊お盆o既舞蹈。
古色古香o既寺廟建築, 加上傳統舞蹈, 真係如詩如畫。

睇左兩三隊人馬之後,
就再向住核心市街地進發。

途中又遇到游擊表演。

其實如果以お盆舞蹈, 作為外人o既小弟唔係太識得欣賞,
不過成個小鎮, 每個角落都充滿住節日o既氣息,
轉個角落, 可能會有意思不到o既表演或者發現,
呢個感覺實在係好好, 可能呢個就係越中八尾おわら風の盆咁出名o既原因。

繼續行, 途中經過有啲食店,
入面有專人表演お盆舞蹈, 跳俾食客睇。

小弟一直話向住核心市街地行, 係咩意思呢,
其實除左係唔同o既街道上有游擊表演之後,
八點開始, 係上新町至西新町o既大街,
會有大型お盆舞蹈表演。

就係上圖呢條大街。,
不過時辰未到, 所以小弟繼續逛下先。








行到街尾, 見到幾個妙齡少女, 由お盆o既會館行出黎。
聽佢地o既對話, 似乎係正式表演前有少少時間,
想趁機行吓。

點知行唔夠幾步, 就俾幾個路邊o既大叔叫住,
話想睇佢地表演吓お盆舞蹈。
估唔到幾個女仔, 商量左一陣, 又真係肯跳架喎。
於是就開始左一個小小o既游擊表演,
吸引左途人o既圍觀。

差唔多到表演o既時間,
大家都開始係路旁霸位。

好難想像上圖係一人個超山卡啦小鎮o既晚上八點,
多人到真係行唔郁......

好遺憾, 小弟原來睇錯左大會派發o既時間表。

小弟等睇表演嗰個位置, 當晚巡遊表演唔會過到黎,

但當想行番去表演o既街道路段時, 已經發覺冇可能攝到入去,

因為實在太多人......

小弟離遠, 見其實o既巡遊表演, 同頭先睇到o既游擊表演差唔多,

加上時間已經比較夜, 趁仲未係散水高風期, 嗱嗱聲打道回府。

途中又經過見到一間食肆o既包廂有お盆舞蹈表演,
吸引店舖對出街上途人o既圍觀。

臨離開表演區域, 又遇到一隊游擊隊。

就咁, 就度過左一個充實o既晚上。

回程o既車站, 亦都係要排隊進入月台,
不過今次唔洗攞籌。




越中八尾おわら風の盆
講唔上係咩驚天地泣鬼神o既特別節目,
不過就算係好怕人多o既小弟,
都認為おわら風の盆幾令人enjoy,
可以打發一整個晚上而唔會覺得浪費時間。

對於 越中八尾おわら風の盆 有興趣o既朋友,
可以參考官網
http://www.yatsuo.net/kazenobon/index.html