魷日記: 四日三夜紀伊熊野和歌山 --- 第二日熊野那智大社 + 那智瀑布

正式開始旅遊o既章節喇。

先講吓個Title, 紀伊熊野。

咩叫紀伊呢, 其實係講緊日本古時,

曾被紀伊國管治o既範圍,

大概係現時和歌山縣同三重縣o既南面,

亦即係下圖紅色o既區域。

因為以前日本o既首都係京都同奈良一帶,

紀伊半島成為左東、西日本來往必經之地,

所以紀伊半島有好多古道, 係以前啲人東西往來o既道路,

而紀伊o既熊野古道, 就係當中o既古道。

當然係日本, 有人o既地方就有神社寺廟,

而係紀伊, 最有名氣o既就總稱熊野三山o既三個大社:

熊野本宮大社、熊野速玉大社、熊野那智大社。

小弟今次o既旅遊, 就係去晒熊野三山,

同埋行一少段o既熊野古道。

小弟一向都唔介意買啲平車票, 然後坐啲逐個站停o既火車,
應該話, 小弟反而係好享受慢慢坐鐵路同轉車o既過程。
小弟平時就用開青春18,
不過因為今次呢個旅程個時期, 係春青18 o既使用期間外,
所以只好搵吓睇下有冇其他平車票。

基於小弟去o既地方地沿關係
能夠用o既平車票有限, 當中就揀左「秋の乗り放題パス」,
7710yen, 可以任搭JR o既快速同普通車自由席,
有效期為連續三日(可指定)。
於是小弟就開始左一連三日o既紀伊之旅。

睇到一開始o既地圖, 大家都見到紀伊都係沿海地帶,
而JR紀勢線, 更加係大部份時間都係貼住海黎行駛,
所以可以一直飽覽海景

紀勢本線會兜過紀伊半島最南端,

而當中o既串本駅, 就係日本本洲最南o既車站。

如上圖o既牌所示。

0624由大阪駅出發,

搭左7個鐘車, 終於係1326到達紀伊勝浦駅(下圖)。

上圖係車站前o既樣貌,

要搭幾粒鐘車先黎到o既山卡啦,

你都唔好期望佢係咩啲大城市。

馬不停蹄, 小弟帶埋行裝,

接住就去第一個目的地那智大社。

JR車站旁邊就係巴士站(下圖), 巴士站入面有locker,

小弟就將冇必要o既物品先寄放係locker。

買巴士車飛。
買來回票抵啲, 仲可以係某啲車站無限上落(上圖車票綠色線區間)。
不過佢地班次都算疏, 除非一早黎到,
如果唔係無限乘搭未必用得著。

係萬物皆可萌o既日本, 周圍都可以搵到美少女化o既吉祥角色,
上圖就係熊野三山三個神社o既美少女化人物,
不過小弟今次唔係坐上圖呢個周遊巴士,
而係普通o既民用巴士。

有人話香港人好識玩日本, 越玩越刁鑽, 其實都真係的。
除左小弟之外, 都不乏好多識玩之人,
就好似小弟係呢個山卡啦地方等巴士無耐,
就黎左一行幾個香港遊客, 年齡大概四十幾五十左右。
結果一架巴士, 入面坐左大部份都係香港人......

小弟搭o既係1310嗰班巴士, 原本可以直接到達那智大社,

不過小弟選擇早幾個站, 係大門坂落車。

由大門坂行到去那智大社呢條路,

就係以前啲人千辛萬苦行去參拜o既古道,

仲被列入世界遺產, 所以小弟一早已經將呢段路plan埋入行桯入面。

雖然係荒山野嶺, 但有詳細o既地圖, 唔洗擔心會迷路。

就係剛剛步入古道冇幾耐, 就有一間小店,

話可以出租平安時代o既衣著。

小弟行經o既時候, 都有人係入面換緊衫。
而事實上, 一路到那智大社,
都有好多人穿上古時o既服飾,
睇黎呢間野啲生意都幾好。

當然, 小弟冇咁o既金錢同興趣換衫,
於是就咁向住那智大社進發。

上圖就係穿著平安時代服飾o既遊人。

雖然話係古道之一,
但大部份都係鋪好o既石路, 而且比箱根o既古道鋪得好。
其實可能箱根嗰條古道先係原汁原味o既古道, 但真係好難行......
詳情請閱「七日六夜箱根東京千葉魷第一日 --- 箱根」

行左大約半個小時, 就快到達那智大社。

因為那智大社依山而建,
所以都幾多樓梯級要行。

一個又一個大鳥居

上圖就係那智大社o既主建築群。

望番落山, 原來都已經上到咁高。

主殿

自動波放低100yen, 然後就拎條木去燒, 驅病消災。

熊野三山, 成日都會見到八咫烏,
因為八咫烏係日本神話入面,
係同熊野一帶有關聯o既神使。

由上圖o既休憩亭望向山下(下圖)

那智大社入面, 唔難搵到上圖o既呢棵樹,
棵樹係有搞作的。
樹入面係中空, 參拜o既人可以捐入棵樹入面,
但基於人流同方向o既問題,
好多人都搞錯左, 係個出口道望望吓。

其實首先繞過棵樹到背面,
就會見到下圖o既木枱。

木枱上面有一條條木,
好似上圖咁, 放低300yen, 寫個願望係條木度,
然後先好拎住條木爬入樹入面。
係枱面都寫左若干例句, 而小弟就揀左家內安全。

上兩圖係樹窿o既入口。
而下圖係由樹窿望番向入口。
其實個窿都幾窄, 肥少少都咪洗指意過到。

上圖: 由樹窿望向出口, 係要爬梯上的。
而下圖就係上左條梯, 望番落樹窿底。

爬番出黎, 期實冇乜特別......
係喎, 仲有條木呢?
係出口會見到下圖o既架, 將條木放係架上面,
到時到候神社o既神官就會一邊念經一邊燒木,
你o既願望就會乘著輕煙飄上天。

另外, 賣護身符嗰邊都有啲搞作,
就係成半個人咁高o既籤筒。
唔單只大舊, 仲因為真係用實木做,
所以都幾重吓。
可以見到下圖o既女士都拎得幾吃力。

一般o既神社小弟都唔會求籤架喇,

不過去到啲有番咁上下名望o既神社, 都會求番張o既。

果然, 寫埋啲野都係無陵兩可......
咩搞清楚自已o既實力, 搵番附合o既事情盡全力做,
一步一步咁黎, 就會有新希望......
洗鬼你講......

頭先都提過, 紀伊一帶同日本神話入面o既八咫烏有啲淵源,

所以那智大社有烏鴉形o既籤文出售, 盛惠500yen

當然, 護身符都有啦, 仲有好多種,
又幸福、合格、心想事成、夫婦和睦、結良緣等等。

跨過上圖o既門, 就會見到下圖o既建築,
唔洗講, 大家都feel到有啲唔同。
有別於神社一般用橙紅色, 下圖o既建築係冇乜上色,
仲要咁大隻字寫住乜乜觀世音,
大家都應該估到, 下圖o既建築係佛家寺廟,
而唔係日本神道教o既神社。

一般般, 冇乜睇頭, 加上小弟都冇細心睇,
因為小弟黎那智山, 最主要係黎睇瀑布的。
就係寺廟對出o既空地(上圖),
可以離遠望到那智瀑布(下圖)。

向住瀑布進發, 會經過一排賣手信、小食o既店家。

睇黎那智一帶出名「黑石」(上圖),
因為其實行上黎那智大社沿路都有好多店賣,
最多o既係拎黎做硯。

心水清或者見聞廣o既朋友, 可能會聽過日本出名紀州梅,
係呢度提起, 冇錯, 紀州就係指紀伊一帶,
所以點可以唔試下梅味o既雪糕呢。

小弟可以寫包單, 好食!
甜酸適中: 雖然比起一般雪糕較酸, 但唔會令人流酸口水, 而係生津回甘。
另外, 仲會咬到細細粒梅肉, 非常清甜。
小弟本來行左咁多路, 都幾口乾,
但一食啖雪糕落口, 即刻feel到啲梅o既成份滲入喉嚨, 潤番晒, 精神為之一振。

一來出品唔差, 二來小弟都比較喜歡食較酸o既雪糕、雪芭,
所以呢杯雪糕真係啱晒小弟。

(上圖) 純粹影番張啫。

大家都見到, 小弟而係同條瀑布大約係水平的,
而睇那智瀑布o既地點係係瀑布底,
所以遊人都要先落山。
可以揀迂迴o既馬路斜路, 又或者好似下圖一直線o既石階。
因為要趕巴士o既原故, 加上小弟都仲算係有咁上下腳骨力,
所以梗係跑樓梯啦。

越黎越近喇。

落到底, 就會見到一個擺明就係入口o既入口。

穿過鳥居再行多幾十米,
就可以見到下圖o既那智瀑布。

那智瀑布係日本最高o既瀑布......咪住先......
如果有爬小弟文章o既朋友,
可能會記得, 之前九月去完富山,
先啱岩講完話「称名滝」係日本最高o既瀑布,
咁邊句先真???

是咁的, 以瀑布整體黎計, 称名滝係最高的,
但称名滝係分左幾段o既瀑布,
如果以單一段落o既落差黎比較的話, 就係那智瀑布贏喇,
所以大家都係日本最高的......
你chur我都冇用架。

好似都仲係同條瀑布o既距離遠左啲喎,
如果真係想再近距離啲睇的話, 可以到瀑布左手邊(向住張圖),
有個地方賣護身符。

係嗰度(下圖)俾多300yen, 就可以再行近啲。

300yen, 入場券連護身符咁o既野。

好, 再向住瀑布行近啲。

有個小水池, 話飲左瀑布啲水可以延年益壽咁話。

上圖橙紅色欄杆個位就係最近瀑布o既觀光點,
仲會感受到啲水花飄埋黎添。

好喇, 再唔走就冇車架喇......

為左方便聽日o既行程,
小弟今次留宿o既地方, 係和歌山縣同三重縣交界o既新宮。

係地圖睇, 好似好多馬路, 以為好繁華,
點知......成個市先得兩三間便利店......
有幾繁華, 可想而知......

不過係呢個咁唔繁華o既小鎮, 今晚異常地熱鬧。
市內最主要o既大馬路成條封左。
問左啲警察, 好似話呢幾日都有慶祝活動,
而今日係最後一日, 即係所謂o既後夜祭, 會有巡遊。