四日三夜 紀伊熊野和歌山 --- 第三日 熊野速玉大社 + 熊野古道 + 熊野本宮大社 + 和歌山拉麵

黎到紀伊遊o既最後一日喇,
一早爬起身出發, 先係到位於新宮市內o既熊野速玉大社。

因為小弟事先冇乜話好仔細做功課,

所以都冇留意到, 原來15,16日係速玉大社o既例大祭。

跟據資料板, 好似話下午會有御船祭,

會係旁邊o既河有啲搞作,

不過小弟實在行程緊密, 加上小弟比較想去行吓山多啲,
所以唔會留到下午......

可以見到有兩台神輿, 應該係準備下午御船祭用的。

圖入面o既石屏風, 記有日本歷史上黎過參拜o既天皇,
需知道係以前, 要黎呢啲山卡啦都唔係話咁易,
所以有咁多天皇參拜過, 都証明熊野神社都幾有份量。

琴日篇文都提過, 紀州梅係幾出名的,

但350yen要千幾yen……

睇完速玉大社,
要行去搭巴士到熊野本宮大社。
不過見今日河邊有大祭,
於是就兜少少路, 去河邊睇睇有咩搞作。

放係岸邊嗰幾艘船, 相信就係祭典用o既船。

好喇, 要趕路喇,
搭大約一個鐘頭巴士, 到達熊野本宮大社o既入口。

圖中就係本宮大社參道o既大鳥居。

如果有睇過介紹紀伊一帶o既旅遊書,
應該都會見過呢個東東。

雖然係黎到本宮大社前面,

不過小弟並唔係先入去本宮大社。

因為基於班次同路程時間問題,

小弟會先再轉車到深山o既「發心門王子」(地方名來的),
由嗰度出發, 行一段熊古道, 出發黎先再睇本宮大社。

係大社門口轉巴士, 到發心門王子落車,

車程大約係半個鐘。
車就得半個鐘, 人行番出黎就預計要兩個幾鐘……

古道有好多條, 連接唔同o既地方,

而小弟今次行o既古道,

正式名稱係熊野參詣道中邊路。

熊野參詣道中邊路係一條容易到達、唔算太長,

多人選擇, 又唔算難行o既古道

事實上, 即使今日唔係公眾假期,

小弟乘搭黎呢度o既巴士係full的。

所謂o既乜乜王子,
其實係祭祀用o既小神社,
當年熊野古道最頂盛時, 有九十九個「王子」,
不過後來好多都冇左。

開始o既路係瀝青路, 可能係俾山入面o既居民用,

因為都仲係近大馬路o既關係, 所以都唔算話好荒蕪,

沿路都有好清晰o既指示。

如果要行古道的人, 要小心留意,

途中冇乜幾多個洗手間或者賣野食o既地方,

有的話就好去定先。

就係發心門王子行向本宮大社, 出發冇耐就有一個洗手間,
要去好去定。

小弟真係好好彩, 絕大多數去遊行o既日子都係好好天。

行十零分鐘, 開始冇乜民居,
而路亦都開始變成由大石鋪成o既郊遊徑。

行半個鐘, 開始進入森林地帶。

估唔到行到黎呢啲深山, 都仲有呢啲自助寄賣店。

行左差唔多一個鐘, 黎到「拜服王子」附近, 開始多番啲民居。

黎到拜服王子附近, 終於有番間小賣店。
而行到黎呢度, 小弟o既路程亦都已經行左超過一半。

雖然天氣唔可以話係好熱, 甚至可以話係行山o既好天氣,

但一路係咁行山路, 都唔好話唔熱,

見呢度有好特別o既飲品---紫蘇葉汁,

於是買杯黎試下。

初初仲以為會好澀口, 成陣草藥味,

但意外地易入口。

當然, 實有加糖o既, 不過杯野保留左紫蘇葉o既清新味道,
而甜度又適中, 非常之清涼潤喉。




離開小賣店, 小弟繼續埋唔夠一半o既路程。

行到咁上下, 會有一個分歧點,

正如路牌所顥示, 稍為兜少少路,

就可以到達見晴台地(觀景台),
而呢個觀景台睇o既, 就係頭先係參道o既大鳥居喇。

兜o既路唔算多, 加上小弟已經一早預左行呢條路,
所以小弟毫不猶豫就向觀景台前進。

圖中就係由觀景台望向大鳥居。

好似話呢個位係睇日落o既勝地。

由呢個小山崗落山, 好快番番到去熊野本宮大社喇。

古道嘛, 其實又唔係話有咩特別野睇,好似話呢個位係睇日落o既勝地。

加上都需要時間,
所以如果唔係對行山有太大興趣的話, 可以唔行都冇乜捐失。

正式進入本宮大社,

不過老實講, 又唔係話真係咁特別,

可能因為睇完琴日o既;那智大社, 有瀑布,
速玉同本宮就相形見拙。

時間都到四點幾, 開始西斜,
加上小弟仲要搭車離開熊野一帶,
所以都係走喇。




因為小弟計過車程,
今日唔足以一口氣由紀伊一帶番番去大阪,
但如果留番聽日由紀伊一take過番大阪的話,
要不是好早起身, 要不是趕唔切飛機,
所以小弟決定取個平衡,
今日暫且先轍退到和歌山駅,
咁聽日o既時間就會好用好多。

去到和歌山駅, 已經係晚上七點,
去酒店check in 左之後, 先去醫肚。
小弟近年愛上左係日本食拉麵,
而和歌山市o既拉麵, 亦係別樹一格,
小弟又點可以唔試呢, 不過為左統一下立文章o既內容,
小弟會將今晚食拉麵o既部份放到聽日嗰o既章節一次過講,
想知小弟食左啲咩拉麵, 千祈唔好錯過聽日o既文章喇。