四日三夜 紀伊熊野和歌山 --- 第四日 和歌山拉麵 + 和歌山城

琴晚提到, 和歌山市o既拉麵別一格,
而家就等小弟黎介紹一吓啦。

和歌山o既拉麵, 按照湯底,

主要分為 豬骨醬油拉麵 同 醬油豬骨拉麵……

你係咪以為小弟傻左? 定係打錯字?非也

和歌山o既拉麵, 真係由豬骨湯底同醬油混合構成,

問題只係兩者o既比例,

醬油重啲o既, 就係醬油豬骨拉麵,

豬骨湯成份多啲o既, 就係豬骨醬油拉麵。

咁當然, 其實兩者比例係一個spectrum,

唔係話只有兩極化的。

小弟琴晚黎到和歌山, check in左之後第一件事,

就係要搵間拉麵店醫肚喇。

咁當然, 小弟一早做晒research, 已經選定左想食o既拉麵。

今次黎呢間, 距離車站都有十五至廿分鐘距離,

係一間叫 井出商店o既拉麵店。

要留意o既係, 日本o既拉麵, 除左會寫成ラーメン之外,

仲可能會寫成中華そば。

反正, 其實拉麵都係由中國傳入的。

講番井出商店, 本身都係一間老店,

湯低係屬於醬油豬骨拉麵, 即係話醬油味比較重。

咁佢有邊幾款麵可以揀呢?

睇下下圖個餐牌就知, 得一種……

只可以揀正常、加大、加加大, 又或者係加叉燒and/or烚蛋。

不過咁先好, 即係話佢地夠專一、專業,
而呢個亦都係好多日本老字號o既特色。

好喇, 入去食。

真係想食出湯底真味的話, 係唔會叫加大麵量的,

因為加多左o既麵, 會溝淡左湯底o既味道。

有啲店, 會係加底o既湯入面加番多啲調味料,

但咁做亦都令湯底o既成份比例唔同左。

所以係食最好味o既拉麵, 就唔好搞咁多野,
叫個普通招牌拉麵o既就。

食落, 果然係醬油比重較高o既拉麵,

入口比較滑, 冇豬骨湯低咁笠, 一食落已經好重醬油味,

不過豬骨湯o既番味係之後慢慢滲出。

同以前食開醬油豬骨二揀一o既拉麵味道唔同,

有好新奇o既味道。不過小弟略嫌醬油o既苦澀味稍重。

另外, 和歌山o既拉麵店,

仲有一樣別樹一格o既野, 連其他縣o既市民都覺得新奇,

就係店家o既枱面上, 都會放有「早すし」(早壽司)。

所謂o既早すし, 其實係鯖魚壽司,

大家如果覺得一個拉麵唔夠飽的話,

唔洗問店家, 直接係枱面拎黎食就ok,

不過當然, 都係要俾錢的。

係最後埋單時同店家講你食左幾多舊,

店家就會同你計數。

講完琴晚o既拉麵,
到左真係今日o既行程喇。

老實講, 對於小弟黎講,
和歌山市內好似真係冇乜野好睇,
加上小弟只有一個上午o既時間,
所以選擇非常有限,
而和歌山城就係好好o既一個選擇。

和歌山城依河而建,
而河流就成為左護城河o既一部份。

因為和歌山城係建立係伏虎山上,
所以和歌山城又叫伏虎城,
亦都解釋左點解呢度有隻老虎o既石像。

和歌山城經歷左幾代o既城主, 亦都分幾個時期興建,
所以係和歌山城唔同部份都可以見到唔到o既堆石方式。
上圖o既石垣, 石頭大少比較不一, 冇乜點打磨, 而整體體積比較細,
小弟斷估應該係比較早期興建的。
而下圖o既石頭較大, 打磨得比較工整,
應該係後期建成的。

因為和歌山城起係山上,
所以要上主成樓的話, 就要係咁行樓梯。





和歌山城經過幾次大火, 再加上近代o既廢城令同埋二戰空襲,
和歌山城好多建築物已經不復存在,
而下圖係本丸o既遺址。

見到主城樓, 亦即係「天守」喇。
都講過, 天守一早已經不存在,
而家見到o既天守,
係1957年用鋼筋水泥, 按資料重建的。

重建後o既和歌山城,

同大阪城嗰啲一樣, 天守入面係博物館,

展示歷史文物。成人入場費為410yen。

有啲人會話個個城都差唔多架啦,
其實, 毎個城都有佢獨特o既地方,
例如和歌山城, 就如上圖所見,
係少有以環形設計, 之後再介紹,
而家先上天守o既頂層先。

天守頂層外有木搭o既迴廊, 可以行出去腑瞰和歌山市o既景色。

上圖中門見到一條橋, 連接西之丸同二之丸,
係咁日本眾多城池當中亦都係比較奇特o既設計,
陣間會再講。

上圖下半部, 隱約見到和歌山城環形建築。












下圖就係和歌山城環形o既走廊,
不過入面冇乜特別好影,
「不識盧山真面目」嘛。

上、下圖就係連接西之丸同二之丸嗰條橋o既入口。

可以見到條橋係斜的, 亦都係呢條橋特別之處之一。

望番上去和歌山城。

因為條橋係斜的,
為左唔好跣親,
所以地面木板成鋸齒狀。

望落幾過隱, 但行落都幾拮腳......

小池有一小樓閣,
名叫「鳶魚閣」, 名字取自詩經「鳶飛戻天、魚踊于淵」,
有時真係覺得日本人對中國文化, 仲要比中國人知得多......

差唔多到中午,

又係食拉麵o既時間。

今次揀左間係和歌山城附近o既拉麵店,

名叫「山為食堂」。

雖然位置係和歌山城附近,
但實際上拉麵店位於啲住宅小巷入面,
如果唔係有旅遊書介紹,
正常人都未必可以搵到黎。

深色o既木材, 更顯得店舖o既歷史感。



都係啦, 小弟叫o既係最basic o既拉麵,
只有叉燒三片, 魚糕三片。

今次呢個拉麵同琴晚嗰個唔同,
大家仲記唔記得琴晩嗰個醬油味較重, 所以係醬油豬骨湯底。
而今次呢個山為食堂o既湯底,
豬骨湯比例較多, 所以係豬骨醬油湯底。
大家見唔到到下圖湯底剩低o既泥狀物,
呢啲骨髓, 就係豬骨濃湯o既証明。

講番味道先, 好濃厚o既豬骨湯味,
但又有醬油o既甘味, 真係好正, 非常合小弟口味。
小弟都只係食過兩間店o既拉麵,
但要小弟係醬油豬骨湯底同豬骨醬油湯底入面二揀一的話,
小弟會揀醬油豬骨湯底。



食完拉麵之後,
就向關面機場進發番香港,
結束呢四日三夜o既短trip喇。
而 四日三夜 紀伊熊野和歌山 o既旅行就到此為止。