四日三夜 紀伊熊野和歌山 --- 第一日 早見沙織LOVE LIVE LAUGH演唱會(大阪場)

雖然個Title係四日三夜 紀伊熊野神和歌山,

但其實今次o既行程, 主要目的係為左睇聲優 早見沙織 o既演唱會。

不過淨係去睇個演唱會又好似好嘥咁,

於小弟決定留多兩三日黎個短trip。

咁啱演唱會係大阪 NHK Hall舉行,

於是小弟就plan左去一個working holiday時代已經好想去o既地方,

就係係紀伊半島o既熊野三山: 熊野本宮大社、熊野速玉大社、熊野那智大社。

因為第一日行程係睇演唱會同睇戲,

對早見沙織冇興趣, 想睇旅遊o既朋友可以跳過今日呢篇,

直接落聽日嗰一篇。

 今次呢個旅程可以話充滿住早見沙織,
因為除左係睇早見沙織o既演唱會之外,
仲睇左《聲の形》呢套劇場版動畫, 好主角都係早見配音的~
另外, 聽日開始o既紀伊熊野旅遊,
亦都同早見沙織配音o既動畫《RDG》有啲淵源。




凌晨機到左大阪,
晨早流流到左阪急梅田駅,
係候車室坐係度恰左陣眼瞓之後,
就去睇戲。

同場送上、下圖o既小漫畫。

老實講, 雖然京都animation o既作畫真係冇得彈,
但套動畫o既劇本同演出真係麻麻地。
原作係點就真係唔知,
但劇場版真係好悶, 故事東一忽西一忽, 冇左重心......



睇完戲, 去左酒店放低左行里之後中午十二點幾,
首先係去今晚演唱會會場排物販,
因為會場物販係由1400開始,
早個幾鐘去排隊是常識吧。

演唱會會場, NHK Hall

雖然小弟十二點半鐘左右已經去到會場,
但場內已經有百幾人排緊隊。

演唱會Goods List。
小弟黎個全Goods。
人生第一次o既歌手one man live,
第一次o既物販......

買完野, 只係兩點幾鐘,
係谷町九丁目附近食左個すきや之後,
就番酒店稍事休息,
等到四點幾鐘, 再出發去會場睇演唱會。

五點幾鐘到會場, 仍然有好多人排物販,
但就小弟所見, 好多已經售罄......

小弟以16000yen bid番黎o既飛,
係台右手邊o既前幾排, 正。



演唱會內容就唔多講喇,
相信日後都會有好多錄影片段流通。
ANYWAY, 早見o既歌真係冇得輸,
係絕對值得俾錢去聽o既演唱會。

聽完演唱會番酒店,
附近有一間鯛焼き(鯛魚燒) o既店,
好似好受歡迎咁,
於是小弟又買個試下先。

印象中係香港食過o既鯛魚燒,
個皮好似麵包咁厚, 又實,
而入面啲紅豆就甜到嘔。
不過今次第一次真真正正食日本o既鯛魚燒,
令小弟眼前一亮。

外皮並唔係好似麵包皮咁硬, 而係好creamy好軟滑,
而入面o既紅豆飴亦都唔係太甜, balance 啱啱好。




小弟一開始都講過, 今個旅程充滿住早見沙織,
連宵夜o既杯面都唔例外。
首先小弟介紹一下AR: 擴充實境。

AR, 即係例用手機特電子設備,
令使用者係現實世界都睇到一啲二次元o既圖像,
以下就係例子。

一個普通o既杯麵包裝,
用特定o既手機AR程式 (下圖)scan,
就會啟動程式, 睇到一啲現實睇中肉眼唔到o既 (唔係鬼......)

就咁, 下圖係透過AR手機程式見到o既影像,
可以見到上圖o既角色出現係杯麵上,
仲進行聲音播放, 播放程式內預先錄音o既音軌,
係等杯麵熟o既五分鐘入面陪伴用家。
而當然, 呢個紅頭發o既角色, 配音o既就係早見沙織。

就咁, 早見沙織就陪住小弟食宵夜。
係咪好無聊呢, 係, 但第一次玩黎講, 都幾好玩。




當然, 呢個程式, 係杯麵公司同AR程式公司合作搞的,
而事實上, 唔需要真係買一個杯麵,
只需要上網搵一張高解像度少少o既相,
AR手機程式一樣scan到。