小弟入住o既係難波附近日本橋一帶,
原因係小弟一家, 第一站會係奈良,
行幾步過去難波, 就可以坐近鉄線去到奈良。
黎得奈良, 目的都係嗰個架喇, 就係玩鹿,
當然啦, 唔少得o既今個trip o既主題---紅葉。
都係嗰句, 小弟以前都已經黎過奈良一次,
如果想睇奈良詳細啲o既描述,
可以睇番小弟之前o既文章:
不過嗰時唔係睇紅葉, 而係睇放火燒山。
番番黎正題, 由大阪黎到奈良,
因為今晚係住京都o既關係,
啲行野都由日本橋o既酒店拎晒黎, 放左係近鉄奈良駅o既locker。
雖然話係秋天, 但日本o既秋天其實同香港o既冬天有得fight,
行番十度鬆啲, 再加埋啲風, 體感溫度都真係得個位數......
由車站向東行向奈良公園o既方向,
沿途都見到唔少紅左o既樹。
至於鹿? 一啲都唔洗擔心, 一定會見到。
旅客黎得奈良公園, 都一定會買番啲鹿煎餅黎餵鹿玩吓。
上圖就係一個例子。
同鹿o既出現一樣, 賣鹿煎餅o既店家比比皆是, 唔洗擔心買唔到。
以下都冇乜好講喇, 大家睇鹿同紅葉啦。
黎得奈良公園, 多數都會順便去埋春日大社。
由下圖開始就係春日大社o既範圍。
不過咁啱今日好似有祭典嗰啲野,
封左唔俾入......
唯有離開, 前往東大寺。
真係勁多人. 仲多人過旺角......
唔知係咪同春日大社o既活動有關,
小弟走之前, 有一排排o既僧侶同人列隊,
一路唱經一路往大佛殿前進 (上下圖)
因為小弟都唔係咩深度遊啦,
黎奈良睇紅葉, 都係咁上下呢三個景點架喇, 方便快捷。
係近鉄奈良站拎番啲行里,
小弟一家就搭車到京東, 先係check in 今晚o既住宿。
京都係全關西物價最高, 就係人都知架喇,
有時與其住京都, 不如住番係大阪,
係就係日日坐車黎京都好嘥時間,
但有時可能減番車錢都仲平過住京都。
不過問題係一來小弟行程比較緊,
二來父母年事都有啲高, 日日坐車都好辛苦。
不過好在佢地又唔介意話住得破舊啲,
所以小弟book左一間距離京都駅15分鐘路程o既住宿。
雖然話間房真係好細, 隔音又差, 但真係勁平,
所謂賤物鬥窮人......
check in左, 時間已經係六點幾,
不過當然, 小弟唔會就咁浪費晚上呢幾個小時啦。
經過2012年o既經驗, 小弟有一個好好o既夜晚賞紅葉體驗推薦,
就係去鞍馬貴船一帶喇。
先係坐 叡山電鉄鞍馬線 到貴船口。
叡山電鉄鞍馬線, 由市原駅至二ノ瀬駅之間有一段路,
被稱為紅葉tunnel, 係夜晚列車經過嗰一段路,
車長除左會作簡單介紹之外, 仲會慢駛同埋熄晒車箱入面o既燈,
俾大家慢慢欣賞車箱外面照亮左o既紅葉。
到左貴船口, 紅葉季節會有特別巴士班次,
由電車站載遊客到貴船中心一帶,
不過要再前往貴船神社o既路,
就要大家自己行喇。
不過睇紅葉就唔洗錢o既。
行十五分鐘左右就到達貴船神社。
其實仲有貴船神社奥宮,
不過因為尾班巴士時間臨近,
加上貴船神社奥宮又唔係真係話好特別,
所以我地都係打道回府算喇。
係轉車等車o既途中,
俾小弟發現車站有動畫《NEW GAME!》o既poster......
番到住宿都已經差唔多食十點......
沒有留言:
張貼留言