就算未黎過京都o既人, 都可以聽過京都金閣寺呢個名。
金閣寺已經成為左京都旅遊必到o既景點,
加上金閣時o既紅葉都幾, 所以小弟都都將金閣寺納入行程內。
黎到金閣寺, 已經係差唔多中午o既1130左右,
一如所料, 遊客o既數目開始越黎越多。
淨係排隊買飛都排左十幾分鐘(上圖),
不過最誇張o既情況, 要入左收費區內先見到(下圖)。
再加埋初中、高中o既遊學團, 真係插針都插唔入......
係度歎住茶食住糕點睇紅葉都幾好feel,
如果可以少人啲的話......
離開金閣寺, 係對面等巴士去下一站,
目的地係金閣寺西南面兩公里o既仁和寺。
排隊等巴士o既時候, 離遠見到「大文字山」,
山上有個大字, 係京都夏天盂蘭祭典時,
會係幾個山上燒唔同文字圖案o既其中一個。
詳情可以查wiki「五山送火」條目。
搭巴士到仁和寺。
其實仁和寺並唔係小弟主要想黎o既紅葉景點,
不過因為轉車o既巴士站係仁和寺對出,
加上上次黎, 仁和寺都紅葉都叫有啲野睇, 所以順便入埋黎。
好可惜, 似乎今次好似未係時候。
睇完仁和寺, 轉巴士到高雄地區。
話左睇唔同o既紅葉, 點可以少得郊外山區o既紅葉呢,
況且高雄神護寺o既紅葉都係京都數一數二的。
如果要睇晒成個高雄山區o既紅葉景點的話, 都幾係野,
因為上上落落, 都幾多山路階級要行,
不過如果只係睇神護寺的話, 冇病冇痛o既人正常都應該冇問題,
最少家父65歲, 行完都話OK唔太辛苦。
到左巴士站, 落車沿山路落,
沿途都有紅葉樹,
不過都係嗰句啦, 小弟黎得早, 未紅得晒。
過左紅橋再向番山上行就到神護寺。
講就輕鬆, 不過上山o既路都要持續15-20分鐘左右。
往神護寺o既山路, 沿路都有幾間小食店,
可以一邊食野一邊睇紅葉。
終於行到神護寺o既正門口,
小弟父母話齋, 天氣唔太熱, 沿途又有風景睇,
行上黎都唔係太辛苦。
穿過正門, 就會見到上圖o既空地,
晚上呢度仲會有燈光打落紅葉, 都好靚,
有興趣o既朋友可以睇番小弟之前o既文章。
其實除左上面幾將圖, 圍繞空地o既範圍之外,
稍為行多兩步, 都仲有個地點, 小弟幾推薦的,
就係神護寺境內西南面o既地蔵院。
呢度面向山谷, 豁然開朗。
除左好風景之外, 仲有野玩。
遊人可以係旁邊o既小店,
以100yen買兩片小瓦片,
然後由展望台向山谷方向掟出去,
話可以消災解厄, 掟得越遠越好咁話。
離開神護寺, 番番京都駅一帶搵食。
小弟今次發覺, 帶老人家搵食真係好難......
要求有以下:
1) 唔食肥膩
2) 唔食生冷
3) 要有米飯
4) 要夠肉, 唔要細細份左一執右一執
要求只有四個, 但已經bam晒日本大部份o既料理......
因為就以上o既要求, 已經可以cancel 晒:
咖哩飯、炸豬扒、拉麵、壽司、蕎麥麵、京料理、懷石料理......
結果係妥協下, 揀左間京料理,
不過都係細細份左一執右一執嗰種......
沒有留言:
張貼留言