六日五夜 京阪奈良紅葉魷 --- 第四日 清水寺 + 八坂神社 + 伏見稻荷大社 + 宇治

京都, 除左有琴日o既金閣寺之外,

當然唔少得清水寺!

小弟精心計劃o既旅程, 又點少得清水寺。

雖然清水寺冇話有好靚o既紅葉,

但呢啲打咭景點, 點都要黎一黎o既。

上次小弟黎清水寺睇紅葉, 係早上o既五點幾,
只有三五個好似小弟咁變態o既early bird,
但今次同老人家黎, 就梗係唔會咁辛苦啦,
黎到o既時間係9點幾, ok啦, 係多人, 但都冇琴日金閣寺咁誇張。

俾左錢, 進入收費區, 向清水舞台進發。

清水寺旁o既地主神社,
除左係主姻緣之外, 仲會保祐生意興隆,
而小弟家父都係有涉足生意買賣,
所以都趁個熱鬧。

音羽の滝, 山水流到呢度,
被分為三條水柱, 按上圖方向, 看官o既左至右,
三條水流分別象徵「学問成就」「恋愛成就」「延命長寿」。
其實另外仲有唔同o既講法,
反正呢啲野, 玩吓就好了, 唔洗太認真......

離開清水寺, 經過三二一年坂,
到達円山公園。

円山公園旁邊就係八坂神社。

一進入八坂神社, 就見到好多著得好隆重o既家長,
帶住著住和服o既小朋友。
再睇下啲裝飾、海報, 原來今日係日本「七五三」o既日子。

所謂o既七五三, 係日本人為慶祝小朋友長大o既儀式。
需知道以前醫藥不倡明、多天災人禍,
唔係話個個小朋友都可以快高長大,
所以讓年男孩子到左三歲五歲、女孩到左七歲(註),
家長就為小朋友進行儀式, 並帶到神社酬神祈福,
一般為11月15日, 但都有人提前、推後一星期進行。

註: 以該年生日達到的年齡計算,
如女孩該年7歲生日 (滿齡6年), 便可參加。

離開八坂神社, 搭京阪本線由七条駅到伏見稲荷駅,
目的地唔洗講, 都知係伏見稲荷大社啦。
伏見稲荷大社唔係紅葉o既景點, 小弟亦唔會帶老人家上到伏見山山頂,
但小弟個人認為千本鳥居都係幾值得一遊o既打咭景點,
所以就加入行程。

因為小弟都黎過一次, 又冇乜紅葉, 所以小弟今次冇乜點影相。
想知多啲睇多啲o既朋友, 可以參考小弟之前o既文章
伏見稻荷大社+桃山城+宇治(平等院&宇治上神社)

再講一次, 小弟係一個宅, 見到同動畫有關o既野都會影低,
上圖就係動畫《いなり、こんこん、恋いろは。》o既poster,
因為該動畫係以伏見稲荷大社為舞台o既動畫,
當年都有好多collaboration, 而家只淨下一兩張poster。




下一站, 都唔係話紅葉名勝,
不過純粹係黎買個手信打個咭,
講緊o既係宇治。

其實宇治有個世遺景點, 叫平等院,
一不過老人家好似冇乜興趣咁,
所以只係係外面參道買左啲手信、食左啲綠茶野之後就走人了。

下圖o既雪糕係由上圖o既店買。
犀利在係綠茶雪糕上面再撒上綠茶粉,
綠茶味倍增咁話。






小弟今次黎京都, 正值動畫《響け! ユーフォニアム》第二季放送中。
而《響け! ユーフォニアム》o既舞台正正就係宇治一帶。
一來小弟都有玩管樂樂器, 二來京都animation 作品真係好好睇,
所以小弟一直都好想黎個聖地巡礼,
好可惜, 帶住屋企人, 實在係冇時間聖巡, 所以只好放棄......

但小弟實在係死不心惜,
經過JR宇治駅, 黎個小小o既反抗。
下圖係JR宇治駅外一個外型有趣o既郵箱,
出現係動畫第一季。

第四日完。