魷日記: 《響け! ユーフォニアム》京都聖地巡魷

是咁的,
事源係小弟一直都有玩開銅管樂器,
但卻一直都冇自已o既樂器。

終於決定把心一橫,
係日本yahoo拍賣落標買左件易手銅管樂器。
不過因為送貨唔包海外,
於是就寄左去日本在住o既前日文老師屋企,
然後小弟就買張平機票去攞貨。

就算係咁, 樂器價格+酒店+機票, 都一定平過係香港買易手。

另外, 反正都係去日本,
於是決定留番一日黎做自己鐘意做o既野~
就係動畫《響け! ユーフォニアム》o既聖地巡礼喇!!!

一來因為小弟本身都有玩銅管樂,
二來呢套動畫質素都好高,
所以小弟都好鐘意呢套動畫,
一直都想搵機會去聖地巡礼一下,
今次終於如願以償喇!!!

因為咁, 呢編文章o既內容非常毒,
冇興趣o既朋友可以關閉此頁面。

下午五點幾著陸関西空港,
六點幾離開機場, 直奔前日文老師o既家,
拿取銅管樂。
因為同老師都好耐冇見, 所以都一齊食過個飯。

因為老師住嗰區都係啲住宅區,
冇話有啲咩好出名o既食肆,
所以都只係去左啲好地道o既居酒屋。

menu, 睇到眼都花@_@
情況就好似香港餐館o既海鮮紙咁.......

牛蒡天婦羅,
呢條咁o既木頭, 意外地幾好食。

當然唔少得刺身。

醉翁之意不在酒, 其實黎食野都只係志在同日文老師傾下偈啫。

因為呢三日o既野唔多, 小弟就將5/3-7/3三日寫埋同一編就算喇。

第二朝瞓醒覺,
先係去戲院睇戲,
睇o既係《劇場版ソードアート・オンライン -オーディナル・スケール-》

上左畫有一段時間,
不過小弟去睇呢段時間,
剛好係送短篇小說, 正呀喂! 俺得!

電影內容唔係度講喇,

anyway, 睇完戲之後, 小弟就搭車到京都進行聖地巡礼喇!!!

因為動畫《響け! ユーフォニアム》o既舞台係京都宇治一帶,

再加上劇中角色多數都係利用京阪電車,

所以動畫公司都有同京阪合作。

首先係買京阪一日pass, 可以換領file。
上圖右邊係車飛, 左邊係file換領券, 可以換角色人物file一個。
其次係係某啲車站, 會放有角色人物o既紙板, 陣間會再介紹。

事實上行程時間唔係好夠, 所以小弟都係揀啲比較重要同有效率o既地方去。

第一站係黄檗駅, 呢個站名真係中文都唔識讀, 唔好話日文。

呢個站係主角們番學必經之地,
因為主角就係要由呢個車站落車, 然後再行30分鐘, 先番到就讀o既高中。

主角們上落車o既月台。

咁重要o既一個站, 當然放有角色o既紙板。

車站外面

下一個目的, 竟然係7仔!?
無錯, 呢間7仔---黄檗公園店,
因為位於主角們番放學o既必經之路,
所以都會經常係動畫入面亮相。

扭蛋機就冇喇, 多左兩條防撞欄......

7仔對面o既住宅, 真係畫到連間屋都一模一樣。
其實有時都會諗, 自己間屋出現係動畫入面, 唔知係咩感受?

一場黎到, 係呢個7仔買番支野飲留念~

大家有所不知,
由黄檗駅往高中進發, 其實係一直上斜路,
而且有啲路o既斜率都真係幾高吓......
睇吓下圖就知行左有幾高......

行左三十幾分鐘, 終於黎到主角們就讀o既高中
府立莵道高等学校

係真係行左足足三十幾分鐘...
仲要講緊係由車站行上黎,
都未計啲學生由屋企出門口番學搭車o既時間,
日日花成粒鐘番學, 仲要行埋呢咁o既斜路,
個肺活量想唔好都幾難......

上圖係高中前o既單車亭,
呢啲野, 係想香港真係冇乜機會見到。

好喇, 黎到學校正門喇。

可惜冇櫻花......

下一個目的地係三室戸寺駅

月台上o既候車室

由三室戸寺駅向西行, 穿過住宅區就會到宇治川

呢個河岸係動畫入面其中一個好重要o既場景。
不過撇開動畫唔講, 係呢條河川敷(註)散步, 都幾好feel,
而事實上都好多人係度拍拖、跑步。
(註: 河川敷係指河道同埋兩旁高出o既河堤河岸)

上、下圖o既金屬建築物, 其實係一條管道,
不過係輸送咩o既小弟就冇考究喇。

神作畫, 啲光影畫得超靚,
其實上小弟影o既時候都係黃昏,
不過原來太陽o既位置好似唔係好一樣,
可能因為而家係三月, 陽偏南, 而劇中情節係夏天, 太陽偏北。

河堤上o既圖案, 唔好以為小弟亂影幾格就當係,
其實真係有講究的, 細心研究就可以搵出究竟係邊幾格。

身在實景中, 回想起動畫o既情節, 真係喊得出......

最後一站就係宇治一帶喇

先係京阪宇治駅,
眼利o既朋友應該都見到圖出現左角色紙板。

宇治駅月台

上面呢個景, 其實係宇治駅o既背面,
正常o既人應該唔會走黎呢邊。

然後就係宇治川喇,
動畫入面女主角久美子經常都會坐係一張長凳上,
所以呢張長凳就被稱為久美子bench......

就係下圖靠右手面嗰張

久美子bench

然後就經過宇治神社, 向大吉山進發。

因為上山前影一張, 落山又影一張, 所以有兩張實景相。

上圖o既地點係宇治上神社旁邊,
久美子佢地就係行呢條路上山,
條路原來都有名堂, 叫さわらびの道,
而さわらび係指初生發芽o既蕨類植物。

上圖呢個U turn位開始, 就係正式上大吉山o既路

要登上大吉山, 其實要行成十幾廿分鐘,
仲要真係山路同埋沿路冇街燈,
要夜晚上山落山o既朋友, 請自備電筒。

行左十幾分鐘終於到達大吉山展望台,
小弟都尚且有啲攰, 何況久美子佢地要孭住支上低音號上山......

當然, 動畫同現實係兩回事,
事實上宇治o既夜景並唔係咁璀璨......

一個宇治橋西詰o既close up

小弟唔講, 大家都未必留意到上圖係實景, 下圖係動畫~~~

係呢度有個小小o既偶遇。
話說小弟係入黑前上山, 打算等到入黑後, 影多一兩張就走。
係等候期間, 亦都有一個日本呀宅上到黎山上。

佢就犀利囉, 原來佢係住北海道,
一路hit hire落到, 黎到京都, 因為都係《響け! ユーフォニアム》o既粉絲,
所以就特登上黎大吉山聖巡。
小弟有機會都想試吓hit hire......