六日五夜 石垣沖繩中同魷 --- 第五日 万座毛 + 美ら海水族館 + 自製琉球玻璃杯

行程黎到第五日, 其實可以話係最後一日。

今日會去一個遊沖繩必到o既景點,

就係沖繩美ら海水族館喇。

全日本數一數二o既水族館,

招牌係一塊勁大o既玻璃幕o既魚缸。

小弟一直都響往已久。

由沖繩市中心渣車, 都要成兩個鐘先去到,

途中經過另一個沖繩打咭景點万座毛,

點都黎睇下o既。

個天總算對小弟不薄,

除左係石垣o既水上活動有少少影響之外,

整體上呢幾日行程都係勁好天。

万座毛o既生招牌,

好似象鼻咁o既岩石。

個海真係清到呢......

其實万座毛就只係咁,
再加上入口處o既幾間商店, that's all。

老實講, 你只小弟特登過黎就唔會架喇,
但途經兜少少路都還可以o既。

繼續行程向美ら海水族館出發。

早上o既十一點鐘開始, 可以話係人流o既高峰期,
無他o既, 車程都要兩粒鐘, 計埋起身梳洗, 十一點黎到, 差唔多啦。

鯨鯊o既雕像。

沖繩勝在就係個海夠靚,
水族館對海個無敵海景確實令人心曠神怡。

入場費1850yen, 都唔算係好貴。

一進入館內, 就係可以俾大家觸摸o既地帶,
水族箱內放左唔同o既海星,
大家可以試下摸下。

然後就係一個模仿淺水岸邊o既礁灘。

有幾個立o既小水箱,
介紹一啲勁毒o既海洋生物,
下面兩圖就係其中兩種。

獅子魚, 正常平時有睇過discovery channel o既人都唔會唔識。

上圖主角其實係下面嗰兩pat好似炸蠔餅o既海星。

下面呢個水族館,
華人見到一定流晒口水,
皆因入面養左好多又大隻又多肉o既龍蝦。

就咁睇相唔覺有幾大隻,
但其實隻隻都粗過成年男人o既大脾!!!

仲有好多小水槽介紹唔同o既海洋生物,
不能盡錄。

有追開小弟遊記o既朋友,
應該都記得小弟介紹過下幾張圖呢動海洋生物。
因為佢地o既日文名比較特別,
所以廣為日本人所認識。

上兩圖, 身體白色底, 再加上黑色班點o既,
叫「哈氏異康吉鰻」, 俗稱「花園鰻」。
日文名叫チンアナゴ, 直譯的話, 即係何B鰻,
好難唔令日本人記得佢個名......

而下圖橙黃色底色白色紋o既,
日本人普遍都會叫埋佢做何B鰻,
但其實佢真正個日文名唔係チンアナゴ,
而係ニシキアナゴ, 中文名係咩就唔知喇。

日本海附近一帶棲息o既ハブクラゲ (波布水母),
有劇毒, 年中有唔少人遇害。




下圖開始, 已經係美ら海水族館o既招牌項目,
巨型水族箱, 不過仲未行到巨型玻璃幕前,
不過都可以見到有好多巨型o既魚係度游。

鰩, 又名魟。

鯨鯊!

去巨型玻璃幕之前, 先經過鯊魚館。

鯊魚館o既水族箱。

好喇, 今次真係到戲玉喇。

上圖相信就係大家係宣傳單張、旅遊廣告見得最多o既鏡頭。

真係好大塊玻璃幕!!!
如果覺得冇乜特別, 朋友, 請想像下入面有幾多噸水,
塊玻璃要承受幾大o既水壓!!!

其實唔單只睇, 現場仲有人定時介紹水族箱入面o既魚,
又或者係有咩特別事, 例如邊種魚係個水箱入面邊度產左卵,
不過唔遲日文o既朋友就冇辦法聽得明喇。








呢個水族館最正o既地方,
除左可以就咁企係度睇之外,
仲可以係另一邊o既食肆一邊食野, 一邊睇住啲魚遊黎遊去!

唔好期望食物會有好多款式, 又或者會好好食,
但係小弟可以保證, 啲野食都唔係話唔好食,
而且價錢冇話特別貴, 唔似香港海水公園咁, 啲食肆一味靠搶......
只係可能因為人流太多, 餐具等都係即用即棄,
不過唔影響食物質素同睇水族箱o既雅興。

係咁o既環境下食野, 真係好鬼正!!!

上三圖會見到有枱拍住玻璃幕,
呢啲特別席唔係霸就有的,
要係食肆o既入口counter留名排隊,
每人限坐唔知45分鐘定一個鐘唔記得左, 不過不另收手續費,
小弟見平均等半個鐘左右就可以輪到。

食食下旁邊有咁大條鯨鯊遊過, 有時都俾佢嚇一嚇。

日本人o既setting就係咁, 臨出水族館, 一定係經過手信店。
其實都唔係話淨係得手信, 仲有好多科學教材,
又或者係益智o既科學玩具模型。

頭先介紹o既係 美ら海水族館o既主水族館,
要俾錢先可以入去, 但其實往海邊行,
仲有幾個露天館, 係免費的。

其中一個就係海龜館喇。不過小弟們咁啱遇正洗太平地。

啲海龜乾晒塘咁攤晒係度。

其實除左海龜館之外,
仲有海牛館, 同埋海洋劇場,
不過小弟們因為仲有下場,
所以只好直接走人。

要趕住去下一個地方, 係因為小弟們約左時間吹玻璃杯。
其實日本周圍都話自己玻璃製品出名喇,
又小樽硝子、伊豆ガラス、箱根ガラス,
如果小弟係自己一個人旅遊, 都唔會話特別話咩去吹玻璃,
但小弟又唔係話抗拒o既, 加上有團友話有興趣,
間唔中體驗下呢啲野都唔錯丫。

因為小弟見間間吹玻璃體驗o既好似都差唔多,
所以小弟當時主要係按時間同路程黎揀。
首先係係接待處登記報到先。




旁邊就已經係個玻璃工場,
不過因為未夠鐘, 所以未有人,
只有有一兩個工作人員準備緊。

因為時間尚早, 所以係工場旁邊o既陳列室睇下順便涼下冷氣。

靚係幾靚o既, 不過性價比, 一般般,
加上小弟又唔係話突別鐘意玻璃製品,
所以都係睇下就算。






夠鐘集合開波。
首先每人獲發一對勞工手套, 同埋一對手帶(小臂黑色部份)

聽個名就話吹玻璃杯,
但其實可以真正俾外行人做o既步驟少之又少,
大家睇埋落去就知。

上圖呢個就係模具, 用黎壓製玻璃。

首先工作人員會用中空o既金屬棒,
撩一pat預先加熱, 燒到紅卜卜o既玻璃漿出黎,
玻璃漿o既texture大概就好似麥芽糖咁。
工作人會將玻璃放入模具(上圖左下方),
然後參加者就向金屬棒吹氣。
玻璃就會係模具入面膨漲, 形成員柱體。

而家個玻璃開始變硬
工作人員會趁未完全硬晒,
一邊用大鉗夾住玻璃近金屬管嗰邊,
一邊以金屬棒為軸, 旋轉玻璃,
務求用大鉗慢慢收窄玻璃o既一邊。

然後工作人員會再用提供另一支金屬棒,
上面有一小粒好似擦膠咁細塊, 燒紅左o既玻璃粒。
參加者就要將呢支棒連玻玻, 黐上去頭先吹起左o既玻璃。
情況就好似一個汽水樽(封左咀),
你拎住一支金屬棒篤住個樽底,
而工作人員就拎住另一支棒(一開始吹嗰支)篤住個樽咀,
而用鉗收窄左o既部份就係樽頸。

因為樽頸用大鉗收窄左、薄左,
等玻璃硬番, 一扑, 嗰部份就會斷開,
支棒連樽咀就會分離於個玻璃,
玻璃就會黐住參加者頭先黐上去嗰支棒。
上圖就係啱啱分離嗰一下,
可以見到右下角支棒連樽咀分離於主體。

因為玻璃凍左硬左, 所以先燒番熱先可以再加工。

無錯, 上圖就係小弟。
左手一邊以金屬棒為軸, 轉動玻璃,
右手拎住鉗插入去頭先分離左之後o既窿,
況就好似插個鉗入汽水樽樽咀。


左一邊轉, 右手一邊放鬆,
於是個鉗會打開, 撐開個樽咀,
下面連續三張圖可以見到個樽咀慢慢打開,
玻璃杯開始成形。

成功。
因為後來黐上去嗰米玻璃其實唔係黐得好實,
所以稍加外力就可以將金屬棒分開, 淨低玻璃杯。

因為玻璃杯要放入烤箱慢慢冷卻,
所以玻璃杯唔可以即日拎走, 加上參加者眾,
所以先係玻璃杯底部加上記號以兹識別,
等玻璃杯完成冷卻, 就會以速遞送到酒店or指定地址。
小弟們因聽日就離開沖繩,
所以玻璃杯會直接送去香港。
計番港紙, 每隻杯o既參加費連運費, 約HKD$250-$300左右。

因為聽日晨早流流就番香港o既關係,
小弟先車三個fd去shopping mall購物行街,
而小弟就獨自一個人渣架車去還車。
然後再係國際通集合。





係國際通進行一輪血拼, 買齊大家要買o既手信同物品之後,
晚上十一點, 大家就帶住滿足o既心情番去住宿嗰度。

正當小弟想拎鎖匙開門時.....



仆街了!!!!!!!!



條鎖匙冇左!!!!!!!!!



因為小弟驚唔見左條鎖匙o既關係,
小弟將條鎖匙扣埋係條車匙度,
而條車匙......係頭先還車嗰時還埋!!!!!!!!



時間係晚上十一點,
打去OTS公司, 理所當然, 冇人接電話......

唯有嗱嗱臨透過Airbnb平台聯絡屋主啦。
好在呢個屋主都check得密, 又回答得快。
於是話左俾屋主知條鎖匙扣埋係條車匙度還走左,
而小弟們聽朝七點機, 冇可能等租車公司開門,
而小弟們亦都要入屋拎行里趕飛機!



係一大輪手機對話同等候之後,
四十五分鐘之後, 屋主終於搵到開鎖佬黎爆鎖!
小弟短短幾句就交代左,
但大家可有想過小弟當係幾咁焦急, 坐立不安。

下圖就係開鎖佬努力奮鬥o既情況。
其實雖然話開鎖佬黎左, 但小弟們都擔心究竟開唔開到。
好在個鎖都唔係話好特別嗰種,
搞左大約廿分鐘之後, 小弟們終於入得屋。
只係後來小弟要付開鎖佬o既關鎖費18000yen,
同埋後續因為影響到屋主而要多付o既18000yen。

估唔到成世人第一次要call開鎖佬, 係係日本,
仲要係啲咁o既情況......
買呢個教訓, 用左36000yen......