石垣沖繩, 小弟終於黎喇\(^o^)/
本州、北海道、九州、四國小弟都踏足過喇,
唯獨係沖繩仲未到訪, 今次終於如願以償喇~
正如題目所寫, 今次係同中學同學黎玩。
其實好早o既時候, 小弟同幾個相熟o既中同已經傾話搵次去旅行,
咁啱係去年(2016)年底, Hong Kong Express有平機票來回石垣,
價錢只係人均五舊水(包機場稅、燃油費),
問左幾個人啲假之後, 最後有三個閒人可以一齊去,
不過唔緊要, 一行四個, 呢啲size啱啱好。
揀係6月底, 一來因為係平機票o既日子所限啦,
二來, 六月底係沖繩啱啱脫離梅雨季節,
天氣唔會太差之餘又未係風季,
再加上未踏入七月呢個沖繩旅遊旺季,
所以book野都易啲同平啲。
好喇, 入正題講番行程喇。
本身買左o既機票時間係十一點take off, 個時間勁靚。
不過廉航o既就係經常改動,
出發前兩個星期通知, 話航班改左0745 take off,
搞到小弟要4點幾爬起身, 6點鐘唔到就仆到去機場......
anyway, 當地時間11點鐘到達石垣機場。
印象中, Hong Kong Express好似係第一間,
亦都係暫時(本篇章日期計)唯一一間係石垣辦國際線o既外資航空公司。
小弟唔係收左Hong Kong Express錢, 只係想指出,
可見香港人有幾鐘意去日本!
就連呢石垣呢啲山卡拉小島都可以開航線XD
一到機場, 已經有沖繩氣息(其實係石垣),
下圖係機場建築上o既シーサー圖案。
(シーサー[shi-sa-] 中譯風獅爺, 都係要黎辟邪擋災o既野)
先去check in, ホテルエメラルドアイル,
今次揀呢間酒店, 平衡左價錢、地點同質素,
因為book得早. 住兩晚, 每人都只係8舊水,
仲要間房都唔係話好細, 真心抵。
上圖由門口影入去, 左手邊個牆角係廁所, 床尾仲有個小枱仔, 同埋梳化。
比起本身plan o既行程早左三個幾鐘黎到石垣, 都唔知有咩好做,
因為一來本身小弟book左旁晚有活動, 而家中間夾住啲時間唔三唔四咁,
二來石垣其實唔係話咩大市鎮, 實在冇咩好做,
三來小弟只係係石垣逗留兩日, 所有活動都有車接送,
所以小弟冇租車, 就更加唔知有邊度好去喇......
見到日本旅遊書介紹石垣島ヴィレッジ(上圖),
係一個兩三層高o既食肆集落,
於是打算去食個lunch。
不過好遺憾o既係, 雖然已經係中午食飯時間,
但建築物入面只係得三兩間店開住,
而且都唔係正餐會食o既野......
冇乜野好食, 唯有行去叫做最繁華嗰幾條大街搵食。
雖然話係最繁華嗰幾條大街, 但事實上, 都冇乜幾多間商店,
零零散散咁, 就算有, 大部份都係當地人生活所需o既店舖。
好不容易搵到下圖呢間食肆似樣啲, 又有開門做生意。
一間叫佐々木勝o既食肆, 主打係grill o既食物。
於是我地一行四人, 就叫晒set lunch僅有o既三種set。
其實仲有牛扒嗰啲野, 不過lunch食好似heavy左啲, 所以冇點。
下面三張圖, 順序係豬、雞、同石垣牛漢堡。
唔好似為漢堡好易整, 刴碎啲肉打埋一pat煎就搞掂,
真正整過就會知, 做得唔好的話, 只會變左一係舊實過石頭o既肉餅......
要做得鬆化, 唔多粉, 又有咬口, 真係唔易的,
再加上呢間店用石垣牛, 口感就更上一層樓。
今晚會再講多啲關於石垣牛。
頭先提過o既シーサー風獅爺。
食完野, hea左陣, 番酒店休息一下, 就準備今晚o既活動喇。
小弟book左o既係旁晚o既Kayak團。
Kayak係一種類似獨木舢舟o既小船,
乘坐方法較獨木舟簡單, 冇獨木舟咁易兩邊搖擺或者翻沈,
但係扒起上黎就冇獨木舟咁好用力同去水。
揀呢個活動, 一來係因為時間幾好啦,
二來係俾網頁上o既相片吸引左。
因為如果天氣好的話, 會見到一片橙色o既夕陽, 所謂o既Golden Hour。
有興趣可以到官網睇吓:
GLOW STAR home page
至於上圖, 係導賞公司由酒店接送小弟們o既時候影o既相。
當然上圖未算得上係夕陽, 亦講唔係上橙色。
去到公司o既店面, 當職員正為小弟們揀選大小適合o既裝備時,
小弟就努力地寫一大堆文件。
話晒都嬉山莫嬉水, 免責聲明呀、緊急聯絡嗰啲就唔少得架喇。
小弟報名嗰時都講明, 話除左小弟之外, 另外三個fd都唔識日文的。
而公司亦都同小弟講, 到時會安排識英文o既教練。
咁事實上, 個教練真係識少少英文o既, 不過就真係有限公司,
同埋佢見小弟日文都有番咁上下level, 結果都係直接叫小弟做即時傳譯......
小弟可唔可以收番人工......
下圖可以見到, 其他參與者都係用平槳(唔知係咪咁叫),
講緊係兩邊o既槳都係同一水平,
而小弟因為有獨木舟資格, 所以暗瓦底將一邊槳轉90度,
兩塊槳平面成perpendicular 。因為咁樣係好扒啲的,
不過對於呢種十分鐘速成班, 教練當然唔會教咁複雜啦。
英文有限公司o既教練。
啱啱開始出海o既時候都仲見到夕陽的。
但係慢慢就......
今日呢個日子有少少特別,
因為係一個月裏面只有一兩日可以睇完日落之後, 咁啱月亮出黎順便睇埋。
不過大前提係要睇到先得......咩意思?
因為隨仲天黑漸沈, 雲層亦都越黎越厚......
大家一齊扒入去紅樹林睇下。
行程仲包括睇星的, 不過實在係太多雲,
除左木星嗰啲光到嘔o既之外, 都唔係好睇到.....
總算見到少少夕陽啦......
收檔番酒店, 換件衫之後就直接去食晚餐。
第一晚黎到石垣就梗係要食鋪勁o既。
就係聞名已久o既石垣牛喇。
香港人聽得最多應該都係神戶牛, 同埋近年都好受歡迎o既飛驒牛,
但事實上,石垣牛o既質素都非常之好,
加上石垣牛, 就算係日本國內, 都唔會話出口到其他縣,
所以石垣牛就更加珍貴。
同埋好似話神戶牛o既牛種, 最初都係石垣牛來的(求資料來源)。
食牛有好多食法, 但小弟一向認為,
最好食最原汁原味o既方法, 就係就咁燒。
今晚我地黎到一間叫わたなべ o既炭火燒牛店。
其實石垣島內同埋沖繩都仲有好多間店,
而揀呢間o既原因, 純係因為佢開得夠夜......
唔好以為日本人真係完全唔食內臟,
其實佢地都好興燒牛內臟, 甚至食得仲liu lung過我地。
意外地, 燒牛柏葉啲口感好好!
本身已經係逐碟叫逐碟計, 都食左三四轉,
差唔多七成飽o既時候, 係時候黎再高級啲。
通常燒牛店都另外有menu, 講吓當日有咩貴野入左貨。
3000~5000yen一塊仔, 不過黎到呢個時候, 價錢唔係問題,
所謂出得黎行, 預左要還。
為左想要有牛o既香味, 但又想有口感,
我地最後揀左サーロイン(Sirloin), 即係香港人叫o既西冷。
當然, 淨係睇啲雪花都知道,
呢啲西冷, 同平時係茶餐廳食到嗰啲西冷牛扒,
完全係兩回事~!
一咬落去, 滿口都係油, 但一啲都唔會覺得肥膩,
軟滑, 但係彈牙o既肉口感,
正如其中一個團友話齋, 食完呢件牛, 真係完全番唔到轉頭。
再食番頭先order嗰啲牛, 真係完全比下去了......
十點幾十一點, 食飽飽就打道回府喇。
沒有留言:
張貼留言