六日五夜 帶兩老上富士山 --- 第二日 草津溫泉

今次係小弟第二次黎草津,

但因為今次黎o既天氣唔係話咁好,

所以如果想睇多啲關於景點同靚相的話,

可以參閱上次o既BLOG

八日七夜 北首都圈 毒撚魷 第四日 --- 草津溫泉

而今次會放多啲係旅館&溫泉。

上次小弟一條魷黎草津係坐JR,

今次帶住老人家, 當然係自駕啦。

渣兩個鐘頭車左右就到草津了。

上次小弟自己一個窮遊, 而且有第二個目的,

所以只係求其搵左間有瓦遮頭就算,

今次真真正正黎浸溫泉, 當然係簡番間好架啦。

平衡番位置、溫泉、價錢、膳食、同埋網評之後,

小弟結果都係揀左係正湯畑傍邊o既一井。

因為都有番少少歷史o既關係,
大堂呀、走廊呀嗰啲公共地方,
唔多唔少都有啲啲舊同老套o既感覺,
但唔代表唔整潔。
(上圖係check in lobby)
而事實上房間都好新淨(下圖)。

最正係係個view。
下圖係由check in lobby個陽台影出去,
對正個湯畑, 成個湯畑盡收眼底。

好喇, 講下咩係湯畑。
相信未黎過日本, 但經當睇日本旅遊節目o既朋友,
就算唔記得個名, 都會對上上下下幾張圖有啲印象。
呢個湯畑因為太symbolic, 所以令草津溫泉出左名,
亦都間接成為左日本溫泉o既代表。

湯畑(ゆばたけ), 譯音Yu Batake,
「湯」即係 熱水, 而「畑」本身係指菜田農地,
直譯的話即係 「收成熱水」o既地方啦, 不過大家取其意就算。

而點解湯畑有咁多一條條木o既水道呢,
其實係因為草津呢個溫泉泉源水溫較高,
所以將啲泉水暴露係空氣中冷卻一下, 然後先供人使用。
於是造就左呢個咁特別o既景色。

Check in左, 又係湯畑影左一陣相之後,
就去下一個景點, 西の河原公園。
如果齋浸溫泉的話, 可能去城崎、下呂會仲好。
小弟會揀家庭旅遊黎草津,
除左係因為草津溫泉啲泉水唔錯之外,
溫泉之餘仲有好多野可以做,
啱晒香港人o既旅行。
而西の河原公園就係其中之一。



當然, 以湯畑為中心擴散開去, 都有唔少店舖購物,
但小弟同屋企人對購物都唔感興趣,
所以呢度著墨唔多。

去西の河原公園途中, 經過一間溫泉蛋店舖,
小弟第一次黎, 食過一次, 畢生難忘,
所以今次點都帶屋企人黎食番次。

事實上間舖並唔係食肆, 而係玻璃工藝品店。
不過門口設有一個池, 用溫泉水黎煮蛋。
小弟有理由相信, 呢間店賣蛋o既收入高過店入面賣貨o既收入。

時間啱啱好o既蛋, 好似豆腐咁滑,
加上店舖提供o既醬油, 倍添鮮味。
不過兩老覺得唔加醬油好食啲喎。

步行唔洗十分鐘就到達西の河原公園。

見到佢煙霧瀰漫, 就估到佢入面o既水都係溫泉。

今次黎好似比上次多左啲設施,
不過有啲都仲建設中。

行下行下, 時間差唔多, 係時候番去旅館食晚餐。
今次o既晚餐係住宿包埋, 係旅館o既餐店食,
小弟揀得o既, 唔係差得去邊o既。

最正係呢個豆乳火鍋,
用佢黎煮豬肉, 十分香滑!!!

晚上o既湯畑light up, 好有氣氛, 冬天黎一定好正。

好喇, 黎得草津, 當然一定要浸溫泉啦。
草津o既溫泉, 泉水酸鹼值低到去pH2.1左右, 同胃酸有得fight。
當然, 同胃酸唔同, 草津溫泉唔係純鹽酸啦。
因為都有其他鑛物質o既關係, 味道係又酸又鹹又苦。
嗱, 無人叫你去飲架, 事實上草津o既溫泉唔係飲用泉水,
不過啲水彈左少少上咀邊, 試下味都無妨。

因為草津溫泉酸鹼值低, 所以對加速皮膚代謝、去死皮十分有效,
浸完之後, 皮膚真係好似溫泉蛋咁滑。
不過亦因為酸鹼值低o既關係, 如果你身上有傷口,
浸草津溫泉會非常痛苦.....包括指甲倒刺o既小傷口......
所以計劃去草津浸溫泉o既朋友, 出發前唔好受傷......