六日五夜 帶兩老上富士山 --- 第三日 白根山+鳴沢冰穴

小弟會帶屋企人黎草津, 因為貪佢夠多元化,

1) 溫泉水靚

2) 古色古香

3) 有湯畑、西の河原呢啲景點

而第四個原因, 就係可以到附近o既白根山黎個小小o既遠足。

小弟今次係渣車, 所以就直接驅車登古原,

但冇車o既朋友都唔洗擔心, 

因為由草津巴士總站係有巴士上山的, 車程只係半個小時,

不過要留意時間表, 因為大概一個鐘一班。

早上係旅館食過早餐check out 左之後, 就渣車上白根山。

上白根山, 可以黎個小小o既遠足,

由下圖o既白根山觀光設施, 行約15-30分鐘左右,

就可以到達白根山山頂展望台,

觀覽火山口湖---湯釜。

詳情可以睇番小弟第一次黎草津o既BLOG

八日七夜 北首都圈 毒撚魷 第四日 --- 草津溫泉

白正如上圖所見, 其實天氣唔太好......

除左落住毛毛雨之外, 仲好大霧......

ANYWAY, 黎到, 點都行吓啦。

上圖係遊步道o既起點,
有一筒拐仗, 免費供大家取用,
當然用完落山要放番番黎啦。

 上圖係行左少少路之後, 望番落去觀光設施同停車場。


 

行左廿分鐘, 上到展望台, 但望到o既係.........

 白茫茫一片......

等左半個鐘都冇乜起色, 於是都係放棄,

落番去觀光設施, 買綠茶雪糕食...... 

等小弟post番第一次黎草津o既時候o既相啦

睇唔到火山口湖都冇辦法, 人總需要勇敢生存,
小弟就向住今晚o既住宿出發。

還記得標題嘛?
冇錯, 帶兩老上富士山,
所以小弟今晚住宿係係富士山山腳o既河口湖。

富士山俾兩個縣夾住,
北面係山梨県, 南面係静岡県。
因為一般o既登山, 都係由北面o既富士昴LINE五合目作為起點,
所以小弟今晚住係富士山北面, 山梨県o既河口湖。

↓↓↓↓↓↓↓

當然, 今日o既行程唔會淨係得白根山啦。
富士山北面都仲有好多小景點,
包活富士五湖、忍野八海、冰洞等,
所以行程可以好有彈性。
時間有多可以睇多幾個, 冇的話就揀一兩個算。

頭先張地圖都見到,
因為由長野草津過黎河口湖, 路程都唔係話短,
所以下午黎到, 只係夠時間去鳴沢氷穴。

故名思意, 鳴沢氷穴係有冰o既洞穴。
因為火山運動o既關係, 富士山山腳有好幾個地下岩洞,
而地底保溫o既關係, 呢啲地下洞穴, 入面可以維持冰凍,
到左夏天啲冰都唔會溶。
而古時日本人就利用呢個特性, 黎儲存冰供夏天用, 又或者係儲存糧食。

上圖介紹鳴沢氷穴o既特色, 同埋解釋點解洞內可以保持冰凍。
簡單黎講, 原因如下。
1) 上面植被阻擋陽光
2) 岩洞岩壁厚, 可以隔熱
3) 富士山流落黎o既地下水夠凍

成人入場費350yen, 都幾抵玩丫。

經過上圖o既走廊, 就會到達領取頭盔o既地方,
因為洞內有啲地方都真係好窄, 又或者係濕滑,
所以一定要戴頭盔, 不過頭盔係免費借用的。

然後就可以見到下圖o既冰穴入口。
因為洞裏面狹窄, 所以係單向前進,
大家要留意相關指示牌。

都未真正入到洞入面, 氣溫已經驟降,
明明係夏天, 需說陰天, 但都短衫短褲,
但一黎到洞口, 體感溫度就只有十零度。
不過因為餘溫o既關係, 所以都未打冷震, 仲可以頂得吓......

一入洞內, 先係一條又窄又濕又斜o既石級。

然後向上爬, 係一條樓底好低o既通道,
成年人要坐低身, 有時要落埋手先移動到。

真正入到洞入面o既儲存空間, 稍為大番啲。
同時, 亦都見到有好多冰。

好似話上圖呢幾條冰柱, 由明治時期以前就一直冰到而家冇溶過。



老實講, 如果你話特登搭公共交通,
or 就行程特登黎睇鳴沢氷穴,
其實又唔係話咁值得, 但如果係行程有時間鬆動冇乜野好做的話,
過黎睇吓都不失為一個好提議。

另外, 帶多件風褸先入去洞入面會好啲。

鳴沢氷穴o既小店。
入面都有好多手信賣。

因為聽日就登山o既關係, 所以晚上出去河口湖o既shaopping mall食野,

順便購買一啲行山o既用品。

 一來會加重行里, 二來有啲野係日本買會齊啲唔洗周圍搵,

所以留番黎日本先買。

另外, 因為登山唔係話想食野就冇間野係左近,
所以登山一定要買糧食, 而CalorieMate就係必備o既野!
(CalorieMate係一種能糧棒, 一種好實好實o既餅乾條)。

好, 聽日就登富士山喇!