六日五夜 帶兩老上富士山 --- 第四日 富士山登山

正式黎到今個行程o既重點, 

就係開始登山富士山喇。

先簡介一下行程。

小弟們會先乘坐交通工具到富士山五合目。

然後向住八合目o既o住宿進發, 係嗰度留宿一宵。

("合目", 可解做廣東話o既"成",

五合目, 即係五成高, 八合目即係八成高)

第二朝睇日出, 之後, 如果時間同體力許可, 可能會登頂,

如果唔係, 就直接下山。

雖然由五合目到八合目, 一般只需要4小時,

但考慮到老人家可能會行得慢啲,

所以一早就出發, 9點前已經到達富士北麓駐車場。

因為登山季節, 通往富士スバルライン五合目(直譯"富士昴LINE五合目")會封路,

只限有許可車輛進入, 所以要到五合目的話,

要先將車停係富士北麓駐車場, 再轉巴士上山。

泊一日只需要1000yen, 絕對係化算。

由上圖o既售票處買巴士飛。

下圖就係等巴士o既地方。

好, 出發~




其實五年前小弟跟過日本o既local旅行團,
進行三日兩夜o既富士山登山,
嗰次天氣仲好到無得彈。
有興趣o既朋友可以睇番當時o既BLOG
富士山登山 第一天
富士山登山 第二天
富士山登山 第三天 + 總結 + 建議

駛過富士昴LINE o既收費站, 進入收費/限制道路。

三合目。

三合目都仲可以見到藍天, 但越上就越多雲大霧......

約45分鐘, 就黎到富士昴LINE五合目, 係多數人登富士山o既起點,
呢度亦係好多旅行團黎打咭o既地方,
如果旅行圍行程有富士山的話, 十之八九都係黎呢度打個咭走人。

因為係咁, 所以富士昴LINE五合目真係好多人......
唔知以為黎左尖沙咀......

富士山五合目, 標高2305m。
實際上富士山標高係3776m, 所以五合目, 其實唔係真係五合目......

因為呢度係好受歡迎o既發山起點,
所以店舖齊備, 食肆不在話下,
如果有帶漏o既登山用品, 呢度可以作最後補給,
但當然, 費用就係會貴少少架喇。

登山, 就算天氣幾好都好,
都要帶雨衣, 因為山上天氣多變, 一轉眼就可以狂風暴雨,
所以上下兩段、褲管式o既雨衣不可或缺。

其他登山裝備, 應有盡有。

係富士昴LINE五合目食左個brunch,

再逗留左一陣黎適應高山o既環境。

咁係為左減低高山症o既機會。

 1100左右開始登山。
今次行o既, 同上小弟第一次行o既一樣,
都係名為吉田route o既登山徑。
上富士山有四條以上o既路,
但如果係新手的話, 會以吉田route最好,
最主要係因為一起步, 會圍住富士山行一段等高o既路,
除左可以作為熱身之外, 亦都可以令登山者適應高海拔環境,
從而減低高山症o既機會。

可以騎馬到六合目左右, 但係費用貴到無倫。

正如頭先所講, 吉田route一開始係起伏不大, 等高o既路。
但係天氣唔多好.........

到左六合目, 真正向上登山o既起點,
有兩間小屋, 小弟五年前黎好似係冇的。
睇黎係要黎推廣保育之外,
仲要黎防止彈丸登山。

日文"彈丸", 即係子彈。
彈丸登山, 係指嗰啲短時間上山落山, 好似子彈咁快。
因為好多人係衝著日出而來, 而登山時間大約係6小時,
所以彈丸登山一般都係入黑後登山。
由於入黑, 加上有啲人經驗同裝備都唔夠,
好多時都會發生意外求救, 再唔係就發生高山症。
於是日本政府近年大力做宣傳教育,
防止彈丸登山。

天氣越黎越差, 小弟們都要著雨衣。

由七合目開始到八合目,
途中全部都係岩石, 要落埋手先爬到,
所以記得戴手套。
有經驗o既小弟, 當然一早同屋企人準備左。

就咁睇幾張相好似好簡單,
但因為對老人家黎講都相對辛苦,
加上落雨o既關係, 進度極之緩慢。

八合目開始, 係一啲之字形o既碎石路。

稍為停左一陣雨, 見到彩虹。

終於黎到 本八合目。點解八合目之後會有個本八合目?
因為唔同計法o既關係, 所以出現左八合目同本八合目。
ANYWAY 簡單講, 本八合目比八合目高, 較為近山頂。

黎到本八合目, 小弟們今晚住宿o既富士山HOTEL,
時間係晚上1800!!!!!
即係話小弟們用左7小時黎登山......
其實一般五合目到本八合目, 應該大約只需4.5小時......

望落山腳......係乜都望唔到的......



住宿個名好似好勁, 叫富士山HOTEL,
其實都只係一間"山小屋", 即係一間唔多大o既平房,
對唔住, 小弟唔記得影相, 但可以參考上圖左方o既小屋。
富士山上o既山小屋, 叫咩名都好, 間間都係咁o既樣。

住宿提供o既晚餐。

你會話吓? 咁叫住宿提供o既晚餐?

但老實講, 已經比小弟預期o既豐富,

要知道運物資上海拔三千米, 唔係一件易事。

再加上係雨中爬左7個鐘, 一直只係食CalorieMate,

所以呢餐份外覺得好味......

除左想像唔到膳食會係咁之外,

你仲會冇諗過山小屋係點瞓。

山小屋企採用「雑魚寝」o既形式。

雑魚寝 (Zako Ne)一詞有好多意思,

但用係山小屋, 泛指男女不分咁一齊瞓,

亦都冇特定就寢時間。有啲人晚上七八點瞓, 三四點上山頂睇日出,

有啲人十點幾十一點先瞓, 朝早留番係度睇日出。

所以成晚都有人山山入入。

山小屋雑魚寝仲有個特點,

就係多數, 每人都只係得一個睡袋,

活動屋間就口有一個睡袋咁闊,

鞋同行里掛床頭。

山小屋唔會有沖涼o既設施,

個個都係成身沙塵咁插入睡袋,

而睡袋亦唔會日日清理,

所以睡袋入面有沙泥都係好正常。

有潔癖o既人應該會死得......

雖然係咁, 但攰到嘔電,

所以都唔理得咁多, 照瞓。