琴日最後講左句照瞓,
但其實都唔係好瞓到,
可能因為琴日天氣唔好, 行山行得吃力,
加上勁多人屈埋係一間小屋度瞓,
一直都有輕微高山症(暈、作嘔、作悶)
花左兩個鐘左右先可以入睡。
不過瞓唔夠幾耐又要爬起身喇,
都話左上黎富士山係為左睇日出咯。
一早check過日出o既時間大約係4點半左右,
所以小弟4點左右就出定黎霸位。
以小弟上次登山o既經驗, 唔霸定個欄杆位都唔洗指意影到相。
因為小弟住嗰度距離山頂唔夠一個小時路程(腳程好的人黎計),
所以仲有好多人睇吓可唔可以趕得切係比較高, 甚至係上到山頂睇日出。
同埋仲有好多人趕緊路(上圖中間成斜線o既光串)
山下面好似越黎越大雲霧......
保你大, 啲雲霧唔好上黎......
因為望向天邊, 全部都係雲......
到最後, 日出唔再紅, 已經正正式式成為日天......
雖然話睇唔到太陽日出個紅蛋黃, 但其實見到少少紅色都已經好好彩,
因為小弟下塌o既小屋以下o既地方, 一直都係被雲霧覆蓋(下圖)......
而山頂上面都係......
係可以見到紅霞, 可以話係不幸中o既大幸。
食左早餐, 係時候決定, 究竟係繼續上山頂, 定係打道回府。
以琴日o既進度黎睇, 要係日落前上山頂再落埋山, 實在有啲困難,
加上兩老都知道自己事, 所以佢地最後都係決定落山算數。
其實落山先係另一個地獄o既開始,
絕對唔俾上山容易。
因為係碎石o既關系, 所以好難掣動, 亦都好易拗柴,
而且「之」o既關系, 行走距離係上山o既幾倍,
不斷係咁落斜, 對膝頭關節同大腿肌肉o既負擔好大。
就算係小弟方當壯年, 當年落完山, 對腳都攰到係咁震......
但好在有上次o既經驗, 今次有萬全o既準備。
小弟一早買左兩對護膝俾兩老。
呢種護膝唔係一般就咁一塊布o既嗰種,
而係膝頭正前方開窿、左右兩邊內藏彈簧、
上下有彈性魔術貼調整鬆緊嗰種專業o既運動用護膝。
如果冇左呢兩對護膝, 我都幾相信兩老就算唔受傷落到山,
膝頭都要痛幾日......
但小弟覺得上山會好唔方便, 而且落山都唔係話幫到好多力,
所以小弟冇帶。
等埋屋企人係呢度最後shopping之後, 小弟們就搭巴士落山攞車。
由於時間尚早, 未夠鐘到酒店check in,
再加上除左個早餐之外都仲未食野,
於是攞左車, 第一站係先去食lunch。
因為小弟住o既酒店係河口湖,
所以都係番嗰邊搵野食。
小弟黎到o既係一間叫天下茶屋o既山邊小屋。
呢度極為隔涉, 因為叫得乜乜茶屋o既,
好多時都係古時啲人用雙腳穿州過省o既時候, 中途歇腳o既地方。
如果有追開小弟BLOG的話,
可能都會記得, 小弟去過箱根古道o既甘酒茶屋。
七日六夜 箱根東京千葉魷 第一日 --- 箱根
小弟講話極為隔涉,
有幾隔涉? 睇吓下圖就知。
下圖係由天下茶屋對住o既風景,
穿過山拗, 先可以見到河口湖,
同埋最近o既市鎮---河口湖市。
渣車落去都要20-30分鐘。
好雅致o既內裝, 一洗市區o既繁喧。
menu冇乜得揀, 得ほうとう鍋同きのこほうとう鍋
ほうとう鍋 (音: Houtou Nabe), 係山梨縣一帶o既特色料理。
ほうとう主要係指一種闊而扁o既麵,
用小麥粉製成, 質感近似烏冬。
一般配以味噌、野菜黎煮。
而第二種o既きのこほうとう鍋 (下圖),
きのこ就係指菇, 而天下茶屋用o既係なめこ(下圖啡黃色菇類),
なめこ係一種滑潺潺o既菇, 香港人可能會覺得口感好核突,
但日本人認為 (其實都有醫學論證) 滑潺潺o既食物對身體好,
所以你會發現日本好多滑潺潺o既食物......
唔好睇佢1410yen一碗菇麵好似好貴,
佢真係落足料, 小弟一個大男人自問大食,
但就咁一碗都足夠小弟食得飽......
一家四口叫左三碗, 得小弟一碗食得晒......
不過呢度啲味噌混有山椒, 味道同一般味噌有少少唔同。
如果天氣好的話, 係店內仲可以望到富士山 (上圖),
但正如呢兩日都講, 富士山一帶天氣唔好,
唔好話山頂, 就連山腰都見唔到......
店內當然唔少得有販賣當地製作o既食品、調味料等等。
呢間天下茶屋仲有一個出名o既地方,
就係日本文豪太宰治曾經係度住過一排,
所以店內都有好多太宰治關連o既物品展出。
當然就係以呢間店作為故事舞台。
店o既二樓, 全層都用左黎做太宰治o既展館,
然後下圖o既房間, 係重現番當年太宰治住o既時候o既攞設。
好喇, 相信都唔係咁多香港人知太宰治係乜水,
所以都係去下一個景點。
小弟一早都知落山o既時間有啲難就,
的確比預期早左落山, 而家距離酒店check in又仲有啲時間唔三唔四,
好在小弟一早就有幾手準備, 有好多小景點可以攝時間,
而其中之一就係河口湖附近o既「忍野八海」喇。
「忍野八海」, 就咁聽好似好把炮咁,
其實簡單講, 只係八個小水池.......
但點解可以成為景點呢。
上面有忍野八海o既日文詳細解譯, 不過歷史野小弟就唔多講喇,
講重點, 就係呢啲水池o既水都係由富士山o既溶雪and/or地下水流出而成。
因為經過泥土o既過濾, 所以池水異常清澈,
再加上附近都有好多保持古建築風格o既建築物,
所以就小弟所見, 都有好多內地旅行團到來參觀。
小弟相機冇適當o既filter, 所以唔可以如實反映水有幾清,
不想話一水入面有幾多條水草都可以數到。
可以俾大家試下啲水有幾凍。
因為係由富士山溶雪而成, 加上地底保溫,
所以即使係夏天, 啲地下水仍然保持5度左右o既溫度。
頭先都提過, 附近o既建築都好有特色,
不過多數都係手信店。
如實講, 呢個景點, 小弟覺得唔係特別話有睇頭,
不過如果真係時間有多, 又順路的話, 都可以黎望望o既。
另一樣野o就係, 忍野八海附近泊車指示唔太清晰,
不過有啲商店食肆提供免費泊車,
甚致有啲空地、爛地, 好似當地人都係就咁亂泊 (27/7/2017時點)。
當然, 可以的話, 大家都係睇清楚問清楚先泊啦。
好, 上完山又落山, 食埋野要睇埋景,
係時候去梳乎一下喇。
小弟將之前幾日慳埋o既住宿費, 全部放晒落黎呢一日。
每人消費一千港幣左右o既酒店旅館。
間房大就唔洗講, 超大個窗, 對住個湖景,
要加錢先有架......
行左兩日山, 食飯當然唔想再行,
直接叫人送黎房食啦 (其實房錢包埋)。
唔講喇, 開餐。
沒有留言:
張貼留言