六日五夜 帶兩老上富士山 --- 第六日 富士 SAFARI PARK

雖然重頭戲---富士山登山, 以一個唔太理想o既情況完成左,

但其實到最後呢一日, 都仍然有好精彩 o既節目,

就係黎到靜岡縣o既富士SAFARI PARK。

似乎都係小學學校旅行o既一個熱門地點。



初初以為野生動物園, 花最多時間o既一定係睇動物啦,
點知小弟一家, 係睇動物之前, 就已經俾手信店吸左入去,
從此一去不回.......



三分一個足球場咁大o既手信店,
入面全部都係以動物為主題o既物品,
當然又以毛公仔最多。
問題係, 全部o既造形都好可愛, 令人愛不釋手......

手信店, 一入去就睇左個幾兩個鐘......
仲要屋企人都未睇夠本, 結果要小弟提議,
將想買o既野影左相先, 臨走前再番轉頭買,
咁先可以甩身, 真真正正去睇動物......

真正走入園區。

先簡介一下, 成個公園主要分左四部份:

飲食購物設施、親親小動物區、大型動物區、同埋野生園區。

先去睇吓啲輕鬆啲o既小動物先。

呢個區係標榜俾大家近距離接觸小動物。
有幾近距離? 咪就係伸手可及囉,
俾一百幾十yen, 仲可以餵佢地添。

豚鼠

要數動物園入面可愛o既代表,
當然唔少得小貓熊啦。
亦都係手信店最熱賣o既毛公仔之一。

呢個天真無邪o既樣, 真係好可愛......

近距離接觸o既仲有袋鼠。

都係啦, 可以買糧餵佢地。

因為啲欄杆真係好矮, 所以啲袋鼠好容易就跳入行人路。
事實上, 啲欄杆反而係用黎limit訪客o既行動範圍......
都唔知邊個先係籠入面o既動物喇......

上圖呢一幕其實係好可愛o既一個場面。

話說啲幼稚園生正想離開時,

一隻大袋鼠突然跳入道路欄住去路,

嚇到啲小女孩尖叫, 跑到去樹後, 但袋鼠仍然步步進迫。

隻袋鼠企直, 都高過小朋友兩三個頭, 都唔好話唔驚。

就係呢個時候, 一個男同學仔攝出黎,

擋係其他同學前面, 仲叫大家唔洗驚,

你以為佢真係唔驚? 其實佢都係度褪緊......

不過成個情況, 實在令人會心微笑,

同埋令人覺得, 原來少女漫畫o既情節係真係存在的XD

暫時離開一下親親小動物o既空間,

去參觀一下其他大型動物。

先係野豬

不過真係瞓到成隻豬咁.......







以下殺左小弟唔少菲林......記憶體o既, 係 狐獴。
最symbolic可以話係佢雙腿直立o既動作。
其實呢個動作, 係為左可以有更闊o既視界黎識別天敵o既來襲。

上圖呢個牌, 係話俾訪客知, 狐獴最生猛o既時間係中午一點半打後。

小鹿班比

行左一朝, 都係時候祭五臟廟。
園內有一間餐廳, 都幾有氣氛。
都係嗰句啦, 不得不讚日本人o既良心,
園區任入面o既飲食, 同一般出面成o既價錢唔會相差太遠,
海水公園、滴滴泥公園真係冇得比......

食完飯, 下一站係去睇獅子王---小白獅。
如果閣下一開園就黎, 仲可以去排隊攞籌,
有機抱小白獅影相, 先到先得。
不過小弟們黎o既時候, 都知啲籌一早已經派晒,
所以可以慳番唔洗排。
不過都仲有野可以做。
冇得抱住影相, 但都可以睇近距離拍攝,
瞄準食奶時間, 我地一家人就去到小白獅館。

7月7日日本七夕節出生。
相可以任影, 但記得inactivate個閃光燈。

身軀大約大半米長啦, 但望見都已經feel到佢地應該好重手吓。

貓科動物, 最叫人注目o既一定係肉球,
睇落好似都好柔軟......

好似同普通o既貓冇乜分別

到左餵奶時間。

同餵人類BB一樣, 餵完係要掃風的......

おい、ライオンちゃん、そこ換わってくれ

食完奶之後個肚脹卜卜。



影左大半個鐘之後, 出番去館外面, 咁啱又係介紹緊小白獅。

好難想像呢個毛球會係百獸之王。

因為係今晚機, 倒計番離場時間,

先去拎乘坐野生園區觀光巴士車票。

攞籌o既地方就係停車場附近o既office。

但仲未夠鐘上車, 所以先行番下小動物園區先。

途中見到侏儒馬。

狗館......但係有咁多唔同動物o既情況下, 睇狗唔係首要。

唔好似為係椰殼, 其實係穿山甲

草泥馬(羊駝)

嗰種憂鬱o既眼神、迷人o既鬚根......



唔同種類o既兔仔。

天竺鼠?



松鼠猴。
俾100yen可以餵佢地食野。
小弟o既父親都餵得不亦樂乎。

貪心嗰啲, 仲會直接伸手出黎搶。

因為格仔網o既關系, 好難focus, 不過上兩圖,
係一隻大o既孭住一隻細o既。

環尾狐猴

非洲野犬

河馬

蹄兔

黑豹。
話說黑豹真係好難影, 黑潻潻一舊咁, 完全focus唔到。

條紋鬣狗

金錢豹。
啲毛皮真係好靚, 唔怪得一直以來都係收藏家o既目標。

其實係可以餵豹的, 不過又係要提早黎攞籌。




非洲冕豪豬
唔講仲以為係刺蝟。
不過唔好睇小佢, 因為啲刺夠長o既關係,
有紀錄話連獅子都唔係佢對手。

好喇, 到左期待已久o既野生園區時間喇, 先講下點樣攞飛。

頭先都提過, 係停車場附近o既office可以買飛,
不過全部都係先到先得, 因為小弟係平日去,
所以比較老定, 可以就住行程, 到差唔多時間先買飛,
但如果係假日的話, 除時上晝就已經冇晒飛。

買飛全自助, 跟住機器指示就得。
每人1300yen, 都幾良心價。
買左飛, 就按住時間, 係以下o既巴士旁排隊,
不過冇得揀坐邊間, 完全係depends on時段。
大約二三十人左右一架車。

如果唔想同啲三唔識七o既人迫埋一架籠車的話,
又可以租用下圖o既汽車, 每輛5000yen,
所以如果有4個人的話已經抵過上圖o既巴士。
壞處係要自己開車, 但車內有電子導航同埋解說。
有5人車同7人車。

小弟一家坐o既就係上圖o既河馬車

入面啲凳係背對背, 向住車o既兩則坐,
不設劃位, 但啲人多數都係先上車就坐最入。

每人地上都有一份食物,

粉紅色雞肉係餵獅子, 蘋果蘿蔔餵熊, 圓形顆粒餵駱駝。

而下圖就係要黎放圓形顆粒餵駱駝o既tray,
設計類似汽水機取飲品o既口, 不過訪客係汽水機嗰邊,
駱駝係取汽水嗰邊。

都係嗰句啦, 都唔知係邊個困住邊個......
下面唔多講喇, 睇相啦。

雖然隔住兩重網, 但當真正o既雄獅在前,
個心都其實有點寒, 呢啲就係百獸之王o既氣勢......

坐巴士除左唔洗自己駕駛之外, 好處係好好氣氛,
因為驚歎聲同尖叫聲些起彼落,
又或者自己睇漏眼o既時候, 透過旁人o既提示, 可以睇多好多野。

ANYWAY, 因為今次第一次黎, 為免出麻煩, 都係坐巴士遊野生園區,
但下次有機會, 小弟都想自己開嗰架斑馬塗色o既車玩下。

睇完野生園區, 最後最後去番手信店買精品, 然後就走喇。



就咁, 六日五夜o既行程就係呢度完結。
雖然富士山登山唔太成功,
但Safari park俾左小弟們一個好美好o既回憶~~
之後都冇乜野好講喇, 只係要飛車由靜岡番番去上野交車,
然後仆去機場入閘。

想了解多啲富士SAFARI PARK的話, 可以登入以下網址。
頭盔: 小弟冇收錢賣廣告架吓
https://www.fujisafari.co.jp/